Air Greenlandip ilaasuisa SAS-imut ilaallutik illoqarfinnut ukununnga Aalborg aamma Aarhus – paarlattuanillu - ingerlasussat nassataat apuuffisamut aqqutaa tamaat ingerlasussatut tunniunneqarsinnaalissapput.

Nassatassannik tunniussininni SAS-mut ilaallutit ingerlaqqinnissat oqaatigissavat, taakkununngalu ilaallutit angalanissannut pilersaarut takutissavat.

Taamatut isumaqatigiissusiornerup nassataraa Air Greenlandimut ilaasut Danmarkimilu illoqarfinnut taaneqartunut SAS atorlugu ingerlaqqittussat nassataasa apuuffissaannut aqqutaa tamaat ingerlasalernissaat, taamaattumillu ilaasut Københavnimut tikinnermi ingerlaqqinnissamut nassataminnik  tunniusseqqittarnerat atorunnaassaaq. København-imulli tikinnermi mittarfimmi Transfercenterimi, tassa timmisartukkut angalasut aqqusaartagaanni,  ingerlaqqinnissaminnut ikissutissanik SAS-imut aallertarnerat allanngussanngilaq. Taanna mittarfiup iluani angalasut aqqusaartagaanniippoq akitsuutitaqanngitsunik pisiniartarfiup saniani.

Nassatat taamatut ingerlateqqinneqarnissaannut, Air Greenlandip Købehavnimut tikinneraniit, timmisartup ingerlaqqinnermi aqqutissap aallarfissaanut minutsit 45-uussapput. Tassa piffissaq eqqorlugu apuukkaanni,SAS-ip timmisartui Aalborg-imut ingerlasussat angumerineqarsinnaassapput.

Nassatat aqqutaa tamaat ingerlatinneqartalernissaannut isumaqatigiissutit soorunami aamma paarlattuanik, ullaakkut qallunaat nunaata iluani mittarfinniit Air Greenlandip Københavnimit nal. 09.00 aallarnissaanut atuupput. SAS-imi nassatanik tunniussinermi nunatsinni apuuffissamut aqqutaa tamaat ingerlasussanngorlugit nalunaaqutserneqartassapput, ilaasulli Københavnimut tikinnermi mittarfiup Transfercenteriani Novia-mut ingerlaqqinnissamut ikissutissanik aallertassapput. Taanna mittarfiup iluani angalasut aqqusaartagaanniippoq akitsuutitaqanngitsunik pisiniartarfiup saniani.

Kinguaattoortoqassagaluarpat, timmisartorluunniit ilaaffissaq inortorneqassagaluarpat allatulluunniit timmisartuussinerit pissusissamissut ingerlassanngikkaluarpata, Air Greenland aamma SAS arlamik ilaasui nassataalluunniit akisussaaffiginngilaat.

Nassatat ornitamut aqqutaa tamaat ingerlatinnissaannut Icelandair-imut isumaqatigiissuteqarneq
Air Greenlandi Icelandair-imut nassatat aqqutaa tamaat ingerlatinneqartarnissaannut isumaqatigiissuteqarpoq.
Nassatat ornitamut aqqutaa tamaat ingerlanneqassappata Keflavikimut tikinnermiit aallaqqinnissamut minnerpaamik minutsit 45-t piffissarineqassapput.
Aallalernermi nassatanik tunniussinermi ingerlaqqinnissamut uppernarsaat takutinneqassaaq. Ingerlaqqinnissamullu ikilernermut allagartaq Keflavik-imut tikinnermi tassani Transfer centerimi aaneqassaaq. Angalasussanut ingerlaqqittussanut kingusinaarluni tikissinnaanermut sillimmasiissummik pisisoqarnissaa innersuutigaarput.

Ilaasut tamarmik nassatat tunniunneqartut saniatigut tigummiaannakkanik nassataqarsinnaapput, taakkulu annerpaamik 55 x 40 x 23 cm-inik angissuseqassapput aammalu katillugit annerpaamik 8 kg-nik oqimaassuseqaqqusaallutik.
Akisunermi angalasut siunissami  55x40x23 cm-isut atsigisunik marlunnik timmisartumut eqqussassaminnik nassataqarsinnaalissapput.
Akikinnermi angalasut pisarnertut 55x40x23 cm-isut atsigisumik ataatsimik timmisartumut eqqussisinnaapput.
Nassatassat tigummiaannarneqartut ikiartornermi takutinneqassapput pisariaqarpallu oqimaalutarneqassallutik.

Pisarnertut angalasut nassatamik timmisartumut eqqussinnaasamik saniatigut pisiaminnik akileraaruteqanngitsunik tigumiarsinnaapput. Nassatat tigummiaannakkat sinneruttut timmisartup lasteqarfianut inissinnissaannut immitsinnut pisinnaatippugut.

Nakorsaatitit nassatannut tigummiaannakkannut ikigukkit ajunnginnerussaaq, taamaalillutit kinguaattoortoqarnerani ajornartorsiulissannginnavit.

Nassatavit tigummiaannagassavit poortunnginneranni imerpalasut tarnutillu nassarneqartarnerinut maleruagassat immikkut ittut maluginiarluaqqussavagut.

Nassatavit tigummiaannakkavit saniatigut nassarsinnaavatit:

• Arnap taskia mikisoq imaluunniit allattaaviit
• Kavaajaq imaluunniit qallersaat
• Assiliivik mikisoq imaluunniit qinngutit
• Tippi
• Angalanermi atuagassat
• Alanngittaat imaluunniit ajaappiaq

Isumannaallisaaneq eqqarsaatigalugu pigisat assigiinngitsut timmisartutsinnut ikininni nassarsinnaanngilatit. Una toorlugu, nassatannut tigummiaannakkannut ikillugit nassarsinnaanngisannut allattuivik ataatsimoortoq nassaarisinnaavat.

Tigummiaannakkannik nassataqarniarnak aalajangeruit, taava uku atuutissapput.

Ikiartornermi nassatatit uuttortarneqassapput, taakkulu akikinnermi angalaguit annerpaamik 20 kg-nik aammalu akisunermi angalaguit 30 kg-nik oqimaassuseqarsinnaapput. Tigummiaannakkannik nassataqarniarnak aalajangersimaguit aamma taakku atuutissapput. Meeqqat marluk inorlugit ukiullit nassatatut tunniussat 10 kg-t kiisalu aneerussiveeqqat patittakkat (paraply klapvogn) ataatsit akeqanngitsumik nassarsinnaavaat. (Takuuk ”Nassatat immikkut ittut).

Nassatatit apuuffissannut nalunaaqutserneqassapput, aammalu nalunaaqutsiussap assilinera nipitittagaq angalanissamut pilersaarutivit tunuanut nipitinneqassaaq. Nassatannut uppernarsaat nipitittagaq paarilluaruk, nassatatit kukkunikkut kinguaattoortinneqarpata tammarpataluunniit ujarlernermi atorneqartussaammat, tamatumalu saniatigut angalaninnut sillimmasiissutit atorfissaqartilerukku uppernarsaataasussaavoq
Nassatavit poortunnginnerini pigisat suut timmisartumut nassaqqusaannginnersut paasiniaqqullugit qinnuigissavatsigit. Nassatat tigummiaannartakkat assigalugit pigisat ilaat nassatannut tunniunneqartunut ilaatissinnaanngilatit, allattuiffik uani takuuk.

Air Greenland nassatanut aserujasunut asiujasunulluunniit imminut akisussaatissinnaanngilaq. Angalasussat aserujasunik, soorlu nipilersuutinik, aallaasinik qarasaasianilluunniit (laptops) nassarniartut pigisatik assartorneqarnerminni aserorsinnaajunnaarlugit qajannaatsumik poortussavaat.

Mittarfimmukannginninni nassatavit oqimaassusiinik uuttuinissaq tamatigut iluaqutaasinnaavoq. 20 kg-t aamma 30 kg-t sinnerlugit oqimaassuseqarpata, oqimaappallaarutip kg-anit siullermiit akitsuummik akiliisinneqassaatit. Akitsuut angallaviup ilaaffigisassavit akiata procentianut ataatsimut naatsorsorneqartarpoq.
Nassatatit 75 kg-t sinnerlugit oqimaassuseqartussaappata, aallannginnermi piffissaalluarallartillugu inniminniissaatit. Oqimaappallaanik nassataqarnissamut inniminniineq angalatitsivik angalanissannik inniminniiffigisat aqqutigalugu pissaaq, imaluunniit internettikkut websupport@airgreenland.gl aqqutigalugu angalanissannik innniminniisimaguit taanna aqqutigineqassalluni. Oqimaappallaanik nassataqarnissamut inniminniinermi kg-t amerlassusaat, pigisat amerlassusaat aammalu angissusiat (takissuseq x silissuseq x portussuseq) nalunaarutigissavatit. Timmisartut qulimiguullillu assigiinngitsut pisinnaasaat assigiinngitsuummata, piffissaalluarallartillugu oqimaappallaanik nassataqarnissamik inniminneeqqullutit inassuteqarfigissavatsigit. Oqimaappallaanik nassataqarnissamut inniminniinerit uppernarsaanermut atatillugu akilersinneqassapput.

Oqimaappallaanik nassataqarnissamut inniminniinerit taamaatittariaqalerukku, aallarfissaq pilersaarutaasoq ullut marluk tikillugit sioqqullugit akiliutigisimasatit soorunami utertinneqarsinnaapput, taakkunanngali sullissinermut akitsuut aammalu ullormut pilersaarutaasumik aallarfissamut ataatsimut akitsuut ilanngaatigineqassapput. 75 kg-t inorlugit oqimaappallaanik nassataqarnissaq siumoortumik inniminnerneqarsinnaanngilaq, ajornannginnersorlu aatsaat ullormi aallarfissami nassatanik tunniussinermi uppernarsarneqarsinnaalluni.