Air Greenland nunarsuarmi silaannakkut angallassisartut isumannaannersaannut ilaavoq, annertoorujussuarmilu isumannaallisaaneq pigaarput.

Timmisartuutileqatigiiffittut ukiut 50-t nunarsuarmi peqqarniinnerpaamik avatangiiseqartumi silaannartaqartumilu ingerlatsereerpugut, isumannaatsuunissarlu akigalugu iliuuseqanngisaannarluta.

Timmisartornissallu toqqissisimanarinngikkullu annilaangagaluguluunniit, tamanna timisartumi sulisunut oqaatigiuk, imaluunniit pisattanik tunniussininni, pitsaanerpaassaarlu angalatitsivik angalanissannik inniminniininni annilaangasarninnik ilisimatikkukku, taava tamanna allassimasuutigineqariissaaq.

Toqqaannaq nittartakkatsigut inniminniiguit Call Center–imut allagit inniminneriikkannut annilaangasarnerit allaqqullu.
Ilaasorisartakkatta pingajorarterutaasa missaat annilaangasarput, taamaattumik ilinnut iluassaaq kisimiinnginnerit ilisimassallugu.

Angalanissannut piareersajaarit, aallaleruit timikkut eqqarsaatikkullu stressinnginnerussagavit. Mittarfiliajaarit, taamaasillutimmi ilaasussat allat qanoq eqqissisimatigisut takusinnaassavat.

Timmisartornerup nalaani nipit allanartut tusaasarsinnaassavatit, tamakkuli timmisartup kigaallassarneranik aquutaataluunniit iluarsisarneranik imaluunniit assakaasut inissinnerinik anillatsinnerinilluunniit peqquteqarput. Nipillumi taakku suut tamarmik pissusissamissut ingerlanerinut qulakkeerutaasutut taaneqarsinnaapput.

Siumungaaq aamma atuakkanik atorniartarfinni tamani atorneqarsinnaasut atorlugit timmisartumi teknikkimut tunngasut timmisartornerullu qanoq ingerlasarnera paasiniarsinnaavat.

Air Greenlandip timmisartuutai pissutsini nalinginnaanngitsuni atorneqarnissamut sanaajupput – sulisugullu aamma taammaattoqarnissaanut ilinniagaqarlutik.

Silaannaap unerisimannginnera sajuppillattarnerillu nunatta iluani aammalu Kalaallit Nunaata Danmarkillu akornanni timmisartuussinerni takussaasarput.

Mannalu siunnersuutigissavarput: qinngakkut itisuumik naappit naqqa tikillugu ilummut anersaarit, kigaatsumillu silammut anersaarlutit, arlaleriarlutit taamatut iliorit. Anersaartornerit aqussinnaalerukku annilaanganerit aamma aqussinnaalissavat.

Aallartinnak aamma nakorsaq eqqissisaammik piniarfigisinnaavat. Air Greenlandimiit imigassaq annilaanganaveersaatitut inassutigisinnaanngilluinnarparput. Imigassammi eqqissisimannginnerit annilaanganerillu suli annertunerulersiinnarsinnaavaa.

Angalanissamik inniminniiguit issiavissannik toqqaaguit timmisartup qeqqanut qaninneq ”aisle” toqqaruk, ilorliuguit mattusimasutut misiginissat pinngitsoorniarlugu. 

Inassutigisinnaasarput pitsaanerpaaq aana: issiavinnut ingigit, qitequtaasat ikkuguk timmisartornissamullu toqqissisimanartumut isikkivigissorsuarmullu qilanaarlutit.