Air Greenlandimi pingaartipparput pitsaanerpaamik sullinneqarnermik misigisaqarnissat.

Illit nammineq pisariaqartikkukku, timmisartuutitsinnulluunniit ilaasussamik pisariaqartitsisumik nalunngisaqaruit, malugeqquarput angalanissamik pisininnut ilanngullugu angalaninni ikiorneqarnissamik inniminniisinnaagavit. On-linikkut toqqaannaq angalanissannik inniminniiguit, Air Greenland-i mailikkut websupport@airgreenland.gl piaartumik attavigissavat, kingusinnerpaamillu aallarfissaq nal.ak. 48-t sioqqullugu.

Makku immikkut ikiorsiiffigisarpavut

• Ilaasut innarluutilinnut, issiavinnik assakaasulinnik kaassuartakkanik angallassineq 
• Meeqqat kisimiillutik angalasut 
• Ilaasut meeraaqqamik nassartut, Airbus-imi Norsami meeraaqqanut babylift-i
• Ilaasut utoqqaat, nassataannik il.il. ikiortariaqarpata. 
• Ilaasut oqaatsinik ajornartorsiuteqarlutik sulisunut attaveqarsinnaanngippata, nutserissuttarpavut allatulluunniit ikiorlugit
• Ilaasut allanik peqquteqarlutik ikorneqarnissamik pisariaqartitsisut

Ikiorneqarnissamik pisariaqartitsinermut paasissutissat inniminniikkanni takuneqarsinnaassapput, nassatassanillu tunniussinini tamanna ersissaaq. Nassatassanik tunniussininni ikiortariaqassaguit ingerlaannaq ikiorneqassaatit.

Angalanissat aallartinniariarpat ornitanni stationi ikiortariaqarninnik paasitinneqassaaq, tikinnissannulu piareersimassaagut. Ornitannullu isumannaatsumik apuunnissavit tungaanut Malittariuassavatsigit.

Taamaattumik immikkut ikorneqarnissamik pisariaqartitsissaguit angalanissamik inniminniininni pisiffinnut tamanna ilisimatitsissutigissavat. Malugeqquarput sullissinerit ilaat allaffissornermut akiliutitaqarmata, aammalu timmisartuussinerit ilaatigut killilimmik neqerooruteqarfiusinnaammata.

Ilaasut issiavinnik assakaasulinnik kaassuartakkanik atuisut

Issiavinnik assakaasulinnik kaassuartakkanik atuisut taanna akeqanngitsumik nassatanut ilanngullugu tunniullugu nassarsinnaavaat. Issiavik poortoqqassaaq, aserunnginnissaa aseruinnginnissaaluunniit qulakkeerniarlugu. Issiaviup nassatassatut tunniutereernerani mittarfimmi taamaattumik atortoqarsinnaavoq. Issiavimmik assakaasulimmik kaassuartakkamik atuisuuguit, piaartumik tamanna uagutsinnut nalunaarutigissavat, tikinninni ikorneqarnissannut ingerlaqqinnissannullu upalungaarsimasinnaaqqulluta.

 Ilaasunut kaassuartakkamik pisariaqartitsisunut naalisaatit uku atorneqartarput.

WCHC-tut angalanermi isumannaallisaaneq peqqutigalugu Air Greenlandip piumasaqaatigaa ilaasup angalanermini ingiaqateqarnissaa, ingiaqataasullu ilaasoq ikiussavaa, assersuutigalugu perusuersartarfiliarnerani.

Tappiitsut

Tappiitsoq qimmimik ikiorteqaruni taanna timmisartup iluanut nassarsinnaavaa, taannali pituutaqassaaq aatsarnaveeqquteqarlunilu. Qimmeq issiavimmissinnaanngilaq, timmisartullu iluani aqqummik assiissanani. Pisariaqarpat qimmip nassarnissaanut akuersissummik piniartoqassaaq, tassa Danmark-imut tassanngaanniilluunnit ingerlassaguit. Ajornartorsiornak angalanissat qulakkeerniarlugu piaartumik attavigisigut.

Angalanerup nalaani nakorsaatit

Nakorsaatit angalanippit nalaani pisariaqartitatit tigumiaannakkatut nassatassaniitissavatit. Angalaninni silaannalersuummik pisariaqartitsissaguit aallarnissat sioqqutingaatsiarlugu tamatumannga nalunaarfigissavatsigut.

Københavnimi mittarfimmi immikkut ittumik ikiuineq

Issiavinnik assakaasulinnik kaassuartakkanik atuisunut pitsorluttunullu Københavnip mittarfianiit aallartussanut tikittussanullu Falck ikiuunnissamut piareersimavoq. Ikiorneqarnissaq angalanissamik pisiffiit aqqutigalugu inniminneerneqassaaq kingusinnerpaamik aallarfissaq nal.ak. 48-t sioqqullugu. Internettikkut inniminniinissamut periarfissaqaruit uani inniminneersinnaavat.

Eqqaamallugu paasissutissat uku piareersimassagakkit, timmisartup normua, ullut angalaffissat assigisaallu. Immersugassaq taanna aamma Københavnip mittarfianinngaaniit timmisartuutileqatigiinnut allanut ilaallutit ingerlaqqissaguit atorsinnaavat, assersuutigalugu nunanut kiattunut feeriarlutit angalassaguit. Ikiorneqarnissaaq aamma inniminneersinnaavat uunga mail-erfigaluta websupport@airgreenland.gl, eqqaamaqquarpullu ikorneqarnissamik inniminniineq aallarfissaq nal.ak. 48-t sioqqullugu pissammat. Angalasut meeqqisartut Københavnimi mittarfimmi ikiorneqarnissamik pisariaqartitsisut paasissutissanik uani pisinnaapput.

Julip 26-anniit Københavnimi mittarfimmiit angalasussat tamarmik 6 kr.-nik akiliisinneqartalissapput, EU-mi peqqussut 1107/06 tunngavigalugu ikiuisarnermut aningaasartuutinut tapiissutitut.