Angalanissaq sillimmasiissummut ilaatinneqartoq taamaatinniarukku uunga attaveqassaatit:

Air Greenland
PO Box 1012
DK-3900 Nuuk
Nalunaaqutserlugu: Napparsimanermi taamaatitsinissamut sillimmasiissut
Telefon: 34 85 70
E-mail: websupport@airgreenland.gl

Inniminniinermut normu ilisimatitsissutigiuk, aammalu nakorsamit nalunaarut imaluunniit qanigisap toquneranut uppernarsaat attuumassuteqartoq ilanngullugu nassiuguk.

1.1 Taaguutit
Malugalugu, oqaatsit naqinnerit uingasut atorlugit allanneqarsimasut imm. 2.6-imi nassuiarneqarmata.

1.2 Sillimmasiissut kikkunnut atuuppa?
Inunnut angalanissamut uppernarsaammi allassimasunut. Inuit ataasiakkaat matuma kingorna sillimmasiisunik taagorneqarput.

1.3 Piffissaq sillimmasiiffiusoq
Sillimmasiissut akilerneqarnermini ullormit pisiffiusumiit aallarnissap tungaanut atuutissaaq. Sillimmasiinermulli uppernarsaammi piffissaq atorunnaarfiusussaq alla allassimasinnaavoq.

1.4 Sillimmasiissut piffissap qanoq ilinerani pisiarineqassava?
Sillimmasiissut aallarnissamik inniminniinermi pisiarineqassaaq, kisiannili kingusinnerpaamik angalatitsivimmut/timmisartuutileqatigiiffimmut qularnaveeqqutissap akilerneqarnerani pissalluni.

1.5 Sillimmasiinerup nalinga
Sillimmasiinerit nalingi sillimmasiinermi allagartami, peqataanermut uppernarsaammi aamma/imaluunniit piumasaqaatini allassimasut Europami taarsiisussaatitaanerup annertussusissaanut killiliisuupput. Europami ajoqusertoqarnerani ataatsimi taarsigassatut pisussaaffiliussat DKK 1.000.000 koruunit sinnersinnaanngilaat, ajoqusertoqarnerani sillimmasiinermut allagartaq ataaseq amerlanerusulluunniit pineqarnerat apeqqutaatinnagu.

1.6 Ajoqusernerit suut sillimmasiissummit matussuserneqartarpat?
Sillimmasiissut matussusiisussaavoq, sillimmasiisoq aallarsinnaanngippat, imaluunniit angalanermik naammassinnissinnaanngippat, uku pissutigalugit

1.    sillimmasiisoq, angalaqataasussaq imaluunniit ilaqutaasut ilaat toquppat, tassanngaannartumilluunniit napparsimarujussualerpat (angalaqataasussaq ataaseq innersuussutigalugu amerlanerpaamik sillimmasiisut pingasut angalanissamik taamaatitsisinnaapput)
2.    sillimmasiisoq ilinniartitaanermi tapiiffigineqarsinnaasumi ilivitsumi soraarummeernermik naammassinnissimanngippat imaluunniit tassanngaannartumik napparsimajussuartoqalernera pissutigalugu soraarummeernissamut ilaasinnaanngippat, taamaattumillu sillimmasiisoq soraarummeeqqittussanngorpat. Angalanissap piffissap soraarummeerfiusussap nallinnginnerani pisiarineqarsimanissaa, aammalu soraarummeeqqinnerup piffissap angalaffiusup iluani, imaluunniit angerlamut aallarnissaq pilersaarutaasoq sapaatit akunneri marluk tikillugit sioqqutsisumik pinissaa piumasaqaatigineqarpoq,

1.7 Aningaasartuutissat suut sillimmasiissummit matussuserneqassappat?
Sillimmasiissut piffissami sillimmasiiffiusumi angalanissaq taamaatinneqarpat, angalanissamut piumasaqaatit nalinginnaasut malillugit angalatitseqatigiiffiup/timmisartuutileqatigiiffiup piumasaqaataanut matussutissatut sillimmasiisup akilersimasaanut matussutigineqassaaq – taamaattorli annerpaamik sillimmasiinerup naliliunneqartut tikillugit.

1.8 Atuutsitsiviunngitsut/killiliussat
Atuutsitsiviunngitsut:
Nappaat imaluunniit ajoquserneq, angalanissamik taamaatitsinermut pissutaasoq sillimmasiinermi atuutereersimappat sillimmasiissut matussusiisinnaanngilaq.

Killiliussat:
Inuk angalanissamik taamaatitsinermi pissutaasoq 75-inik ukioqalersimappat, sillimmasiissutip nalingata annertunerunera apeqqutaatinnagu ingerlatseqatigiiffiup taarsiinissamut pisussaaffii inummut ataatsimut annerpaamik DKK 20.000 koruuninut killilerneqarput.

1.9 Angalanissamik taamaatitsineq
Ajoqusertoqartillugu sillimmasiisup erngerluni aammalu kingusinnerpaamik piffissami aallarfissatut pilersaarutigineqartumi angalatitsivik/timmisartuutileqatigiiffik ilisimatissavaa. Piffissap aallarfissap kingorna angalanissamik taamaatitsisoqarnerani sillimmasiissut matussusiisinnaanngilaq.

1.10 Ajoqusertoqarnerani pissutsit atuuttut
Angalanissamik taamaatitsinissat kissaatigigukku, piaarnerpaamik angalatitsivimmut/timmisartuutileqatigiiffimmut attaveqaqquneqarputit. Tamatuma kingorna ajoqusertoqarneranut nalunaarut matuma kingulianiittoq immersussavat atsiussallugulu, taannalu angalatitsivimmut/timmisartuutileqatigiiffimmut nassiutissavat, tassungalu angalanissamut uppernarsaatip naqeqqaarnera kiisalu taamaatitsinermut pissutaasumut uppernarsaat, matuma kinguliani nassuiarneqartoq ilanngutissavatit:

•    Napparsimasoqarnerani nakorsamit nalunaarut matuma kingulianiittoq inummit angalanissamik taamaatitsinermi pissutaasumit kiisalu nakorsarisamit immersorneqassaaq.
•    Ajoqusertoqarnerani napparsimmavimmit imaluunniit nakorsamit passussisuusumit uppernarsaasoqarnissaa pisariaqartinneqarpoq.
•    Toqusoqarnerani toqusumut uppernarsaatip saqqaata assilinera nassiunneqassaaq.
•    Tillinniartoqarnerani ikuallattoqarneranilu politiip nalunaarutaata imaluunniit politiinut nalunaaruteqarnermi uppernarsaatip assilinera nassiutissavat. Napparsimasoqarnerani angalanissamik taamaatitsinermi napparsimasup taassumalu nakorsaata piaarnerpaamik nakorsap nalunaarutaa matuma kingulianiittoq immersussavaat.

2 AALAJANGERSAKKAT TAMANUT ATUUTTUT

2.1 Marloriaammik sillimmasiisarneq
Sillimmasiissut taarsiinissamut piumasaqaatinut, sillimmasiissummit allamit matussuserneqartussanut atuutinngilaq.

2.2 Piumasaqaatit
Sillimmasiissut manna naapertorlugu akiliisoqassappat, tamanna pillugu pisinnaatitaaffitit tamarmik Europæiske-mit isumagineqassapput.

2.3 Maalaaruteqartarfik
Angalanissamik taamaatitsinissamut sillimmasiissut pillugit apeqqutissaqarnermi una saaffigineqassaaq: Call Centeret.

Air Greenland peqatigalugu naammaginartumik aaqqiisoqarsinnaanngippat, uunga attaveqassaatit:
Ankenævnet for Forsikring
Anker Heegaards Gade 2
1572 København V
Tlf. 33 15 89 00 (Nal. 10.00 aamma 13.00 akornanni)

2.4 Eqqartuussivilersuussisarneq inatsisillu toqqarneqartut
Europæiske pillugu eqqartuussisunut suliassanngortitsinermi Københavnimi Danmarkimiittumi Byretten-imut imaluunniit Østre Landsret-imut suliassanngortitsisoqartassaaq. Sillimmasiissut manna tunngavigalugu aaqqiagiinngissutit danskit inatsisaat naapertorlugit aalajangiiffigineqartassapput.

2.5 Naqissusiinermut akitsuut
Naqissusiinermut akitsuutini naqissusiisarnermut inatsimmi §70 tunngavigineqassaaq.

2.6 Nassuiaatit
Sillimmasiissummut matumunnga matuma kinguliani allassimasut atorneqassapput:
•    Tassanngaannartumik napparsimasoqalernera.
Tassanngaannartumik napparsimasoqarnera matussusiinissamut pisinnaatitaaffeqarfiusoq tassaavoq nappaat nutaamik takkuttoq, qanimanartulimmik napparsimasoqarneranik pasitsaassineq nutaamik takkuttoq, imaluunniit nappaammi atuuttumi nappaammilu katsorsarneqarsinnaanngitsumi naatsorsuutiginngisamik ajornerulersoqarnera.
•    Ilaquttat.
Ilaquttat tassaapput sillimmasiisup aappaa, inooqataa, meerai, ernutai, meeraasa appaat, angajoqqaat, aappap angajoqqaavi, qatanngutit angajoqqaat angajoqqaavi aappaasup qatanngutai arnat angutilluunniit.
•    Angalaqatissaq.
Angalaqatissaq tassaavoq  inuk sillimmasiisup angalaqatissaatut angalanissamut uppernarsaammi/bilitsimi allassimasoq, imaluunniit ataatsimoorluni angalanissaq siunertaralugu angalaqatissatut allassimasoq.