Ilulissat

Timmisartumik Ilulissiaruit iluliarsuit, sermit iigartartut oqaluttuarisaanermullu tunngassutillit misigissavatit.

Ilulissanut timmisartumik tikikkiartorninni isigisaq tupinnaannartoq misigissavat – sumummi qiviaraanni iluliarujussuit qaqqoriit takussaapput.

Ilulissat Kangiat – nunarsuarmi eriagisassat ilaat
Illoqarfimmiit 40 km-nik ungasissusilimmi kangerluup qinnguani nunarsuup avannarliup sermiisa iigartartut tusaamasaanersaat, Sermeq Kujalleq, ippoq. Ilulissaruit assissaqanngitsumik misigisaqarnissannut periarfissaqarputit, tassa kangerluk ilulissanik aniatitsisoq immikkut illuinnartoq, 2004-mi UNESCO-p nunarsuarmi eriagisassanut allattorsimaffianut ilanngunneqartoq, takussagakku.

Qulimiguulimmut ilaallutit sermersuaq naapigiaruk. Angallammut ilaallutit kangerluup paavanukarit, seqernullu pukkilisup qinngornerisa ataanni iluliarujussuarnit unguneqarneq misigiuk. Nammineerlutilluunniit Sermermiunut, iluliarujussuarnut isikkivilerlutit, ukiut tuusintit arlallit matuma siorna inoqarfiusimasumut pisuttuarit.  

Ilulissanut bilitsit akisunngitsut atorlugit Kalaallit Nunaanni immikkorluinnaq ittumik misigisaqarit. Ilulissat Kalaallit Nunaanni illoqarfiit annersaasa pingajoraat, qaasuitsullu killeqarfianit 400 km-nik avannarpasinnerugami aasaanerani nal.ak. 24-it taarsissanani qaamaannavittarpoq.

Ataatsimeersuarnerit ullutsinnut naleqquttut aamma illut oqaluttuarisaanermut tunngasut
Ilulissat aamma Kalaallit Nunaanni ullutsinnut naleqquttunik atortoqarluni politikerinut, suliffeqarfinnut kattuffinnullu  ataatsimeersuarnissamut allanilluunniit aaqqissuussinissamut periarfissiipput.

Tassungalu ilanngullugu oqaluffiup talittarfiullu eqqaaniittut illut 1700 aamma 1800-kunneersut takusassaapput, aammalu  issittumi ilisimasassarsiortup tusaamasap Knud Rasmussen-ip inunngorfia alliartorfialu katersugaasiviuvoq. 

Ilulissani qimussimik angalaneq misigiuk
Ilulissiaruit aamma paasissavat innuttaasut amerlaqatingajaannik qimuttunik qimmeqartoq. Amiinnarnik atisaqarlutit qimussernissamut periarfissaq maanngaannartinniaqinagu.

Københavnimiit timmisartorluni Ilulissiaraanni Kangerlussuarmiit timmisartumik allamik ingerlaqqittoqartarpoq. Tassanngaannillu sapaatip akunneranut arlaleriarluni Ilulissanut toqqaannaq, ilaatigullu Aasiaat aqqusaartarlugit, timmisartoqartarpoq.