Air Greenland Kalaallit Nunaanni Timersoqatigiit Kattuffiannut pingaarnertut aningaasaliisoq

Air Greenland Kalaallit Nunaanni Timersoqatigiit Kattuffiannut aningaasaliisutut pingaarnertut isumaqatigiissummik atsiorpoq timersortartuttalu 2018-imi nunani issittuni unammiuaarnissani (Arctic Winter Games/AWG) South Slave-imi pisussani Canadami Yellowknife-imut uterlugulu angallassissalluni.

Timmisartortitseqatigiit pingaartumik timersornermut kulturimullu tunngasunut aningaasaliisarneq qangaaniilli ileqqoraat, timmisartortitseqatigiillu AWG-imut aalajangersimasumik tapersersuisuupput. Siorna Kalaallit Nunaata AWG-mut aaqqissuisuunerani Air Greenland Kangerlussuup Nuullu akornanni sila pitsaavallaanngikkaluaq timmisartukkut angallaffimmik iluatsilluartumik pilersitsivoq aaqqissuussillunilu. Taamaammat timersortartunik taama amerlatigisunik angallassinermut atatillugu ataqatigiissaarinermik taama annertutigisumik suliaqarneq takornartaanngilaq.

Air Greenland-imi niuernermilu pisortami Maliina Abelsen-imi qiimmaallanneq maluginngitsooruminaappoq:

- Nunatta timmisartortitseqatigiiffiatut kingumut pingaarnertut aningaasaliisuunissarput Timersoqatigiillu Kattuffiannik tassanilu timersortartunik suleqateqarnitta ingerlateqqinnissaa tulluusimaarutigaarput. Kalaallit Nunaannut pitsaanerusunik sinniisoqanngilaq, taamaammat peqatigiilluta Kalaallit Nunaata nittarsaannissaa nuannaarutigaarput Maliina Abelsen oqarpoq.

 

Aningaasaliinissamut isumaqatigiissut Timersoqatigiit Kattuffiat peqataasullu 175-it Airbus-imik Dash-8 -millu Kangerlussuarmut kingornalu Yellowknife-imut uterlugulu attartornerannik akikillisaaneq minnerpaamik 1.000.000 koruuninik naleqarpoq.

- AWG-imi Kalaallit Nunaata peqataanera nunatsinni sumiiffinni assigiinngitsuni klubbini pimoorussinermik annertuumik piumasaqaatitaqarpoq. Air Greenland-ip timersornermut immikkullu AWG 2018-mut aningaasaliissutaasigut meerartatta inuusuttattalu piginnaasalittaminnik naleqartitanillu peqqinnartunik inerisaanissaat periarfissinneqarpoq, Nuka Kleemann, Kalaallit Nunaanni Timersoqatigiit Kattuffianni siulittaasoq oqaluttuarpoq imalu nangilluni:

- Nunarput tamakkingajallugu inuusuttut timersortartut 175-it South Slave-imi katersuutissapput timersuutinilu ilaatigut makkunanni unammissallutik: sulorarneq, futsal, nerrivimmi arsaararneq, issittumi timersuutit/arctic sport, dene games, volleyball, snowboard freestyle ujakkaarnerlu. Alpin tamatumuuna programmimi ilaanngilaq. Saamit 2018-imi AWG-mi aamma peqataassapput uagullu aallartitagut peqatigalugit angalassallutik.