Air Greenlandip US Air Force-mut isumaqatigiissut pissarsiareqqippaa

”US Air Force-mut isumaqatigiissut ingerlatsivitsinnut pingaaruteqartorujussuuvoq, timmisartuutigummi atorluarnerusinnaagutsigit, tamanna ingerlatseqatigiiffimmut sullitatsinnullu pitsaanerusunik kinguneqartussaavoq”, pisortaaneq Jacob Nitter Sørensen oqarpoq nangillunilu: ”Isumaqatigiissutinik pissarsinivut tamaasa Air Greenlandip isumannaallisaanikkut, akitigut tunisassiatigullu unammillersinnaanera takutinneqartarpoq, tamannalu ingerlatseqatigiiffittut ingerlanitsinnut pingaaruteqarluinnarpoq. Tamatuma saniatigut suleqativut qutsavigerujussuarpagut – ingerlatseqatigiiffiup unammillersinnaaneranut pingaarutilimmik kiffartuussinerup qaffasinnissaa sullissinerullu isumannaannissaa qulakkeertarpaat.

US Air Force-mut isumaqatigiissut ukiuni tallimani, tassalu 1. Januar 2019-imiit 31. December 2023-mut atuuttussaavoq. Tunngaviusumik ukiut ataasiakkaarlugit atuuttussanik, sisamariarluni ukiumik ataatsimik sivitsorneqarsinnaasunik isumaqatigiissusiortoqartarpoq.

Isumaqatigiissummut kingullermut naleqqiullugu timmisartuusseriaaseq allannguuteqassanngilaq, tassalu ingerlatseqatigiiffiup timmisartua Airbus A330-200 atorlugu 14-eriarluni aammalu Dash 8-200 atorlugu 26-eriarluni timmisartuussisoqassaaq.