Inuinnarnut SAR-imut upalungaarsimatitsineq pillugu isumaqatigiissut sivitsorneqarpoq

Sakkutuut Atortunut Pisiniartarnermullu Aqutsisoqarfiata (FMI) Air Greenlandillu Kalaallit Nunaanni Search and Rescue-mut (SAR) qulimiguulimmik upalungaarsimatitsineq atuuttoq 31. september 2018-imut sivitsorpaat. Taamaalilluni aamma 2018-imi SAR-imut qulimiguulik Issittumi Sakkutooqarfimmut atugassiissutigineqarpoq.

”Issittumi Sakkutooqarfiup Air Greenland Kalaallit Nunaanni qulimiguulimmik upalungaarsimatitsineq pillugu pitsaasumik iluarisimaarnartumillu suleqatigaa. Tamanna ilaatigut Nuugaatsiami qarsutsisoqarneranut atatillugu annaassiniarnermi erserpoq”, Issittumi Sakkutooqarfimmut pisortaq generalmajor Kim Jesper Jørgensen oqarpoq.

Taamaalilluni isumaqatigiissutip imaa, 1. januar 2016-imiit 31. december 2017 ilanngullugu atuuttoq allamik allannguuteqartinneqarani ukiumik ataatsimik sivitsorneqarpoq.

 

Inuinnarnut SAR-imut upalungaarsimanermut qulimiguulik S61, Kangerlussuarmit aallaaveqartoq piareersimatinneqarpoq, taannalu ukiup ulluini 365-iusuni tamani ullup unnuallu ingerlanerani nal. ak. 24-ni, sap. ak. ulluni arfineq marlunni piareersimasuuvoq. Qulimiguulimmik Bell 212-imik, Qaqortumit aallaaveqartumit taperserneqartarpoq, taannalu ukioq kaajallallugu ullup unnuallu ingerlanerani nal. ak. 8-ni, ataasinngornermiit arfininngorneq tikillugu piareersimasuuvoq. Qulimiguullit marluusut amooruteqarput, taamaalillutillu immap qaaniit, umiarsuaniit/umiatsianiit, qunnernit itisuuniit qaqqallu qaannit tikikkuminaatsuniit inunnik tigusisinnaapput. Inuttat, nalinginnaasumik tassaasut pilotit marluk, mekanikeri ataaseq amooruserisorlu ataaseq sianerfigitinnerminniit sivisunerpaamik nal. ak. ataatsip iluani sulilersinnaasussaapput.

 

Air Greenlandimi annaassiniarnernut sunulluunniit immikkut sungiusartoqartarpoq, aammalu Issittumi Sakkutooqarfiup sungiusartitsinerinut tamanut peqataanissamut piareersimasarluni. Taamatut sungiusartarnerni sullissinernilu suleqatigiinneq inuiaqatigiinnut kalaallinut tamarmiusunut iluaqutaasumik upalungaarsimaneruvoq.

”Sulisut immikkut suliaqartitat, kusanarluinnartumik maniguullutillu sulisut, aammattaaq ataatsimut isigalugu ingerlatseqatigiiffimmi qulimiguullit pigisatta piginnaaneqarnerinik annertunerulersitsisut suliaminnik pingaarutilimmik tassannga nangitsinissamut periarfissinneqarmata, Air Greenlandimit nuannaarutigaarput tulluusimaarutigalugulu”, Air Greenlandimi Chief Commercial Officer Maliina Abelsen oqarpoq.

Issittumi Sakkutooqarfimmiit 2018-imi qulimiguulinnik upalungaarsimatitsinermi Air Greenlandip suleqatigineqarnerata nanginneqarnissaa qilanaaraarput”, generalmajor Kim Jesper Jørgensen naggasiullugu ilaliivoq.