Kalaallit Nunaat – issittumi misigisassarsiorfik asseqanngitsoq

Septembarip ulluisa 18-anniit 21-annut Vestnorden Travel Mart ukiumoortoq Nuummi ingerlanneqassaaq, tassanilu Air Greenlandip angalatitsisarnermi sooq Kalaallit Nunaat issittumi misigisassarsiorfittut asseqanngitsuunera pillugu suliani ingerlateqqissavai.

”Air Greenlandip nunani tamalaani niuerfinni takornariat Kalaallit Nunaannut pilerisaarneqarnerat suliniutigaa, tassanilu Issittumi ornigassat allat, soorlu USA, Canada aammalu Skandinaviami nunat annertuumik unammileqatigaagut. Kisiannili Kalaalit Nunaata nunataa isorartuujuvoq asseqanngitsunillu amerlaqisunik misigisassarsiorfiusinnaalluni, aammalu angallannernik nuisitsinermik imatumik ittumi – nunatsinni pisumi – tamannarpiaq pillugu erseqqissaanissamut periarfissaqarpugut”, niuernermut pisortaq Maliina Abelsen oqaluttuarpoq.

 

Vestnorden Travel Mart-imi takornariartitsisartut kalaallit Kalaallit Nunaata neqeroorutigisinnaasaanik takutitsinissamut periarfissinneqarput, taamaattumillu Air Greenlandip suliniuteqarnera aamma annertuvoq.

 

”Air Greenland Vestnorden Travel Mart-imut aningaasaliivoq, tamatumalu saniatigut angalaarnernut marlunnut angalatitsisuussaagut, sunarpiaq Kalaallit Nunaannut tuniniassaneraat takutinniarlugu. Siorna takornarianut tunisassiaq Issittumi qalersaq, takornarianut tunisassiatut – sullissinermi ataatsimoortumi – asseqanngitsuusoq atulersipparput, tassanilu takornariat Ilulissani Kangia, Kangerlussuup nunataa alianaatsoq Nuullu issittumi illoqarfissuaq misigisaqarfigisinnaavaat. Issittumi qalersaq pillugu tusarliussisussat ineriartortitsinermillu ingerlatitseqqinnissaq qilanaarisorujussuuakka.” Maliina Abelsen oqarpoq.

 

Marlunngornermi septembarip ulluisa 19-anni Vestnorden Travel Mart-imi ataatsimeersuarneq Hotel Hans Egede-mi ingerlanneqassaaq, pingasunngornermilu septembarip ulluisa 20-anni angalatitsinernik nuisitsivik Inussivimmi ammarneqassaaq. Tassani Air Greenlandip pulaartut ilaatigut virtuel reality-mut isarussat, Dash 8-mut ilaalluni nunap iluani timmisartornermik aammalu AS350-imut ilaalluni attartortitsilluni takornariartitsinermik takutitsiviusut atorlugit saqqummiussivigissavai.

 

Paasissutissat

North Atlantic Tourism Association (NATA) suliniaqatigiiffiuvoq, nunani avannarlerni killerni: Kalaallit Nunaanni, Islandimi Savalimmiunilu takornariaqarnermik siuarsaaffiusoq tapersersuisorlu.

NATA Vestnorden Travel Mart-imik, 1986-imili aallartissimasumik piginnittuuvoq pingaarnertullu qaaqqusisuulluni, tikeraartitsisullu nunat pingasuusut akornanni paarlakaattarput.

NATA nunarsuup immikkoortuata iluani suleqatigiinnernut, joint ventures-inut kulturikkullu aveqatigiinnernut tapiissuteqartarpoq. NATA nunani avannarlerni killerni pilerisaarinerit ataqatigiissarneqarnissaannut kaammattuisuuvoq, aammalu takornarianut sullissinerit pitsaassusaanik pitsannguinissamut, nunallu peqataasut akornanni suleqatigiinnik nukittuunik pilersitsinissamut ikiuuttarpoq.