Nerisassat kissalaartut uteqqissapput

Air Greenlandip marsimi februaarimilu Imarpik qulaallugu timmisartuussinerni nerisassat nutaat, tassalu sancwich ataaseq, naatitaq ataaseq aamma myslibar ataseq, misilerarpai. Piffissami tassani ilaasut nerisassat suut piumanerunerlugit taasissutigisinnaavaat. Maanna taasinerit kisinnerini ilaasut quliugaangata qulingiluat nerisassat kissalaartut piumanerugaat paasineqarpoq.

Kiffartuussinermi malitassamik taassuminnga allannguineq eqqumaffigineqartorujussuuvoq, aammalu allannguineq kiffartuussinermik ajorseriaatitut atuisut misigisimagaat ersarippoq. Siunertaasorli illuatungaanoortuuvoq, tassami ilaasut amerlasuut maalaarutaat nerisassanut kissalaartunut tunngasimavoq, taamaattumillu sandwich nerisassanik pitsannguiniarnermut misiligutaalluni.

”Taasinerit inerneri ersarissorujussuupput, neriorsuutigisatsitullu ilaasut tusaaniarpagut. Taamaattumik nerisassat kissalaartut uterfigineqarnissaat aalajangiunneqarpoq, tamannalu suliassat eqqarsaatigalugit 1. juni 2018 aallarnerfigalugu pisinnaavoq. Ilaasut amerlanersaasa sandwich piumanngilaat, panerlunilu qallersuuteqarpianngitsutut misigisaramikku. Suliap ingerlanera tamakkerlugu soorunami atuisut tusaaniarpagut, aammalu pilersuisorput Gate Gourmet suleqatigalugu nerisassat ingerlaavartumik ineriartortinniarsimallugit. Kisiannili taasinerit inerneri ersaripput,” attaveqaqatigiinnermut pisortaq Katrine Hjelholt Nathanielsen oqarpoq nangillunilu:

”Aamma pitsaasunik akissuteqartoqarpoq. Pingaartumik atuisunit nerisassanik laktose-qanngitsunik gluten-eqanngitsunillu toqqaasoqarsinnaanera nuannarineqarpoq, taamaattumillu siunissami nerisassat kissalaartut aamma taamatut periarfissaqarnissaat isumaginiarparput.”

Atusunit amerlasuut aamma kalaaliminernik nerisassaqarsinnaanissaq apeqqutigaat. Tamanna misissuiffigineqarsimavoq, kisiannili pilersuisunik, kalaaliminernik ukiumut 30 tonsit missaannik isumannaatsumik pilersuisinnaasunik nassaartoqar-sinnaasimanngilaq. Tamatuma peqatigisaanik silaannakkut angallassinermi neri-sassanik tunisassiornermut, passussinermut isumannaassutsimullu inatsisitigut piumasaqaatit, pilersuisunit malinneqartussat qaffasissorujussuupput.