Air Greenland aqqutigalugu PANAM 2018 sioqqullugu nalaanilu eqqugassangaatsiarsuit

Air Greenland aqqutigalugu PANAM-imut isissutissanik eqquigit

Minik Akulu peqatigalugit Kalaallit Nunaanni assammik arsarlutik tricksiliullaqqinnerpaat ujarpagut. Aku Minillu pillugit isiginnaagassiaq uani takuuk, qanorlu iliornissat paasillugu.

Aku Minillu naliliissapput, tricksinillu torrallaanerpaat unammisaqattaarnerni Kalaallit Nunaata unamminissaanut isissutissanik pinnatsissavaat. Torrallaanerit, tackling, stregimut tunniussineq allaluunniit panam@airgreenland.gl-imut nassiukkukku makitsinermi ilaassaatit. Eqquisussaq kingusinnerpaamik ulloq 10. juni nassaarineqassaaq.

 

Air Greenland aqqutigalugu PANAM 2018-imi finalemut isissutissanik eqquigit

Aappaluttunik atisaqarlutit PANAM-imi unammisunik isiginnaariarlutit finalemi isissutissanik VIP-nik pinnannissamut unammeqataagit. Air Greenlandimit kikkulluunniit aappaluttunik atorlutik isiginnaariarnissaat kajumissaarutigaarput. Aappaluttorpassuugutta nuannernerussaaq, aammalu unamminerni isigiuminarsaataassalluni.

Isiginnaariarninni aappaluttumik atisaqarlutit assileriarlutit Facebookimut #airgreenland-imik nalunaaqutserlugu ikkuguk, imaluunniit panam@airgreenland.gl-imut nassiuguk, taava finalemi isissutissanik pinnannissamut unammeqataassaatit. Ajugaasoq tallimanngornermi junip 22.-ni 2018 makinneqassaaq.

 

Air Greenland aqqutigalugu angalanissamut gavekortimik eqquigit

PANAM-ip nalaani Nunatsinnit unammisartut aallarniutaasumik unamminissai sisamaasut sioqqullugit isiginnaariaruit Air Greenlandip straffertitsilluni unammisitsinerani peqataasinnaassaatit. Unammisitsinermi finalemut ingerlaqqittoqassaaq, finalemilu ajugaasoq angalanissamut gavekortimik DKK 10.000-inik nalilimmik eqquissaaq. Timersortarfimmi nal. 18:45-p 19:15-illu akornanni Air Greenlandip nittarsaassivianut ornigullutit unammisitsinermut allagartamik aallerit. Nal. 19:20 måleriartussat pingasut makinneqassapput. Unammisitsineq pissaaq nal. 19:30.

Isiginnaariat unammisut taakku pingasut quleriarlutik måleriassapput, pointinnannerpaarlu finalemut anngutissaaq. Straffeqattaarluni finale ingerlanneqassaaq sisamanngornermi juunip 21.-ni nal. 19:30.