Poul Egedep Illua Ilimanamiittoq EU-mi Kulturikkut Kingornussanut nersornaammik pissarsivoq

Realdania By & Byg nunaqarfimmi Ilimanami illutoqqanik 1700-kkorneersunik marlunnik: Ajoqersuisup Poul Egedep Illuanik quersuarmillu iluarsaassinertik pillugu Europa-mi Ataatsimiititaliarsuup kulturikkut kingornussassanut nersornaasiuttagaanik ataqqinernarpaamik – Europa Nostra-mi nersornaat 2018-9imik – pissarsitinneqarpoq.

Illutoqqat eqqissisimatitat marluk taakku Kalaallit Nunaanni nunasiaataanerup nalaani illutoqqat allanngutsaaliukkat eqqissisimatitallu pisoqaanersaaraat. Illutoqqat Realdania By & Byg-ip 2013-imi pisiarai aammalu 2017-imi juunimi illut tamanit atorneqarsinnaalerlutik piareerput. Niuertup illua maanna neriniartarfittut isersimaartarfittullu atorneqarpoq. Quersuaq ataatsimeersuarnernut aammalu iluarsaassinermeersunik saqqummersitsivittut atorneqarpoq.

 

”Ukioq manna, Kulturikkut Kingornussanut Nersornaat / Europa Nostra-mi nersornaat pilluaqqusingaarlunga ”kulturikkut kingornussassanut pissartanut” tunniuppara, Plácido Domingo, operanik erinartortartoq tusaamasaq aamma Europa Nostra-mut siulittaasoq oqarpoq.

 

”Nersornaasikkagut kulturikkut kingornussatta siulitsinnit eqqaamasatsinniit ungasinnerusumut suliaqarsinnaanermut uppernarsaataapput; tamanna maanna inuunitta siunissamullu isumalluutissatta paasinissaanut matuersaataavoq. Taamaattumik Europami Kulturikkut Kingornussassanut Ukiorititaq ataatsimoorluta kulturikkut kingornussassatta nalingisa Europap siunissaanut atorneqarsinnaanerannut akuersaarnissamut atussavarput,” Plácido Domingo oqarpoq.

Kulturikkut Kingornussanut Nersornaat / Europa Nostra-mi nersornaat 2002-mi Europami Ataatsimiititaliarsuarmit pilersinneqarpoq, taakkunanngaanniillu kulturikkut kingornussassanik piujuartitsinermi, ilisimatusarnermi, aqutsinermi, nammineq piumassutsimik sulinermi, ilinniartitaanermi attaveqaqatigiinnermilu suliat nalliuttorsiutigineqartarput.