Qimussit

Qimussit perlaavi illinikkoortut, qimmit pamiui aalataartut siuninni, qimussiussisup naalakkiutai naatsunnguit erinnatut silaannarmi tusarsaasut. Qimusserneq puigugassaanngilaq.

Ulloriaq driving his sled dogs near Sisimiut in Greenland. Photo: Mads Pihl, Visit Greenland

Ulloriaq driving his sled dogs near Sisimiut in Greenland. Photo: Mads Pihl, Visit Greenland

Apummi qallorissumi angalaneq 

Qamutit perlaavi apummi, qimmit qiluppaluannik ingiorneqarneq nipaassuserlu.
Perlaat nipaqaratik aputikkut ingerlaartut, qimmit qiluttut nunarsuarlu ataqqinarpassissoq talerpimmut saamimmullu siunerfigalugu. Issi sorluunni qasilliisitsilaarpoq, soqutaavali puigugassaanngitsumik misigisaqaraanni? Qimussiussisup qimmit tamaasa aalajangersimasumik naalakkiuteqarluni aqussinnaavai. Ilaasoq eqqissilluni ingitsitersinnaavoq misigisaatinilu tamaasa immerlugit.

Qimussimik angalanissat assigiinngitsut nal. akunnialunniit ullut arlerlugit, illuaqqani tupernilu unnuinertalerlugit, inniminnerneqarsinnaapput. Suut tamarmik isumagineqartarput – taqussaniit atisat ilorrisimaarnarlutillu oqortut isumagineqartarput. 

Sermimut iigartartuusimasumut ullut marluk qimusserneq ilaatigut innersuussutigisinnaavarput. Ilulissaniit Akinnaq aqqusaarlugu Nalluarsummut- sermimut iigartartumut isikkivilimmut - angallassisoqartarpoq. Tassaanngaannit qimussit iluliarsuit akunneqquallugit siku issusooq aqqusaarlugu ingerlaartarput. Ilaqqittariaqarpa?

Ilisimasassarsiorpalaartumut angalaqataarusukkussi Kangerlussuup Sisimiullu akornanni angalaqataasinnaavusi. Angalaneq illuaqqani tupernilu unnuinertalik, ullunik pingasunik sivisussuseqarpoq. Suleqatigiinnut ilaasutut nerisassioqataallusilu qamutit atortussanik usilersorlugit piareersaaqataassaasi, qimminillu nerisitseqataallusi.

Aasaanerani Qeqertarsuup Tunuanut pigussi, seqernup kaaviinnarnerata nalaani aamma qimussersinnaavusi. Uunartuarsuup qeqqata Sermianut Qeqertarsuarmut nalissaqanngitsumik isikkivilimmut qimussiussisoqartarpoq.

Kalaallit Nunaanni apummi qeraarpalaartumi qimmit pilereqisut aqqaneq marluk qimuttoralugit qimussernermit – piniartut aalisartullu ukiuni untritilinni aput sikulu atoruminarsigaangata angallatigisaannit sulilu ulloq manna tikillugu atugaannit- pitsaanerusoqanngilaq.

ILISIMAVIUK?

  • Qimussimik angalanerit apeqqaarneraniit kangerluit tatsillu sikuneriniit aallartittartut,
  • Qaasuitsup killeqarfiata avannaani Tunumilu taamaallaat qimuttunik qimmeqartoq,
  • Qamutit immap sikuatigut, qaqqatigut aputituukkulluunniit atorneqarnissaat apeqqutaatillugu immikkut ilusilerneqartartut,
  • Ukiut 1000-it sinnerlugit ingerlanerini qimmit qimuttut timikkut tarnikkullu ineriartortinneqarnermikkut ullumikkut nunarsuarmi qimminut nakuunerpaanut ilaasut, 
  • Qimusiussisoq oqarpat ili, ili, ili qimmit talerpimmut sangussasut, qimussiussisorlu oqarpat iu, iu,iu saamimmut sangussasut,
  • Seqineq seqernullu qinngorneri sakkortoqimmata, amermut tarngut annertuumik seqinermut illersuutitalik eqqaamassagakku,
  • WOGAC, WOC Nunattalu Angalatitsivia Kangerlussuarmiit, Sisimiuniit Ilulissaniit Qeqertarsuullu Tunuani illoqarfinnit allaniit, ilissinnut naleqquttunik neqerooruteqarmat.