Kusanartumik nerisassioriaaseq

Nunarsuarmi neriniartarfiit kusanartunik nerisassiortartut pitsaanersaasa ilaat Kalaallit Nunaanniipput. Nerisassallu umerneqarsinnaasut, nunap nammineq pissarititaanik suliaasut takuneqarsinnaavoq.

Nerisassiat angakkuakkatut kusanassusillit

Nunap nammineq pissarititai atorlugit kusanartunik nerisassioriaaseq immikkuullarissoq.
Kalaallit Nunaanni kusanartumik nerisassioriaaseq allanik kissaateqarfiunngilaq. Nuna nammineq nerisassiassanik pitsaanerpaanik peqarpoq nunarsuarmilu nerisassioriaatsinik isumassarsisitaalluni. Nuummi Ilulissanilu nunarsuarmi pitsaanerpaat ilaannik neriniartarfeqarpoq.

Neqit, aalisakkat pisallu allat pitsaanerpaat nunaqarfiit illoqarfiillu kalaalimineerniarfiini, inuinnarnit neriniartarfinnillu pisiarineqartarput.
Neriniartarfinni kalaallit nerisassaataat franskit, japanimiut thailandimiullu nerisassioriaasaat tunngavigalugu suliarineqartarput. Kujataani naatitat nerisassianut akoritinnissaat pissusissamisoorpoq. Aasami nerisassiat pupinnik, paarnanik naasunillu- pinngortitami ukiuni tuusintilikkaani vitamininik nukissanillu naaffiusimasumi- katersanik akoqartinneqartarput.

Nalinginnaasumik nerisat tungaatigut kulturi, qanga piniarnerinnarmik inuuniuteqarnerup nalaani ataqatigiinnermik nukittuumik tunngaveqarpoq. Pisanik agguaqatigiikkusussuseqarneq ullumikkumut atuuttoq, inuunermi atugassarititaasut qanoq ittuunerannut apeqqutaavoq. 

Pissartatut angakkuarneq

Ilulissani Hotel Arctic-ip neriniartarfittaata Ulo-p igaffiani kusanartunik nerisassiorfimmi nunatsinni igasut pikkorinnersaat nunatta pissarititai pitsaanerpaat atorlugit angakkuakkatut ittunik nerisassiortarput. Aasami akunittarfiup silataani aneerasaartarfimmi siatsiverujussuaq marmarluinnartunik siaasaasarpoq. Oqaatsunut H8-mi neriniartarfilimmut angalammik takornariarneq innersuussutissaqqissuuvortaaq. Sisimiuni neriniartarfik Nasaasaaq ullaakkorsiuutigaluni ulloqeqqasiorsinnaanermik,- umimmaap neqaanik-, qalerualinnik- timmissanillu nerisassianik neqeroorutilik pitsaassutsikkut immikkuullarissuuvoq.

Kangerlussuarmi angalasut neriniarfigisinnaasaannik pingasunik neriniartarfeqarpoq. Amerlanerit illoqarfiit pingaarnersaanniipput nerisassiornermillu sungiussilluarsimasut allaat - immaqa imaanut isikkivimmi arferup sarpianik takunniffiusinnaasumi- kissaatigisaat sippulimmik eqquutsinneqarsinnaavoq.

Timmisartumik angalasunut atuagassiami ”SULUK”-mi kalaallit kusanartumik nerisasioriaasiat nutaaliaq- tamatigungajak ilitsersuutitalerlugu- ersersinneqartarpoq.

ILISIMAVIUK?

  • Hotel Arctic 'Ny nordisk mad'-imik nersornaatisisimammat,
  • Mattak kalaallit mamartuutaat arferup amia mikisunnguanngorlugu aggorlugu assammik nerisassaammat, tassaammallu nerisassaq peqqinnartoq c-vitamininik nassataqartariaqarfiunngitsoq tamuffarissuunissamillu piumasaqaatitalik,
  • Qeqqussanik assagiarsummik risottolialinnik, qaleralinnik, ammassannik nipisaallu suaannik Sushi-t. Eqimi tammaarfimmi imal. Qeqertarsuup tunuani nunaqarfimmi Oqaatsuni tamakkuninga mamartulianik neqeroorfigineqassaguit tupigutsanniaqinal,
  • Kalaallit Nunaanni marlunnik- Nuummi Godthåb Bryghus-imi Ilulissanilu immiorfittaami Immiami- immiorfeqarmat,
  • Kalaallit inuiattut nerisannaavat tassaasoq puisip neqaa, qaqorteqqasulerlugu, naatsiialerlugu uanitsulerlugulu uutaq. Kalaalit qangaaniilli siatartoratik uutartortuupput.