Sermersuaq

Sermersuaq ukiunik tuusintilikkaanik pisoqaassuseqarpoq, pissaaneralu tupinnarluinnartuuvoq tiguartinnarlunilu. Nunarsuup affaani avannarlermi sermit annersaata sermertaata takunissaa qilanaarilereeruk.

Flightseeing near Iluliartoq in Kangerlussuaq in Greenland. Photo: Mads Pihl, Visit Greenland

Flightseeing near Iluliartoq in Kangerlussuaq in Greenland. Photo: Mads Pihl, Visit Greenland

Immikkorluinnaq kajungernassusilik

Pinngortitamik nuannarisallit sermersuaq Kalaallit Nunaata 81 %-anik qalliisoq qanilliniarlugu Kalaallit Nunaaliartutoqaapput. Tassani nukiit annertussutsimikkut ilutsimikkullu tupinnaannartut nilleqisumi mattuusimapput. Tassani qeqartilluni qalipaatip qaqortup qanoq assigiinngiiaarsinnaatiginera paasinarsisarpoq. Seqernup qinnguaasa sermeq qalipaatinik qorsorpaluttunik tungujuaartunillu alanngialalersittarpaat. Sermersuup takoqqaarnera ilunngunartuuvoq tupinnartuulluni –puigunaatsuullunilu.

Ungaseqisoq qaneqisorli

Eqqarsaatit sermersuup tungaanut ungasissusilimmut teqqalatinngitsoorneqarsinnaanngillat. Kangianit kitaanut avannaanit kujammut qanormita isorartutigaa?

Qulimiguulimmut ilaalluni isorartussutsit sinnattorisinnaanngisalluunniit isiginnaarneqarsinnaapput. Angallammut ilaalluni pisuutinillu kamippalerluni sikup sinaa arlalitsigut pallinneqarsinnaavoq. Kangerlussuarmi sermersuaq 25 km-inik ungasissusilimmiittoq cykilit qaqqasiutit atorlugit, pisullusi biilinilluunniit nunaannakkoorutinik tikissinnaavarsi. Nunaannakkoorutinut ilaallusi Kangerlussuarmiit sermimut iigartartumut (Russell Gletsjeren) 60 meterinik portussusilimmik iigalimmut angallatsigitsi. Aasami takornariarussi sermip uukkaanerani iluatitsillutik takunnittunut ilaasinnaavusi. Immaqa tupermi unnuillusi sermimi ulluni marlunni pisukkusussinnaavusi. Unnuaq nipaatsoq qanorlu inuup pinngortitarsuarmi annikilluinnassusiata, nutaamik paasisaqarfiginissaa qulakkeersinnaavarput.

Ilulissanissaaq sermersuaq qanillilluinnarneqarsinnaavoq. Immikkut ilinniarsimasunik angalatitsisulerluni ulluni marlunni pisulluni Glacier Lodge Eqi-miit angalaarnermut peqataagit. Ilisimasassarsiortoq franskeq Paul-Emile Victor tumisiorlugu sermersuup qaanut qaqilluta sermip aalluni kuunngortitai tungujualaarlutik qorsorpaluttut isiginnaakkit.

ILISIMAVIUK?

  • Sermersuaq nunarsuup nutsuinerata sinerissap tungaanut ajattaaneranit pinngortunik iigartartoqarmat, sermeq nakkaalluni ilulissanik aniatitsisarmat,
  • Sermip killinga maniilaqarmat, quppaqarluni sermip aanneranik tasinngortiterneqarluni kooqarmat,
  • Sermip killinga ukiunik 500-niit 100.000-it tungaannut pisoqaassuseqartoq. Sermip naqqata 250.000-inik ukioqarnera paasineqartoq,
  • Sermersuaq tamakkerluni aakkaluarpat nunarsuarmi immat meterinik arfineq marlunnik qaffassasut – eqqarsaatersuutissaasoq,
  • Siku angalatitsinerni suniluunniit ilaajuaannangajattuusoq, Ilulissani WOG Kangerlussuarmilu WOGAC sermersuup killinganut qaavanullu angalanernik assigiinngitsunik sivisussusilinnik aaqqissuussisarput.