Kangerluk iigartartumik sermilik

Ilulissat kangerlua UNESCO-p nunarsuatsinni eriagisassatut kingornussat nalunaarsuiffianni ilaavoq. Tassaniissimagaanni tamanna paasineqarluarsinnaavoq. 

Two travelers reading on a bench overlooking icebergs in the Ilulissat ice fjord in Greenland. Photo: Mads Pihl, Visit Greenland

Two travelers reading on a bench overlooking icebergs in the Ilulissat ice fjord in Greenland. Photo: Mads Pihl, Visit Greenland

Kangerluk iigartartumik sermilik alinaatsoq

Ilulissat kangerlua sermialu iigartartoq nunarsuarmi takuniagassaqqissutut isigineqartut ilagaat. Tamannarpiarlumi pissutigalugu 2004-mi UNESCO-p nunarsuatsinni eriagisassatut kingornussat nalunaarsorsimaffiannut ilanngunneqarpoq. Eriagalugu paarilluagassaammat tamanna paasisinnaalluarparput. Ataasiarluni kangerluk sermilik, iluliarpassualik sikorpassualillu takusimagaanni takoqqinnissaa kissaatituaalersarpoq.

Sermeq Kujalleq Qalasersuup Kujalliup avataani sermit iigartartut annersaraat, qulimiguulimmullu ilaallusi qulaaniit isiginnaarnissaanut immissinnut periarfissittariaqarpusi. Igalaaniit imaq kujammut ingerlaartunik ilulialik isigisinnaavarsi, tassanngaannarlu qipoqqaat talerorsuarminnik immap qaa serpalitsikkaat takusinnaallugit. Nuna, qaqqat, tatsit kuuillu qulaallugit angalaneq aallarnerneqartarpoq. Tamatuma kingorna kangerluk sermimik iigartartulik qulaallugu iluliarsuit kangerluup paavani ikkarlissimasut takussavagut. Taama angalaneq uissuummisitsisarpoq qamanilu puigugassaanngitsumik toqqortarineqalersarluni.

Ilulissani WOG-ip aaqqissugaanik pisulluni angalanernut, angallammut ilaalluni angalanernut, nunarsuarmi tusaamasap sunniineranik malussarfissaasumi aamma peqataasinnaavusi.

Nunaqarfiusimasoq immikkorluinnaq ittoq

Kangerlummik iigartartumik sermilimmik taasaqaraanni Sermermiut aamma taasariaqarput. Nunaqafiusimasumi Ilulissanit km-imik ataatsimik ungasissusilimmi illukut ornissigik. Tamanna 1800 qiteqqunnerat pallillugu inoqarsimavoq. Illukut issunik qarmakkat, attakut saassinni ilulissanullu isikkivik qalipakkatut isit saanni nipinngajualersarpoq.

ILISIMAVIUK?

  • Sermeq Kujalleq 3.000 km2 sinnerlugu annertussuseqarmat ukiullu tamaasa siku 40 km3 aniatittarmagu,
  • Sermermiuni nunaqarfiusimasoq Kalaallit Nunaannut nunalisut pingasut kultuuriinik takussutissaqarmat,
  • Kangerluk sermimik iigartartulik Kangianik taaneqartarmat, sermerlu iigartartoq Sermeq Kujallermik taaneqartarmat,
  • Sermip uukkarneragut iluliarujussuit nunarsuarmi sermit iigartatut sukkanersaasa ilaanneersut, kangerluk amitsoq aqqusaarlugu ullut tamakkiallugit Qeqertarsuup Tunuanut ingerlaartartut,  
  • Sermeq Kujalleq tassaasoq sermersuarmiit ilulissat aniatinneqartartut qulerarterutaannik aniatitsisoq,
  • Kangerluk sermimik iigartartulik inuussutissarpassuaqarmat, immami uumasut nerisassarpassuaqartut.