Nipilersorneq

Kalaallit siullerpaamik qilaatersorneranniit nipit uummammeersut pinngorput. Ullumikkut nipilersortartut tamatuminnga ingerlatitseqqittuupput. 

Nipi uummammit pisoq 

Rapperneq Kalaallit Nunaannit pinngortuugunarpoq. Kalaallit nipilersornikkut qangaaniilli ileqqutoqaat tassaavoq tivaneq inngernerlu. Nipilersuummit rytmi ataaseq erinarsuummmut ingiuisuuvoq – tassalu qangatut rapperneq.

Qanga qilaat qissiamik sinaakkuteqarpoq. Ipua ujallunik imal. amernik amitsukujuunngorlugit killukkanik ivertinneqartarpoq. Qilaat eqalussuup ilumiuisa ameraasaannik, puisip inalugaanik nannulluunniit aqajaruanik amerneqartarpoq.

Qisummik puisilluunniit najungasuanik qilaatip sinaanut tutsittakkamik katuaqartarpoq. Tivaneq upperisarsiornermut –aaqqiagiinngissutinillu aaqqiiniarnermut tunngatinneqarsimavoq. Aaqqiagiinngissutillit sapinngisartik tamaat imminnut nikassaatigalutik nikittaallutik tivallutillu qilaatersortarput.

Ullutsinni rapperluni unamminernisuulli iluarineqarnerpaaq ajugaasuusarpoq. Kristumiussutsip eqqunneqarnerani tivaneq inerteqqutaalerpoq. Kulturimut ilaatillugu tikeraanut nuannaarutaasumik- immaqalu isumassarsisitsisumik- ullumikkut atorneqarpoq.

Kalaallit illoqarfinni nunaqarfinnilu tamani oqaluffinni erinarsoqatigiinnilu tussiarnermik erinarsornermillu nuannarisaqartuupput. Arlaannik pisoqartillugu nalliuttorsiornerni pisortatigoortunillu aaqqissuussinerni erinarsoqatigiit akuttunngitsunik, kalaallisut assuutitik atorlugit appittarput.

Nalliuttorsiualaarnerni suugaluani kalattoorneq nuannarineqartaqaaq. Ilikkaruminartuuvoq tikeraartutullu iluatitsinikkut misilitsinneqarsinnaavoq.

Kalaallit inuusuttut akornanni nipilersorneq uummaarisseruttorpoq. Julie Berthelsen, Angu kiisalu Rasmus Lyberth, Kalaallit Nunaata avataani aamma ilisimaneqarluarput. Nive Nielsen-ip Simon Lynge-llu nipilersornikkut nunarsuarmi tusaamaneqalerniarnertik aallarteruttorpaat. Myspace.com aqqutigalugu illoqarfiillu nipilersuutaarniarfiini- suugaluanik nuannarisalinnut nipilersugaatilinni- tusarnaakkit. Atlantic Music-ip nittartagaani kalaallit nipilersugaannik amerlasuunik umigassaqarpoq. 

ILISIMAVIUK?

  • Nipilersoqatigiit The Benefits - aappaa qallunaaq aappaalu kalaaleq - 2007-imi Physical tusaamasannguutigigaat, Tamatuma kingorna inuit millionit affai sinneqartut Youtube.com-imi isiginnaajutigalugit tusarnaarsimagaat,
  • Ukiut 15-it uninngareerluni 2012-imi aasivik ingerlanneqaqqittoq, 1970-ikkunniit 1990-ikkunnisuut inuttut ataatsimooqatigiinnissamut, oqallinnissamut, suleqatigiiliornissamut nipilersortunillu naammatsilluni tusarnaarnissamut periarfisseeqqittoq,
  • Kalattuut skottit arfanniat 1600-kkunni takkuttut qitittariaasaannit sunnertinnikkut pinngortuusut