Umiartorneq

Umiarsuarmut ikigit, nunamut niugit ikeqqigillu! Pinngortitap alutornaqisup sinersorluni angallaviginngitsoorniaqinagu, tupigusoriilissaasi. 

Blue Ice boat Puttut among icebergs near Qooroq ice fjord in Narsarsuaq. Photo: Mads Pihl, Visit Greenland

Blue Ice boat Puttut among icebergs near Qooroq ice fjord in Narsarsuaq. Photo: Mads Pihl, Visit Greenland

Kalaallit Nunaanni umiartorneq

Kalaallit Nunaat sinersorlugu tikitassinni misigisarpasssuaqaritsi
Sinersortaammi Sarfaq Ittummi, inunnik nioqqutissanillu Kujataaniit Qeqertarsuup tunuanut utimullu assartuummi, piffissaq unittutut ittarpoq. Tikitassinnut nuannarineqaqisunut illoqarfinnullu niullusi, Kangerlussuarmi sermersuaq, illoqarfiit pingaarnersaat Nuuk, Ilulissanilu nunarsuarmi tamarmi ilisimaneqartoq eriagisassarlu- kangerluk iigartartumik sermilik takornariarsigik. Nammineq takusassarsioritsi imal. illoqarfik kaajallallugu angallanneqartunut peqataagitsi.

Sinersorneq Ilulissani Sisimiunilu akunnittarfinni pitsaassutsimikkut arlalinnik ullorialikkaniinnermik ilaneqarsinnaavoq. 
Kalaallit Nunaanni immakkut angalaneq angallannikkut pingaarutilimmik inissisimajuaannarpoq. Ullumikkut sinersorneq serminik iigartartunik tungujualaartunik-, qaqaat innaannik qernerlutillu qorsuttarasaanik-, iluliarsuarnik ataqqinarpasissunik-, nunaqarfeerannguanik alianaatsunik qaqqarsuarnillu takorannersunik takunninnissamut aqqutissaavoq alianaatsoq.

Nunarsuarmi qeqertat annersaattut inissisimaneq piumasaqaatitaqarpoq, aqqusinertullu taaneqarsinnaasoq qeqertamik avatangiisuuvoq. Illoqarfiit aqqusinertigut asfaltikkatigut imminnut attaveqanngillat. Angallanneq immakkut silaannakkullu ingerlanneqarpoq.

Umiarsuit takornariartaatit nunarsuarmit tamarmeersut Kalaallit Nunaat takornariagassaqqissutut isigalugu angalanissanut pilersaarumminni ilaatsippaat. Takornariartaatit tikittartut amerliartorput. Umiarsuarmut ilaalluni takornariarnerit immikkut ittut pitsaassutsimikkullu qaffasissut, M/S Fram ilaaffigalugu, Island-ip Kalaallit Nunaatalu akornanni –soorunalumi Kalaallit Nunaanniit aallarnerneqarlutillu naggaserneqartut- ingerlanneqartarput. 

Sermeq uukkaasoq isiginnaarsiuk

Eqi-p Sermia iigartartoq kangerlummut Ilulissanit 70 km-inik avannarpasissusilimmiittoq, ilulissanik aniatitsivoq. Angallammik sermip sinaanut pilluni uukkaanera isiginnaaneqarsinnaavoq.

Qanillugu qaarpallattarnerit tusaallugit isigisarlu annertoqisoq alutornaqisorlu isigalugu inuttut mikisuararsuanngortutut misiginnarpoq tiguartinnarlunilu.
WOG Ilulissaniittoq ulluinnarlugu ulluniluunniit arlalinni angalatitsisarpoq. Glacier Lodge Eqi 400 meterisut portutigisumiittoq isikkivigissoq unnuiffigiuk.

Ullut ikittuinnaat periarfissarigussigit qulimiguulimmut ilaallusi Eqip Sermia pinngitsoorani misigisarialik takornariarsiuk!

Angallammut ilaallusi ullup qeqqasioriartoritsi

Ullut arlallit illoqarfimmiikkussi sivisunerusumik sivikinnerusumilluunniit angallammik angalaarnissamut periarfissigitsi. Ilulissat akulloqquallugit nunaqarfimmut Oqaatsunukarlusi neriniartarfeeqqami H8-mi nerisassanik tupinnartunik nerillusi aliannaarsaarsinnaavusi.

ILISIMAVIUK?

  • Kalaallit Nunaat 2.166.086 km2-inik angissuseqarpoq,
  • Nuna 2.670 km-inik isorartussuseqarpoq akimullu 1.050 km-inik silissuseqartoq,
  • World of Greenland sermimut iigartartulianut, arfersiornianut imal. aalajangersimasumik ornitaqanngikkaluarluni angalanianut angallassisartoq,
  • Nunatta Angalatitsivia upernaakkut aasakkullu feeriami sinersortaammut Sarfaq Ittummut ilaalluni angalanissanik neqerooruteqartoq, sinersoqataaneq Kalaallit Nunaanit tamaneersunit pissarsivissaasoq,
  • Arctic Umiaq Line avannaani Ilulissaniit kujataani Qaqortumut uterlugulu angalasartoq.