Pisiniarfilerineq

Ullutsinni ilusilersuillammaat nutaaliortuupput Kalaallit Nunaannillu oqaluttuaqqittuullutik. Takukkit, attukkit malugikkillu.  

Kattie from Hotel Narsaq telling a guest about a tupilak bone carving from Narsaq in South Greenland. Photo: Mads Pihl, Visit Greenland

Kattie from Hotel Narsaq telling a guest about a tupilak bone carving from Narsaq in South Greenland. Photo: Mads Pihl, Visit Greenland

Itsaq siunissarlu pisiniarfigikkit

Pinnersaatit, ammit sanalukkallu kalaallit nunaanneersunit suliaasut, ulloq manna tikillugu kulturimut pisoqarsuarmut tulluusimaarnartumullu paasisaqartitsivoq. Asiutitsisoqarani ammit, ujaqqat nassuillu asseqanngitsunik pilersitsinermi atorneqartarput.

Najukkani takornariartitsiviit amerlanersaat kusanartunik saqqummersitsisarput najukkamilu eqqumiitsulianik tuniniaasarlutik. Qanoq mianersuussilluinnartigalutik ullumikkut kusanartuliortut takullugit tupinnaqaaq, kulturitoqqallu assassukkani suugaluani akuliunneqarsimanera ersarippoq.

Tupilaat tammajuitsussatut ilisimaneqarluartut nuannarineqartullu, Kalaallit Nunaaliarsimasut amerlaqisut angerlaattarpaat. Tupilak isumaqarpoq siulit anersaavat, siornatigullu tupilaat akeqqanut illersortitut atorneqartarsimapput. Ullumikkut ilisimasaqarnerulersimasoraagut, tupilliallu ullumikkut saanermik ukkusissamilluunniit sanaat, Kalaallit Nunaannut kulturiannullu eqqaassutaapput.   

Amminik suliat nalissaqanngitsut

Kalaallit Nunaat amernik nunarsuarmi pitsaanerpaanik suliaqartartutut ilisimaneqarpoq. Ilusilersuisartut tusaamasat nunatsinneersut nunanillu allaneersut, ukiut ingerlanerini atisanik atortussanillu kusanartulianik amermik sanaanik uumasunut, inunnut oqaluttuarisaanermullu ataqqinninnertik takutiitigalugu pilersitsisarput.

Illoqarfinni annerni pisiniarfiit pisiassanik pitsaassutsikkut qaffasissunik peqarluarput. Kalaallit Nunaat nutaamik inuuneqalernermut qitiulluinnarpoq. Nunarsuup ilaani allamisorluinnaq atuisut pisariaqartitaat kissaataallu, sunik qinigassaqarneranut aqutsisuupput. Sumiluunniit pisiniarneq- oqortunik atisassarsiniaraanni aamma itigarfiunngilaq!

Tammajuitsut eqqaasutsissaapput

Pinnersaatit, atisat, amermik sanaat, assassorluni eqqumiitsuliat – Kalaallit Nunaata ilamernga pinngortitap pissarititaanik suliaq. Kalaallit Nunaannut eqqaassutissamik nassarnissaq periarfissaqarluarpoq. Kalaallit Nunaannut aallalersinnasi – aqqutaanilu- kalaallit tammajuitsussiaat pillugit timmisartumut ilaasunut atuagassiami ”Suluk”-mi paasiniaanissamut aamma periarfissaqarpusi.

ILISIMAVIUK?

  • Kalaallit Nunaanni uumasut neqitugassatut piniarneqartarmata, tamannalu pissutigalugu puisit amiinik nioqquteqarnissamut EU-p inerteqquteqarnera Kalaallit Nunaannut atuutinngitsoq, taamaammat naammatsillutit pisiniaannarsinnaasutit,
  • Umimmaat meqqui nasaliornermi aaqqasiornermi qungasequtsiornermilu atorneqarlualersimasut, meqqut taakku nunarsuarmi oqornerpaatut tusaamasaasut,
  • Ilusilersuisartut massakkorpiaq alutorineqarnerpaat tassaasut:
  • Isaksen Design-ip ammeriviup Great Greenland-ip 2012-imi nioqqutissiai, qalipaatit- qernertoq anersaat silarsuaannut tunngatitaq, qaqortoq siulit saarnginut tunngatitaq aappalaartorlu inuunerup aavanut tunngatitaq atorlugit suliat akisussaaffigigai,
  • Else Lennert puisip amiinik allanik akoorlugit suliaqartartoq,
  • Bibi Chemnitz-ip ilusilersuinermini kalaallit ileqqutoqaat Skandinaviamilu illoqarfissuarni inuunermut tunngasut suliamini akuliuttarai, Bibi Chemnitz-ip ilusilersugai ilaatigut Tokyo-mi, Hong Kong-imi Berlin-imilu pisiassaasut.