alert-black.png Angalanermut killilersuinerit malinnaaffigikkit Ingerlaqqigit

Qaqortoq-mut angalanissat nassaariuk

Qaqortoq

Illoqarfik Kujataani ilinniarfittut, niuerfittut inuussutissarsiornikkullu qitiusumik inissisimavoq umiarsuarnillu takornariartaatinik amerliartortunik tikikkumaneqarajuttuulluni. Illoqarfik qaqqat innaasigut alliartorpoq illullu immikkut ittut qalipaatigissullu qalipakkamilusooq silap allanngorarnera ilutigalugu allanngorartumi inissisimapput. Immakkut tikkikkiartortuni isigisaq puiguikkiunnartuuvoq.  

Ujarak inullu

Illoqarfimmi angalaarnissinni maluginiassavasi najukkami Nunanillu Avannarlernit eqqumiitsuliortut suliaat assigiinngitsut 31-it, napasut imal. qaarsumi qiperukkat. Silami eqqumiitsulianik katersugaasivitsialak!

Annaassisitta Oqaluffia 1832-imeersoq katersugaasiviillu marluusut aamma takuniagassaqqissuupput. Sila amermik kavassisaarfissaanngippat, Great Greenland Furhouse-imut alakkaallusi taamaattoqarsinnaanera qulakkeersiuk. Takuniaaniarlusi nalunaarnikkut ilaatigut puisit amiisa suliarineqarlutik kusanartunik nioqqutsissiarineqartarnerat paasisaqarfigisiuk.

Illoqannginnersaq

Illoqannginnersaq tissaluttulialik inunnit qasuersaataa kaffimik najoqqaalaarusuttunit katersuuffiuvoq. Nal. ak. marlussunni meeqqat kuummi eqalunniarnerini seqinertsinneq inuummarissaataalluarpoq. Aalisarfik nuannersoq ikaarlugu kalaalimineerniarfik neqinik naatitanillu assigiinngitsunik nioqqutilik alakkarsiuk.

Qallunaatsiaat suliaasa pingaarnersaat

Hvalsø-p oqaluffia illoqarfimmit nal. ak. ataaseq angallammik tikittariaavoq. Oqaluffikorsuup tupinnartup qarmarsuisa amiakkui ukiut 1000-it matuma siorna qallunaatsiaat pissatseruttornerannik oqaluttuartuupput. Oqaluffikorsuaq qallunaatsiat illukuinit tamanit innarlerneqannginnerpaajuvoq, allattugaatillu naapertorlugit qallunaatsiaat oqaluffik 1408-mi katittoqarneranut atatillugu kingullermik atorsimavaat.

Tatsimi nalunnguarneq

Pissanngartuujunngikkussi pissangarusukkussiluunniit illoqarfiup kitaatunginnguaniittumi Tasersuarmi nalunnguarnissaq innersuussutigissavarput. Tassani aamma qajartorsinnaavusi imal. Tasersuaq kaajallallugu pisussinnaavusi. Aqqutaani Saqqaarsik qaqillugu illoqarfimmut kangerlunnullu isikkivik isiginnaarsiuk.

Ilisimaviuk?

  • Tatsini 38 gradinik kissassusilinnik puilasulinni ilulissanullu sarsuasunut isikkivilinni ilorrisimaarsinnaaneq. Puilasut kissartut Qaqortumit nal. ak. ataaseq angallammik tikittariaasut,
  • Umiarsuarnut takornariartaatinut Arctic Umiaq Line-mullu ilaalluni kujataaniit avannamut uterlugulu sinersornermut nuannarineqaqisumut Qaqortoq qitiusumik inissisimasoq,
  • Kina oqarpa tomatit, agurkit jordbærillu Kalaallit Nunaanni naatinneqarsinnaanngitsut. Upernaviarsummi nunalerinermi misileraavik takornariarneqaarsinnaasoq naatitsiviillu alakkarterneqarsinnaasut,  
  • Imarsiorniarluni feeriarneq, akunnittarfinni ineqarluni feeriarneq sinersornerlu pillugit Nunatta Angalatitsivia attavigalugu periarfissanik paasiniaasinnaaneq,
  • Illoqarfiup nalunaarasuartaateqarneq pillugu katersugaasiviani, Kalaallit Nunaanni nalunaarasuartaateqarnerup oqaluttuarisaanera- qaannamik allakkisartarnermiit ullutsinni internetsimik atuilerneq ilanngullugu takuniarneqarsinnaasoq.
  • Nunaqarfii: 3 savaateqarfiillu arlallit.
  • Sumiiffia: Qeqertaasami Qaqortup Kangerluata Tasersuullu akornanni.

Video - Qaqortoq