Covid-19

 

Covid-19 nalaani immikkut malittarisassat angallannermut tunngatillugu

Angalanermut tunngatillugu malittarisassat maleruaqqusallu uani ataani atuarsinnaavatit. Sillimaqqussavatsigilli ullormiit ullormut allanngortoqariataarsinnaammat. Qinnuigissavassi misissuataaqqullugu nunatta nakorsaanerata nittartagaa corona.nun.gl. Angalanissannut atatillugu apeqqutissaqaruit immersugassaq uani ataaniittoq atoruk.

Islandimi oqartussaasut Kalaallit Nunaat isumannaatsutut isigaat, taamaattumik angalanernut killilersuutit, Islandimi oqartussaasunit aalajangersarneqartut Kalaallit Nunaanniit Islandimut angalasunut atuutinngillat. Ullut 14-it inorlugit Kalaallit Nunaanniissimasunut maleruagassat allat atuupput. Linki una toorlugu Islandimi oqartussaasut angalanernut killilersuutaat atuarsinnaavatit.

Kalaallit Nunaannut angalanermi maleruagassat atuuttut www.corona.nun.gl-imi malinnaavigikkit

Killilersuinerit oktoberip 31-nut ilanngullugu atuupput.

Kalaallit Nunaannut angalasussat marluninngaanniik ukiullit, Kalaallit Nunaanni najugaqartut, najugaqarnermut uppernarsaammik, Covid-19 PCR tunillatsissimannginnermut uppernarsaat akunnerit 72-t sinnernagit pisoqaassusilik takutinneqassapput, kiisalu immersuiffissaq SUMUT immersorneqarsimaneranut allagartaa. (Immikkoortup naqqani takuneqarsinnaavoq nunat sorliit COVID-19-mut misissortinnissamut akuerineqartut, Kalaallit Nunaannut angalannginnermi).



Kalaallit Nunaannut angalaniarpit najugaqalernissat siunertaralugu? Imaluunniit suliffimmut atatillugu sivisuumik Kalaallit Nunaanniissavit? Taamaappat uppernarsaatissanut piumaqasaatit Oqartussaniit nalunaarutigineqartut ugguuna malinnaaffigeqqussavagut. Apeqqutissaqaruit eqqaaneqartunut tunngasunut, Corona pillugu allatseqarfik attaveqarfigiuk ugguuna corona@nanoq.gl imaluunniit oqarasuaatikkut +299 80 11 00.

Kalaallit Nunaannut angalasussat 18-niniik ukiullit, Kalaallit Nunaanni najugaqanngitsut, Covid-19-mut akiuussutissaq naammassillugu akiuussusersimassapput uppernarsisinnaassallugulu. Kiisalu Covid-19 PCR tunillatsissimannginnermut uppernarsaat akunnerit 72-t sinnernagit pisoqaassusilik takutinneqassalluni, aammalu immersuiffissaq SUMUT immersorneqarsimaneranut allagartaa. (Immikkoortup naqqani takuneqarsinnaavoq nunat sorliit COVID-19-mut misissortinnissamut akuerineqartut, Kalaallit Nunaannut angalannginnermi).

Maluginiaruk Kalaallit Nunaannut angalaneq Covid-19-mut akiuussutissaq piumasarineqartoq europæiske lægemiddelagentur aqqutigalugu akuerineqassasoq, tassa European Medicines Agency (EMA). Una linki tooruk, takullugulu suut akiuussutissat akuerineqarnersut.

Maluginiaruk:

1) Akiuussutissaq Modernaminngaanneersoq, Spikevaxmik taaneqarpoq

2) Akiuussutissaq Pfizeriminngaanneersoq, Comirnatymik taaneqartarpoq

3) Akiuussutissaq Johnson & Johnsoniminngaanneersoq, Janssenimik taaneqarpoq

4) Akiuussutissaq AstraZenecaminngaanneersoq, Vaxzevriamik taaneqarpoq

 
Kalaallit Nunaannut angalasussat marluniik 17-nut ukiullit, Kalaallit Nunaanni najugaqanngitsut, Covid-19 PCR tunillatsissimannginnermut uppernarsaat akunnerit 72-t sinnernagit pisoqaassusilik takutinneqassapput, kiisalu immersuiffissaq SUMUT immersorneqarsimaneranut allagartaa. (Immikkoortup naqqani takuneqarsinnaavoq nunat sorliit COVID-19-mut misissortinnissamut akuerineqartut, Kalaallit Nunaannut angalannginnermi).

 

Bilitsimik pisineq
Sumiiffinnut misissorteqqinnissamik piumasaqaateqarfiusunut angalasut ingerlaqqinnginnerminni illoqarfimmi peqqissaavilimmi uninngagallassapput. Taamaattumik Københavnip aamma sumiiffiit misissorteqqinnissamik piumasaqaateqarfiusut akornanni angalanerup ataannarnissaanut bilitsit airgreenland.gl aqqutigalugu pisarineqarsinnaajunnaarput.
Københavnip aamma sumiiffiit misissorteqqinnissamik piumasaqaateqarfiusut akornanni angalanissamut bilitsisinissat kissaatigigukku, bilitsinik immikkoortunik marlunnik pisissaatit.

Eqqaamallugu, angalanerpit ingerlateqqinnginnerani Covid-19-imik tunillatsissimannginnermut uppernarsaammik nutaamik takutitsisussaagavit.

Nunanit Naalagaaffeqatigiit avataaniittunit angalasut

Nunanit Naalagaaffeqatigiit avataaniittunit angalasut namminneerlutik nunani avannarlerni (Danmark, Sverige, Norge, Finland, Savalimmiut aamma Island)  misissortinnissaminnut inniminniisussaapput, aammalu PCR-imut misissortinnermi tunillatsissimannginnermut uppernarsaammik pissarsisussaallutik annerpaamik akunnerit 72-t sinnernagit pisoqaassusilik. Misissortinnerup inernera kalaallisut, danskisut imaluunniit tuluttut allassimassaaq

corona.nun.gl aqqutigalugu annertunerusumik atuagaqarit

30. september 2020 aallarnerfigalugu angalasunuttamanut peqqussut atuutilerpoq, tassa angalaneq tamakkerlugu, nammineq pigisamik qanermut imaluunniit kiinnamut assiaquteqarnissaq, qanermik qinngamillu asseqqatitsisussamik. Meeqqat 12-nik ukiullit inorlugit qanermut assiaquteqarnissaat piumasaqaataanngilaq.

Assiaqut nerinermi peeneqarsinnaavoq. Innersuussutaavoq nerereernermi assiaqummik nutaamik atuilernissaq.

Qanermut assiaquteqarneq pillugu www.corona.nun.gl-mi paasisaqarnerugit

Qanermut qinngamullu assiaqut qanoq atorneqarnissaa uani takuneqarsinnaavoq.

Københavnimiit Kangerlussuarmut angalasussat Air Greenlandip check-in-ertarfia atortassavaat. Online-kkut imaluunniit mittarfimmi imminnut sullinnermut atortut atorlugit check-in-ertoqarsinnaassanngilaq.

Københavnimiit Nunatsinnut angalalernermi Københavnimi check in-ilernermi Oqartussanit peqqussutit eqqumaffigeqquagut. Nunatsinni Nakorsaaneqarfiup nittartagaani paasisaqarnerugit corona.nun.gl

Københavnip mittarfiata maleruagassai uani takusinnaavatit (qallunaatut allaqqapput) www.cph.dk

Københavnimi sukkanerpaamik check-in-ertikkumallitit allagartat uppernarsaatit uku piareersimatikkit:

  • Kinaassutsimik uppernarsaat (pas-i, kørekort, najugaqarnermut uppernarsaat)
  • SUMUT-immersiuffissap nassiussimaneranut uppernarsaat
  • (PCR-test) Covid-19-mik tunillatsissimannginnermut uppernarsaat, 72 tiimit sinnernagit pisoqaassusilik

Danmarkimut bilitsit airgreenland.gl-mi pisarnertut pisiarineqarsinnaapput, maluginiaqqussavarpulli Juulimi aggustusimilu Københavnimiit Kangerlussuarmut bilitsisineq ajornarallarpoq. Tamanna tuniniaanermut atortutsinnik angalanissanut maleruaqqusanut atuuttunut nalimmassaanitsinnik peqquteqarpoq.

Nunatsinni Nakorsaaneqarfik nittartagaani angalaneq pillugu paasisaqarnerugit.

Angalasusat qinnuvigissavagut maligeqqullugu, maannakkut Covid-19-mik pisoqartillugu ullormiit ullormut allangortoqarsinnaammat. 

Nittartakkatsinni malinnaasinnaavutit, oqartussaniit nalunaarutigineqartut malillugit nutarterneqartassaaq, imaluunniit Nunatsinni nakorsaaneqarfiup nittartagaani malinnaagit corona.nun.gl

Eqqiluisaarneq ilorrisimaarnassuserlu

Siullertut Nunatsinni Politiit Nunatsinnilu Nakorsaaneqarfik innersuussutai peqqussutaallu malittuaannassavatit malinnaavigillugillu.
Linki una aqqutigalugu malinnaasinnaavutit: Nunatsinni Nakorsaaneqarfiup innersuusutai paasissutissiisarfialu COVID-19

Covid-19 eqqarsaatigalugu Air Greenland assigiinngitsunik iliuuseqarpoq – sukkulluunniit ineriartortoqarneranut malinnaalluarpugut, aammalu ilaasutta isumannaatsumik angalanissaat toqqissisimanissaallu pingaartitatta annersaraat.

Kalaallit Nunaanni Peqqissutsimut Naalakkersuisoqarfik attaveqarfigilluarparput, aammalu innersuusutai sukkulluunniit malippagut.

Suleriaatsigut qisuariarnissamullu pilersaarutigut misissorpagut, mianersornissarpullu eqqarsaatigalugu timmisartutsinni isumannaallisaanermut atortugut ilavagut, soorlu sulisunut aaqqatit, maskit, tunillannartuiaatit arlallit, timmisartuutitsinnullu mianersornissamut misissuinissaq aallartippoq.

Aammattaaq timmisartut angalareernersa tamaasa kingorna eqqiaasarnerit pisarput, mittarfinnilu check in-imi håndspritinik inissiisoqarluni. Angalasugut tamarmik eqqaamaqqussavagut mittarfinni ungasissuseq pingaaruteqarmat, Peqqissutsimullu Naalakkersuisoqarfiup innersuussutai malittuarnissaat.

Angalasussat tamarmik assaminnik eqqiluisaarluarnissaannik innersuuppagut, angalanermilu sapinngisamik håndspritimik nassartarit. Nassatani tigummiakkani 100 ml tunillannartuiaammik nassataqarsinnaavutit. 

Angalatillutit peqqiillioruit imaluunniit napparsimalissagaluaruit, saqisugut sulisugulluuniit piaartumik attaveqarfigikkit. Ikiuinissaminnut ilitsersorneqarnikuupput.

Aliikkutassaqartitsineq:

Tunillaassuuttoqannginnissaa siunertaralugu Air Greenlandip, timmisartuussivinni atuagassiat tamarmik timmisartuniit peerpai. Club Timmisami ilaasortatut aviisit atuagassiallu assigiinngitsut angalalernermi mobiilinnut tabletinnulluunniit downloadtersinnaavatit.

Timmisartorsuarmi nerisassanik sassaalliineq

Timmisartorsuarmi nalinginnaasumik inissani uku sassaalliutigineqartarput, iffiaaqqat, kaagi, boorloq punnerlu, nerisassat nillertut imerlu.

Premium Class-imi nerisassat nillertut , tassa kapisilik nillertoq, immussuit, iffiukkallu kissatat kiisalu mamartumerngit sodavandit imerlu.

Aningaasat atorlugit stationini akiliisarneq atorunnaassaaq

Covid-19-p tuniluussinnaanera killilersimaarniarlugu, mittarfinni stationini ukioq manna oktobarip 18-anniik aningaasanik akiliisarneq atorunnaassaaq. Tassa Nunatsinni aamma Danmarkimi nassatat 20kg sinnernerani akiliilernermi, nassiussassani, imaluunniit stationini tuniniakkanik pisissagaanni aningaasanik akiliisoqarsinnaajunnaassaaq. Siunissamilu akiliinerit korti akiliutigisartagaq atorlugu imaluunniit mobili atorlugu akiliisarneq, soorlu Apple Pay, pisalissapput.
Taamaattumik uagutsinnut ilaallutit angalassaguit, korti akiliutigisartakkat imaluunniit mobilimik akiliutaasartoq eqqaamassavat, Covid-19-llu tuniluunnissaanut pinaveersaartitseqataallutit. 

Angalasut ilisimaqquarput nunatta iluani angallannermi Dash-8-mut ilaasut issiaviit normui malillugit issiavimmik aalajangersimasumik tunineqassasut. Ilaasussap issiaviata normussaa ilaanissamut ikissutissami allaqqassaaq. Sumi issiassanerlutit nalornissutigigukkit timmisartumi sulisut aperisinnaavatit.

Timmisartorsuarmisuulli, Nunatta iluani timmisartuussivinni aalajangersimasumik issiavissinneqarneq, ilaqutariit allallu ataatsimoorlutik angalasut issiaqatigiissinnaanerinut qulakkeerutaasarpoq. Air Greenlandillu sulisuinut sulinermi pisariakillisaataallunilu ilaasunut utaqqinannginnerussaaq.Tamanna ukiortaamili sulissutigineqarnikuuvoq, maannali Kalaallit Nunaata Peqqissutsimut Naalakkersuisoqarfianinngaanniit innersuussutigineqarnera peqqutaalluni pilersinneqarluni.

Nalinginnaasumik Air Greenlandi Kalaallit Nunaanni oqartussat, Kalaallit Nunaanni politiit aammalu Nuna tamakkerlugu peqqinnissaqarfiup qullersaqarfianit peqqussutit malillugit ingerlatsivoq. Taammattumik inuit 100 sinnerlugit katersuussimasinnaanerat akueraarput.

Atlantikoq qulaallugu timmisartoq qallunaat nunaanni peqqussutit malinneqarput, assersuutigalugu qanermut qingammullu assiaqutit pineqarpata.