Taamaatitsinissamut sullissineq

Nunanut allanut angalasussanut angalanerup nalaani atuuttumik taamatullu taamaatitsinissamut sillimmasiinissaq tamatigorluinnaq innersuussutigisarparput. Taamaaliornikkummi angalanerup aallartinnginnerani angalanerullu nalaani illit aamma angalaqativit ikiorneqarnissarsi qulakkiissagassiuk.

Kalaallit Nunaanni najugaqavissuuguit ilisimassavat nunani allani angalatillutit killilimmik ikiorserneqarsinnaagavit, aammalu Kalaallit Nunaata avatanniitillutit napparsimanerit pissutigalugu aningaasartuutigisinnaasatit Kalaallit Nunaanni peqqinnissaqarfimmit utertinneqarsinnaanngimmata ilisimassavat.

Nunani allaniinnermi napparsimalernermi ikiorserneqartarneq pillugu Kalaallit Nunaanni Peqqinnissaqarfiup maluaruagassiai » pillugit annertunerusumik atuagaqarit

Danmarkimi najugaqaruit eqqumaffigissavat, sygesikringskort sungaartoq 1. august 2014 aallarnerfigalugu EU-p avataani atorneqarsinnaajunnaarmat. Tassani nammineerlutit angalanissamut sillimmasiissaatit.

Angalanissamut sillimmasiissut

Angalanissamut sillimmasiissut iluaqutaalluinnarsinnaavoq! Tassa Kalaallit Nunaanni nunarsuulluunniit sinneranut angalaniaruit. Illit napparsimaleruit imaluunniit ilaquttat napparsimalerpat, ajoquseruit imaluunniit nassatatit annaagukkit aningaasatigut allatullu ikiorserneqarsinnaallutit ilisimallugu aallarnissat toqqissisimanartussaavoq. Air Greenlandimi bilitsinik ataatsimut inniminniisimaguit angalanerup tamaat isumagissavatsigit. Timmisartuutileqatigiit assigiinngitsut marluk amerlanerilluunniit atorlugit angalasussaaguit 'kingusinaarluni tikinnermik-sillimmasiissummik' (forsent-fremmødeforsikring) pisinissat innersuussutigissavarput. 

Angalanissamut sillimmasiissut Europæiske » aqqutigalugu inniminnersinnaavat.

Taamaatitsinissamut sullissineq

Taamaatitsinissamut sullissinissamik pisiguit, aallannginninni napparsimalissaguit ajoqusissagulluunniit bilitsimut aningaasartuutit matussuserneqassapput. Sullissineq aamma atuuppoq, angalaqataasussat ilaquttalluunniit qaniginerpaasat napparsimalerpata, toqukkut qimaguppata ajoquserpataluunniit. Sullissineq angalanerup nalaani atuutinngilaq.

Angalanissamik taamaatitsinissamik sullissinitsinnut tunngasumik taamaatitsiniaruit, una aariarlugu Taamaatitsinissamut immersugassaq immersoriarlugulu uunga nassiutissavat afbestilling@airgreenland.gl.

Taamaatitsinissamut immersugassaq uani aasinnaavat: Taamaatitsininissamut sullissivimmut immersugassaq »

Sullissinermi maleruagassat

Taamaatitsinissamut sullissineq qanoq ilinikkut atorsinnaavara?

Taamaatitsinissamut sullissineq atuutissaaq, angalanissaq uku pissutigalugit pisinnaajunnaarpat, inuk, bilitsimi aqqa allaqqasoq toquppat imaluunniit napparsimaleriataarpat, aamma tassani pineqarput ilaqutai imaluunniit angalaqatissai.

Kisianni amerlanerpaamik inuit pingasut, taamaatitsinissamik sullissinermik pisisimasut, angalaqatissamut ataatsimut tunngatillugu taamaatitsisinnaapput.

Manna malugeqquneqarpoq: taamaatitsinissamut sullissineq atuutsinneqarsinnaanngilaq, napparsimaleriataarneq taamaatitsinermut pissutaasoq, taamaatitsinissamik sullissinermik pisinermi nappaatigineqareerpat, kisiannili nappaattigisap imaluunniit nappaatip anigorneqarsinnaanngitsup ilimaginngisamik ajorseriataarnera pineqanngilaq.

Taamaatitsinissamik sullissineq aamma atorneqarsinnaavoq, inuk bilitsimi aqqa allaqqasoq, misissortinnermi SARS-CoV-2 -mik tunillatsissimasutut ersiuteqarpat.

Mattusimasussaatitaaguit imaluunniit tunillatsissimasumut qanillisimasut ilagippatsit, taamaatitsinissamik sullissineq atorneqarsinnaanngilaq, taamaallaalli aatsaat SARS-CoV-2 -mik tunillatsissimaguit.

Angalanissaq pisinnaajunnaarpat, piaarnerpaamik, kingusinnerpaamillu piffissaq aallarfissaq nallertinnagu Air Greenland A/S-imut nalunaarutigineqassaaq. Aallarfissatut piffissap qaangiuterernerani taamaatitsinermi, taamaatitsinissamut sullissineq atorneqarsinnaanngilaq, taamaattumillu bilitsi utertinneqarsinnaanani.

Kina taamaatitsinissamik sullissinermut ilaava?

Inuit taamaatitsinissamik sullissinermik pisinermi bilitsimut pineqartumut allaqqasut.

Qanoq sivisutigisumik atuuppa?

Taamaatitsinissamik sullissineq bilitsip pisiarineraniit ulloq aallarfissaq (bilitsimi allaqqasoq) tikillugu atuuppoq.

Taamaatitsinissamik sullissineq qaqugu pisiarineqassava?

Taamaatitsinissamik sullissineq bilitsimik pisinermut atatillugu pisiarineqassaaq.

Taamaatitsinissamut sullissineq aningaasartuutinut sorlernut matussutaassava?

Inuit bilitsimi allaqqasut tamarmik bilitsip akia utertissinnaavaat. Kreditkortinut akiliut, taamaatitsinermut akilut aamma akiliutit allat utertinneqarneq ajorput.

Taamaatitsinissamut sullissineq ima atorneqassaaq

Taamaatitsinissamut sullissineq atorniarukku, una immersoriarlugu taamaatitsinissamut immersugassaq. Air Greenland A/S nalunaarfigissavat.

Immersugassaq immersoreerpat, papiaqqat uppernarsaatit tassunga tunngassutillit ilanngullugit, Air Greenland A/S -mut mailikkut uunga nassiutissavat afbestilling@airgreenland.gl.

Uppernarsaatit uku, taamaatitsinissamut immersugassamut ilanngullugit uagutsinnut nassiunneqassapput:

  • Napparsimaleriataarneq pissutigalugu taamaatitsiniarnermi, nakorsamit uppernarsaat ilanngunneqassaaq.
    Air Greenland A/S-ip taamaatitsinissamut sullissinerup atorneqarsinnaanera nalilerniarlugu, pisariaqarsoriguniullu peqqissutsimut uppernarsaatit amerlanerit piniarnissaanut imminut pisinnaatippoq.
    Inuup taamaatitsinissamik sullissinerup atornissaanik piumasaqartup, peqqissutsimut uppernarsaammut paasissutissanullu allanut aningaasartuutit nammineq akilissavai, Air Greenland A/S-ip susassaringilai utertinneqassanngillallu.
  • SARS-CoV-2 -mik misissorneqarninni tunillatsissimanippit takussutissaqarnera taamaatitsinermut peqqutaappat, misissortinnermit akissut ilanngullugu nassiunneqassaaq
    Misissortinnermut aningaasartuutaasimasinnaasut, taamaatitsinermik sullissinermik atuiniartup nammineq akilissavai, Air Greenland A/S -illu susassarinngilai utertinneqarsinnaanatillu.
  • Toqusoqarnera taamaatitsinerput pissutaappat, toqusoqartillugu uppernarsaatip saqqaa ilanngullugu nassiunneqassaaq

Eqqartuussiveqarneq aamma inatsisit tunngavissat

Air Greenland A/S -mik eqqartuussisulersuussinermi Kalaallit Nunaanni Eqqartuussiveqarfik atorneqassaaq, Kalaallit Nunaannilu inatsisit malillugit inerniliisoqassaaq.

Nassuiaatit

Napparsimaleriataarneq:

Napparsimaleriataarneq ima paasineqassaaq, napparsimaleqqammerneq, nappaammik perululluni napparsimaleriataarneq imaluunniit nappaatigisap, nappaatilluunniit aningorsinnaanngisap ajorseriataarneranik tunngavilersukkamik ilimagisaqalerneq.

Ilaquttat:

Ilaquttat uku pineqarput nuliaq, ui, inooqatigisaq, qitornat, ernuttat, ukuat ningaallu, angajoqqaat, sakit, qatanngutit, aanaa aataalu, bilitsimi aqqa allassimasup uiata nuliataluunniit qatanngutai.

Angalaqat:

Angalaqat ima paasineqassaaq, taamaatitsinissamik sullissinermik atuinissamik piumasaqartup, aqqa bilitsimi allaqqasup, angalaqataatut bilitsimi aamma allaqqasoq.

Taamaatitsinissamut sillimmasiissut 2021-mi decembarip 31-at sioqqullugu pisiaraajuk?

Taamaatitsinissamut sillimmasiissut 2021-mi decembarip 31-at sioqqullugu pisiarisimagukku, immersugassaq una Taamaatitsinissamik sillimmasiinermut immersugassaq (europæiske), atussavat, aamma taamaatitsinissamut sillimmasiissutip taassuma maleruagassartai tassani atuarsinnaavatit.