Business Class (Akisuneq)

Air Greenlandip aamma Danmarkip Kalaallit Nunaatalu akornanni akisunermiinnissaq neqeroorutigaa.



Business Class (Akisuneq)

Isersimaartarfik

Københavnip mittarfeqarfiani Aviator Business Class Lounge aamma Aspire Lounge atorneqarsinnaapput.

Tassani qasuersaarsinnaavutit, sulillutit imaluunniit aviisinik atuagassianilluunniit atuarujoorlutit. Akeqanngitsunik najooqqagassaqarlunilu tamussiussassaqarpoq.

Timmisartumi

Imeruersaammik, qungujummik ullorlu taanna aviisinik timmisartumut tikilluaqqussavatsigit. Issiavissannullu inissilluareeruit taskeeqqamik angalanermi atugassanik imalimmik tunissavatsigit. Issiavik inissaqarluartoq silillunilu ilorrisimaarnarlunilu. Airbus 330-mi issiaviit immikkut isiginnaaruteqarlutillu tusarnaaruteqarput, taakkulu siutequtitai nipiliornermik sakkukillisitsisartut. Issiaviup ikusimmiffianiippoq nerriveeraq marloqiusaq nikisinneqarsinnaasorlu, soorlu nikuilernermi, soorunalumi aamma ilinnut naleqqussarlugu inissinneqarsinnaasoq.

Sullissineq sassaalliinerlu

Soorunami sukkasuumik inussiarnerlutalu sullissisarpugut. Ingerlaarnermi imeruersaatinik allanillu assigisaanik neqerooruteqartarpugut, pisariaqartitsileruit saaffigiinnassavatsigut.

Nerisassat mamarunarlutillu nerisassiassanit pitsaanerpaanit sanaajupput nerisanullu naleqquttumik viinnilerlugit sassaalliutigineqartarput.

Nassarsinnaasat annertunerit

30 kg-t angullugit nassarsinnaavutit, taakku ’prioritet’-mik nalunaaqutserneqassapput, tikinnermilu nassatanut kaaviiaarfimmut siulliullutik ilineqassapput. Taakku saniatigut tigumiaannakkat marluk immikkut 55 x 40 x 23 cm-nik angissusillit katillugit 8 kg-nik oqimaassusillit nassarsinnaavatit. Tamanna Kalaallit Nunaata Danmarkillu akornanni, paarlattuanillu, timmisartuussinerni aammalu nunat taakku iluini timmisartuussinerni aamma atuuppoq. Tigummiaannagassatut nassatat aallalerluni tunniussinermi takutinneqarlutillu uuttorlugit oqimaassusaat qulakkeerneqassaaq. 

Akisunermut nuunneq

Bilitsit allanngortinneqarsinnaasut akisunermi inissaqarpat tassunga, bilitsit akiata nikingassutaanik akiliinikkut, allangortinneqarsinnaapput.

Bilitsit allanngortinneqarsinnaanngitsut akisunermut allanngortinneqarsinnaanngereerput, ullormili angalaffiusumi inissaqarpat nerisassallu naammassappata akisunermut nuuttoqarsinnaavoq, 2.000 – kr.-nik akiliilluni. Allanngortinneqarsinnaanngitsumik akisunermiikkaanni, akikinnermut nuutinneqarsinnaanngilaq.