Timmisartornissamut Annilaanganeq

Air Greenland ukiuni 50-ini sinnerlugit timmisartuussinermik misilittagaqartuuvoq. Sillimaniarneq pingaartitaraarput aamma avatangiisigut nunarsuatsinni annertusinnaasaraluartut. Sulisut sillimanarnermut sungiusarluagaapput taamaattumik timmisartornissamut annilaagaguit sulisunut saaffiginnigit.

Toqqissisimanngilatit?

Toqqissisimanngilatit? Timmisartornissat annilaangagaajuk? Tamanna tunniussininni sulisutsinnut oqaatigiuk, imaluunniit ingerlaarnerup nalaani sulisunut oqaatigiuk. Angalatitsivimmut tamanna inniminniikkannut ikkuteqqullugu piumaffigisinnaavat, qarasaasiakkulluunniit immiminniisimaguit saaffiginnittarfitsinnut Call Centertimut kalerriutigalugu. Siunnersuutigissavarpullu issiavissannik toqqaaninni ’aisle’ toqqaqqullugu, taava ipiannguallaassanngilatit. Qanoq misigisarninnik siumut paasitinneqarutta angalanerpit sapinngisarput tamaat pitsaanerpaamik misiginissaa qulakkiissallugu piareersimasinnaavugut.

Kisimiinngilatit

Angalasut pingajorarterutaasa missaat ilaatigut toqqissisimanngittarput. Tassa kisimiinngilatit.

Siunnersussavatsigit angalanissat piareersarluaqqullugu, aallalivinninni uisakajaarnak toqqissisimanerussagavit. Mittarfiliajaarit, angalaqatissavillu angalanissamut pilerinerat misigigukku aamma pilerilissaatit.

Nipit allanartut

Ingerlaarnerup nalaani nipinik sungiusimanngisannik tusaasaqarsinnaavutit. Tamanna timmisartup silataani atortunik misilittaanermik imaluunniit qangattarnermi milernermiluunniit assakaasut inissinnerisa nassataannik pilersinnaavoq. Nipillu tusaasatit suut tamarmik pissusissamisoornerannut ersiutaammata eqqissisimaannassaatit. Immaqa aamma atuakkanik atorniartarfimmi timmisartornermut teknikkimullu tunngasunik paasisassarsiorsinnaavutit.

Anersaartorluarnissaq pingaaruteqaqaaq

Nunarsuarmi sumiikkaluaraanniluunniit silaannaq unerisimanngitsoq sajuppillattarnerillu naammattugassaapput. Qinngakkut itisuumik anersaartorit, kigaatsumillu silammut anersaarit, taamatut ilioqqeqattaarit. Eqqissiveqannginneq annilaanganerluunniit misigigaanni taamatut iliornikkut qaangiuttarput. Ilaat nakorsaminnut iisartakkanik eqqissisaatinik piniartarput. Imigassaq aalakoornartulik timmisartornissamut ersinaveeqqutitut atussallugu iluaqutaanngilaq. Ajorsisitseriaannarsinnaavormi.

Siunnersuut pitsaanerpaaq

Issiavinnut ingilluartitaarit. Qitequtaasat ikkuguk silarsuarmilu isikkiviginnerpaami toqqissillutit timmisartornissannut qilanaaginnarit.