Timmisartumi kiffartuussineq

Timmisartumi angalaneq sukkaannaq ingerlasarpoq sullissineq annertusarmat, nerisassat pitsaasut, aliikkutassiat assigiinngitsut, pisiassat aammalu issiaviit eqqissisimaarfiusinnaasut atuummata. Apeqqutissaqaruit timmisartumi saqisut aperikkit, akisinik imaluunnit tæppe-nik atorsinnaavutit.

Nerisassat imeruersaatillu

MALUGIUK: Covid-19 peqqutigalugu November 2020 tungaanut timmisartuusinitsinni sandwichinik sassaalliuteqassaagut.

Nunatsinni: Dash-8-nik timmisartuussivinni takinerni kaffimik, tiimik, juicemik imermilluunniit kaageeqqanillu sassaalliuteqartarpugut. Aqqutini naatsuni qulimiguulinnillu timmisartuussivinni isikkivik kissalaartumillu qungujunneq tunniuttarparput. Imermik pisariaqartitsilissaguit timmisartumi saqisut saaffigikkit.

Kalaallit Nunaaniit Danmarkimiillu: Akeqanngitsumik imeruersaatit assigiinngitsorpassuit, nerisassat soorunalumi kaffi tiilu sassaalliutigisarpavut.

Nerisassat immikkut ittut pisariaqartikkaanni, soorlu naatitaannarnik nerisaqartunut, meeqqanut aammalu meeraaqqanut nerisassanik, angalanissamik inniminniinermi inniminneerneqartarput. Akikinnermi aalisakkanik sassaalliuteqartoqarneq ajorpoq.

Bilitsimik inniminniininni uku nerisassat inniminneernissaannut periarfissaqarpoq: meeraaqqanut meeqqanulluunniit, imaluunniit naatitaannarnik nerisaqartartunut

Aammattaaq immikkut ittut uku inniminneerneqarsinnaapput: Gluteneqanngitsut, laktoseqanngitsut aammalu kolesterolikitsut

Nerisassat immikkut ittut inniminniissagaanni Air Greenlandip Call Centerianut, websupport@airgreenland.gl -mut imaluunniit angalatitsivimmi bilitsisiffimmi inniminneerneqarsinnaapput.

Nerisassanut immikkut ittunut inniminniissutit Københavnimiit aallarfissaq minnerpaamik nal.ak. 48-it sioqqullugu Air Greenlandimit tiguneqareerlutillu akuerineqassapput.

Tamanna Københavnimiit Kangerlussuarmut aamma Kangerlussuarmiit Københavnimut aqqutini atuuppoq.

Island-imiit Kalaallaallit Nunaannut paarlattuanillu: kaffi, tii qaqortuliarlu qallersugaq patititaq sassaalliutaapput. 

Annertuumik sapigaqarneq

Nerisassanik assigiinngitsunik annertuumik sapigaqaraanni immaqa nammineq nerisassanik nassaraanni isumatusaarnerussaaq, immikkorluinnaq pisariaqartitat kissaatillu eqqortinneqarsinnaasanngimmata.

Aliikkutassat

Kalaallit Nunaanniit Danmarkimut, paarlattuanillu, timmisartuussiviit tamarmik aliikkutassanik assigiinngitsunik neqerooruteqarfiupput. Filmit, nipilersuutit, titartakkanik filmit, nipilersukkallu toqqagassat assigiinngitsut. Aliikkutassiat suuneri issiaviup saanniittup kaasarfiusaaniittumi SULUK-mi atuarsinnaavatit. Kaasarfiusamiipput aamma tusarnaarutit atuinnarissat.

Malugiuk: Timmisartuussinerni Air Greenlandimit isumagineqanngitsuni, filmeqarnersoq, nipilersuuteqarnersoq imaluunniit akitsuutitaqanngitsumik pisisoqarsinnaanersoq ajoraluartumik qulakkeersinnaanngilarput.

Timmisartumi atuagassiaq

Atuagassiaq SULUK oqaatsit pingasut atorlugit naqitanik nuannersunik atuagassaqarpoq. Tassa Kalaallit Nunaannut, kulturimut, pisussanullu allarpassuarnut tunngasunik. SULUK Club Timmisa app'eq aqqutigalugu atuarneqarsinnaavoq. SULUK saqqummertoq kingulleq siusinnerusukkullu saqqummertut SULUK online –mi atuarsinnaavatit.

 

Qasueqqallutit tikigit

Sullippatsigit! Timmisartorninni iluaalliulissaguit sulisunut saaffiginnigit. Maannangaaq – aallannginninni – aqqutaani iliuuserisinnaasannut siunnersuutit aajuku: Timmisartorninni imermik juicemilluunniit imerluarit, sukanganngitsunik atisaqarit, aamma nalunaaquttap akunnikkarlugit minutsini tallimani nissutit talitillu peqittaarlugillu siaaqqattaakkit. Timmisartup iluani aamma pisoqattaalaarsinnaavugit, soorunami ilaasut allat sulisullu ajoqusersornagit.

Nalunaaquttap nikinnerata nassatai

Nunarsuarmi sumiinneq apeqqutaatillugu nalunaaqquttat assigiinnginnerat malillugu nikittarnerit inuit assigiinngitsunik qisuariarfigisarpaat. Timippit nalunaaquttap qassinngornera nalusarpaa, immikkulli malugisarlugu. Nalunaaqquttat nikerarneri arlallit aqqusaarlugit timmisartoreerninni ilaatigut sinnarlunneq, naarlunneq, niaqorlunnik qasoqqanerlu misigisinnaasassavatit.

Timmisartorneq kitaaniit kangianut ingerlasimappat – soorlu Kalaallit Nunaanniit Danmarkimut – ajornerusarpoq. Kangimut ingerlaarnermi nalunaaquttap akunnerinik annaasaqarfiusarami.

Siunnersuutit marlussuit: Timmisartornerup nalaani sapinngisamik sivisuumik sinigit, tikinniariutaalu apuuffinni nalunaaqutaq malillugu inuunerit ingerlateqqillugu. Tunniutiinnassanngilatit aammalu imermik juicemillu imerluartarit.