Qeqertarsuup Tunuani qulimiguulimmik angalasussat ajoraluartumik kinguaattooqqapput. Qulimiguulik Ilulissaniittartoq H155 pilersaarutaasumik aserfallatsaaliorneqarpoq, ajoraluartumillu teknikkikkut misissorneqarnera ilimagisamit sivisunerusumik ingerlavoq, maannalu utaqqivarput qulimiguullip angallassinissamut piareernissaa.

Piareernissaata utaqqinerani qulimiguullit AS350-it marluk atorpavut, tamatumalu saniatigut Uummannamiit H155 qulimiguulik aamma atorlugu. Uummannamiittorli aatsaat pilersaarutaasumik timmsartuusinngikkaangat Ilulissaniittarpoq nunaqarfinnut Ilulissat eqqaanniittunut Qeqertarsuullu Tunuaniittunullu timmisartuussisarluni.

Ilaasut arlallit februaarip 19-ianniilli utaqqisimapput. Ilaasut ataasinngornermi februaarip 23-ani Uummannamiit qulimiguulimmik H155-imik angalanissamut nuunneqarput. Timmisartornissaali sila pissutigalugu taamaatiinnarneqarpoq. Aamma februaarip 24-ani timmisartuussinissamut pilersaarut sila pissutigalugu taamaatiinnarneqarpoq. Ajoraluartumik februaarip 25-ani timmisartoq AS350 timmisartuussisinnaasimanngilaq aquttussaqanngikkallarluni.

Ullumikkut februaarip 26-ani Uummannamiit qulimiguulimmik H155-imik Qeqertarsuup Tunuanut, Ilulissanut Aasiannullu timmisartuussisoqarpoq. Aqagu qulimiguuliutitsinnut AS350-mut aquttussaq aamma tikissaaq. Qulimiguulillu H155 Nuummi aserfallatsaaliorneqartoq piareerluni aqagu tallimanngornermi februaarip 27-anni ualikkut Nuummiit Ilulissanut ingerlanneqassalluni.

Kinguaattoornerit ajuusaarutigaagut, paasinninnissinnulli qujavugut.

Ornitannut apuunnissat sapinngisarput tamaat isumagisarparput, pilersaarutinilli eqqortitsiniarneq ilaatigut ajalusoortarpoq, issittumilu sila aalajangiisuulluinnartarluni. Taamaammat angalaninni pilersaarutaanngitsumik kinguaattuussaguit angalanissalluunniit allanngussappat quppernermi uani ataatsimoorput ilisimasariaqakkatit.

Angalanerit kinguaattuussappat allanngussappalluunniit, angalanissamut pilersaarut nutaaq sms-ikkut imaluunniit e-mailikkut ilinnut nassiutissavarput.

Eqqaamassavallu attavigisinnaaqqullutit angalaninni mobilip atukkavit normua e-maililunniit atukkat uagutsinnut ilisimatitsissutitut nalunaarutigissagakku. Illit nammineq ajornanngitsumik paasissutissat ilinnut tunngasut nutarsarsinnaavatit, uani 'Bilitsera'.

Bilitsit Air Greenlandimit pisiaanngippat, bilitsisiffinnut saaffiginnissaatit.

Aamma aallarfissat nittartakkatsinni uani Tikittussat aallartussallu - timmisartuussivissat, malinnaavigisinnaavat imaluunniit mittarfinni isiginnaarutini paasissutissiisarfinni imaluunniit Club Timmisa app– ikkut. Eqqaamajullu app-imiittoq ’malitat’ ikissagakku, taava timmisartumut ilaaffissannut tunngasumik allannguuteqassagaluarpat ingerlaannaq nalunaarutisissaatit.

Piaarnerpaamik ornitannut apuunnissat anguniarlugu angalanissannut allannguut pitsaanerpaaq isumagisarparput.

Angalanissamut pilersaarut nutaaq ilinnut naleqqutinngippat una, immersugassaq – atorlugu pilersaarummik allamik piumasinnaavutit, bilitsivilluunniit akiata utertinnissaa kissaatigalugu. Sullitanut kiffartuussivipput oqarasuaatikkut saaffiginnittunut ima ammasarpoq:

Oqarasuat:

+299 701212

Ammasarfiit:

Ataasinngorneq - Tallimanngorneq nal. 10:00-14:00

Arfininngorneq sapaallu: Matoqqavoq

Angalanissannut siunertarisat eqqortissinnaajunnaarukku, angalanerpit akiata utertinnissaa pisinnaatitaaffigaat.

Bilitsit Air Greenlandimit pisiaanngippat, angalanissavit allanngortinnissaanut imaluunniit akiata utertinnissaanut tunngatillugu pisiffigisannut saaffiginnissaatit.

Issittumi angalatilluni kinguaattoortarnerit ajoraluartumik angalanermut ilaasinnaasarput, mittarfimmilu sulisut sapinngisartik tamaat pitsaanerpaamik ikiuunniartarput. Piffissamik sivisuumik kinguaattoortoqartillugu, allagartanik nerissutissanik neqeroortarpugut, kinguaattoornerlu sivitsoraluttuinnassappat hotelimut inissinneqarnissat isumagisarlugu.

Uani Air Greenland-ip ikiorsiissutai pillugit atuarsinnaavutit:  
https://kundeservice.airgreenland.gl/hc/kl-dk/articles/4979235327260-Ilaaffissara-kinguaattoorpoq-qanoq-iliussaanga- 

Pisut suuneri apeqqutaatillugit aningaasanik taarsiivigitinnissat pisinnaatitaaffigisinnaavat. Taamaattumik pisinnaatitaaffitit quppersakkami uani pisinnaatitaaffitit – atuakkit. Malugeqquarpulli Air Greenlandi silap allanngorarneranut akissussaasuunngimmat.