5047

Air Greenlandip suliffeqarfissuani siulersuit qanittukkut 2025-mi 1. januaarimiit 30. juunimut ukiup affaanut nalunaarusiaq akueraat. Nalunaarusiami ukiup affaa ingerlatsinermi unammilligassanit annertuunit, soorlu silarlunnerata aammalu Nuup mittarfiani attaveqaatit nutaat atulernerinut atatillugu kinguaattoornerit attuumassutillit kingunerisaannit sunniuteqarfigineqarsimasoq takuneqarsinnaavoq. Taanna 2024-mi novembarip naaneranili Air Greenlandip nunami namminermi nunanullu allanut timmisartuussinerannut katersuuffiusimavoq, aammalu mittarfiit atulertussat nutaat pingasut siullersaattut atorneqarluni. 

2025-mi ukiup affaani siullermi ukiup affaanut naatsorsuutit akileraannginnermi DKK 87,4 millioninik amigartoorfiupput, taamaalillunilu amigartoorutit siorna taamaalerneranut sanilliullugit DKK 66,3 millioninik amerlillutik. Piffissai tassani timmisartut iluinik atuineq ukiunut siuliinut naleqqiulluni appariaateqarpoq, naak nunanit tamalaanit ilaasut amerligaluartut. Angusat amigartoorfiunerinut peqqutaasut ukuunerupput

• Oqaluttuarisaaneq ataatsimut isigalugu aatsaat taama silarlutsigimmat

• Mittarfinni atortut, taakkununngalu mittarfiit quasattut, isumannaallisaanermi misissuisarnermut atatillugu kinguaattoornerit, nassatanik tunniussisarfiit aammalu Nuup Mittarfiani ikummatissanik assartuussinermi utaqqisarnerit ilaatinneqarput
  

• Kingoraartissanik tikittussanik sivisuumik utaqqisarnerit

Pissutsit matuma siuliani taaneqartut inernerisaannik Jet atorlugu timmisartuussinerit 59-it taamaatinneqarput, siorna taamaalerneranut, Kangerlussuup angallannikkut eqiteriffittut atorneqarallarneranut pingasuusunut naleqqiullugu.

Timmisartut suluusallit, Dash 8-t, timmisartuussinerit pilersaarutit malillugit naammassineqartut 72%-inut (2024: 83,9 %) apparput, aammalu piffissamik eqqusarnerat 46,6%-inut (2024: 71,1 %) apparlutik.   Nuummi angallannikkut eqiteruffimmut nutaamut nuunnermi nunami namminermi angallanneq allannguuteqangaatsiarpoq.   Siumut utimullu angallassisarnerit 53%-inik ikileriarput, ilaasullu sinneri maanna agguaqatigiissillugu 54%-inik isorartunerusumik timmisartuunneqartalerput, tamannalu peqqutaalluni nunatsinni niuernermi akit qaffakkaluartut aningaasaqarneq annikillisinneqangaatsiarpoq.

Aningaasartuutit tamarmiusut, isumakkeerinninnerit ilanngullugit, DKK 89,5 millioninik (+10,3 %) amerlipput, tamannalu ataatsimut isigalugu timmisartunik angallassinerit kinguaatoornerillu peqqutaallutik ingerlatsinerup akornusersorneqartarneranut atatillugu tunisassiat annertusinerannik aningaasartuutillu amerlanerulernerannik peqquteqartutut oqaatigineqarsinnaavoq. Piffissamik eqquinngitsoornermut toqqaannartumik aningaasartuutit 2025-mi ukiup affaani siullermi DKK 70,9 millioninut amerlipput, 2024-mi ukiup affaani siullermi DKK 36,5 millioniusimallutik. Sulisunut aningaasartuutit DKK 12,8 millioninik amerlipput, piffissarlu tamakkerlugu atorfeqartinneqartut 711-upput, ukiup siuliani 704-usimallutik.

Ingerlatsinermiit aningaasat ingerlaartut +169,7 millioniupput, suliffeqarfissuullu akiliisinnaassuseqarnerani uninngasuutit DKK 164,6 millioniupput, tamannalu naatsorsuutigineqareerpoq. Nammineerluni aningaasaatit DKK 726,3 millioniupput, akiliisinnaassuseq 34,3%-imiilluni.

Ukiup affaani siullermi ineriartorneq tunngavigalugu Air Greenlandip siulersuisuisa ukiumi angusassanut naatsorsuutigisatik appartippaat, aammalu avataaniit pissutsit inernerusussanut sunniuteqaqqinngippata 2025 tamakkerlugu akileraannginnermi DKK 30,0 millioninik amigartooruteqarnissaq naatsorsuutigaat. Pisinnaasat pitsaanerpaamik atorluarneqarnissaat anguniarlugu angalanissanut pilersaarut naleqqussarneqarluni suliarineqarpoq, taamatuttaarlu ilaasut piffissamik eqquisinnaannginnermit eqqugaasut pitsaanerusumik sullinneqartarnissaat sulissutigineqarpoq. 

Ukiup affaanut inernerusup amigartoorfiunera amerlasuunit tupaallaatigineqarnavianngilaq, inuit tamat, pingaartumik Kalaallit unaanniittut nunap immikkoortuini arlalinni aallartussanik taamaatitsisarnerit kinguaattoortarnerillu amerlasuut peqqutigalugit Air Greenlandip unammilligassaqarnera malugisimassammassuk. Ingerlatsinermi akornusersuutinit toqqaannartumik eqqugaasartut tassaapput ilaasut, nassiussisimasut aammalu Air Greenlandimi sulisut. 

- Ukiorpassuit angallasseriaatsit ataasiinnaat atugarereerlutigit, aammalu maanna pissusiviusunut nutaanut naleqqussartussanngornitsinni allannguinerit annertuut atorpagut. Unammilligassanit, Air Greenlandip toqqaannartumik sunniuteqarfigisinnaasaasa avataaniittunit sunnersimaneqarpugut, kisiannili aamma naammassinnittussanut ilaavugut. Taamaattumik akisussaaffipput tigullugu iliuuseqarfigisinnaasatsinni suliniutinut, ingerlatsinermik patajaallisaataasussanut suleqataavugut. Timmisartuussinerit pilersaarutit malillugit naammassineqarnissaat pitsannguiniarpugut, tamatumalu peqatigisaanik aaqqiissutissanik atuutsinneqalersussanik ingerlatsiinnarnissarput aallutissavarput, aammalu suleriaatsinik, atuisut atuisutut misigisassaannik, pingaartumillu ingerlatsinermi akornusersuutinik pisoqartillugu, pitsaanerulersitsissalluta. Akornusersuutit taamaattut pinngitsoorsinnaanngilagut, sila uagut sunniuteqarfigisinnaanngisarput tunngavissanut ilaammat, Jacob Nitter Sørensen oqarpoq nangillunilu;

Air Greenlandip suliffeqarfissuani siulittaasoq Malik Hegelund Olsen erseqqissaavoq, timmisartuutileqatigiiffik ingerlatsinermut illunut, attaveqaatinut nutaanut iluaqutaasussanut aningaasaliinermigut inuiaqatigiinnut akisussaaffimminik annertuumik tigusisimasoq. 

- Maanna siunissamut ungasissumut anguniakkatsinnik aallussiinnarnissarput pingaaruteqarpoq, naak siunissamut qanittumut unammilligassaqarluta artorsartinneqaraluarluta. Qaqortumi aamma Ilulissani mittarfissat patajaatsumik ingerlatsilernissamut piareerneqassapput, taamaalilluta siunissamut ungasissumut periusissiagut naammassisinnaassagatsigit. Tamanna nunatta immikkoortuinut, innuttaasunut najukkanilu inuussutissarsiortunut ilaqutaassaaq. Taamaalilluta Kalaallit Nunaata aningaasaqarnikkut piujuartitsiffiunerusumik ineriartornissaanut kivitseqataassaagut, Malik Hegelund Olsen oqarpoq nangillunilu;

- Maanna aasaanera angasoqarnerpaaffiusoq naavoq, maannalu aqutsisut naliliisussanngorput, aammalu pitsannguiniarluni suliniutinik nutaanik, siunissamut ungasissumut periusissiamik naammassinniffiusussanik aallartitsisussanngorlutik, siulittaasoq oqarpoq.