Illuatungeriit isumaqatigiissutaat 2021-mi decembarip 31-ani atorunnaarpoq, taamaammallu isumaqatigiinniartut timmisartumi sulisut atugaat pillugit ukiarli isumaqatigiinnialerput. Arlaleriarluni isumaqatigiinniartoqaraluartoq isumaqatigiissutip nutaanngortinnissaa pillugu isumaqatigiittoqarsinnaasimanngilaq, isumaqatigiinniarnerlu maanna ajalusoorpoq. 

Air Greenland nunarsuarmi timmisartuutileqatigiiffiit allat assigalugit Covid-19-ip tuniluunneranit ukiuni marlunni sunnerteqqangaatsiarpoq. Tamannali ingerlatseqatigiiffiup siunissami marlunnik nutaanik mittarfissuartaarnissaanut, taamaalillunilu unammillernerup annertusinissaanut, allannguinngilaq.  

- Ajornartoornerup aallaqqaataanili aningaasaqarnikkut eqqortumik aaqqiissuteqarnitsigut, taamaalillutalu timmisartuutileqatigiiffinnut allanut sanilliulluta sulisutta akissarsiatigut annikinnerungaatsiartumik eqqugaaneratigut Air Greenland Covid-19-ip ukiuni marlunni tuniluunnerani aningaasaqarneq eqqarsaatigalugu aniguilluarpoq. Taamatut oqariarluta siunissaq ornitarput, mittarfissuit nutaat marluk unammillernerlu annertunerusoq, eqqarsaatigalugu piviusorsiortariaqarpugut. Air Greenlandimi akissarsiat sulinermilu atugassarititaasut pitsaasut attatiinnarumavagut, tamannali siunissaq ungasinnerusoq eqqarsaatigalugu aamma nammassinnaasariaqarparput. Tamatumunnga atatillugu isumaqatigiissutini maanna atuuttussani pisisartutsinnut billetsinik akikinnerusunik siunissami neqerooruteqarsinnaanissaq aningaasaqarnikkut inissaqartittariaqarparput, Air Greenlandimi pisortaaneq Jacob Nitter Sørensen oqarpoq. 

Isumaqatigiinniarnermi akissarsisitseriaatsit assigiinngitsut saqqummiunneqarsimasut, tamarmilli illuatungiliuttumit itigartitsissutigineqarsimasut Air Greenlandimi isumaqatigiinniarnermut aqutsisoq, Sulisoqarnermut pisortaq Mads B. Christensen ilisimatitsivoq. 

- Timmisartuussisarneq tamakkiisumik isigigaanni unammillernartoqarpoq, siunissarlu ungasinnerusoq eqqarsaatigalugu Air Greenlandimi akissarsiat unammillersinnaasuussasut anguniagaavoq, isumaqatigiissutigullu ullumikkut atuuttut qaffasissumik inissisimareermata FPU-mik isumaqatigiinniarneq immikkut ittumik ajornakusoorpoq. Neqeroorutigisatsinni sulinissamik pilersaarusiornitsinni ullumikkumiit eqaannerusumik pilersaarusiorsinnaajumalluta akissarsiatigut qaffaanissamik piviusorsiortumik kissaateqarpugut, Mads B. Christensen oqarpoq.  

Ukiut kingulliit pingasut Air Greenlandimut unammillernarsimapput, ukiut siulliit marluk  Covid-19-ip tuniluunneratigut, suliffeqarfilli allanut sanilliullugu ajornartoornermit ajorisassaanngitsumik aniguigaluartoq ukiut marluk taakku sulisunut artornarsimapput. Sullissineq 2022 tamaat aammattaaq silarlungaatsiarneranik, taamaalillunilu angalasunut timmisartuussinerpassuarnik taamaatitsiinnarnermik kinguaattoornermillu, eqqugaavoq.  

 - Ukiuni marlunni kingullerni angalasut Corona pissutigalugu juullisioriarnerinik kalluarneqangaatsiareersullu FPU-mit suliumajunnaartoqarnissaanik aappassaanik nalunaarut juullisiorianik angallassinitta nalaani takkuteratarsinnaavoq, tamannalu ajuusaarutigeqaara. Isumaqatigiissuteqarnissarput, taamaalillutalu akerleriilinnginnissarput, soorunami neriuutigaara, Jacob Nitter Sørensen oqarpoq.    

FPU suliumajunnaartoqarnissaanik aappassaanik nalunaaruteqarpat/nalunaaruteqassappat Forligsinstitutionenimi isumaqatigiissuteqartoqanngippat ullut arfineq-marluk qaangiuppata akerleriinneq atuutilissaaq. 

Taamaattoqassappat Air Greenlandip timmisartuussinissat tamaasa taamaatillugillu billetsinut akiliutaasut utertillugilluunniit billetsit allanngortissavai.