Air Greenland Maniitsoq Tour Boatsimik suleqateqalerpoq, timmisartukkut angallassinerit arfinillit saniatigut Maniitsup Nuullu akornanni sapaatip akunneranut marloriarluni immakkut angalatitsisarnissamik.

Nuup mittarfiata nunat tamalaat akornanni timmisartuussinernut qitiusutut inissisimaneranut atatillugu Kalaallit Nunaanni tamarmi – Avannaaniit kujammut kangianullu – timmisartuussinerit pilersaarusiorneqarnerat pitsanngorsarneqarsimavoq. Pilersaarusiaq nutaaq aqqutigalugu nunap immikkoortuisa akornanni ullormut ataatsimut attaveqarneq pitsaanerulerpoq, aamma Nuummit nunanut allanut timmisartuussinerit eqaannerulerlutik.

Taamaattorli taassuma kingorna Maniitsumut timmisartuussinerit ikilisimapput. Taamaattumik suleqatigiinneq manna Maniitsumut Maniitsumiillu angalasunut inuussutissarsiortunullu nutaarsiassaavoq pingaarutilik.

Air Greenlandimi Net Revenue Manager, Tomas Leth-Jørgensenip, umiatsiaatilinnik isumaqatigiissuteqartoqarsimanera nuannaarutigaa.

 - Maniitsumiit saaffiginnittoqartarpoq inuussutissarsiortunit takornarialerisunillu Maniitsumut Maniitsumiillu angallassinerit amerlanerulernissaat kissaatigalugu. Kujataani Tunumilu angallassisunik assingusunik isumaqatigiissuteqareerpugut, tamannalu angallassinissamut pilersaarutitsinnut patajaallisaanerulersitsivoq, timmisartuussisoqarsinnaanngikkaangat taakku aamma taartaasarput, Thomas Leth-Jørgensen oqarpoq nangillunilu:

- Maniitsoq Tour Boat suleqatigalugu Maniitsup Nuullu akornanni angallassinerit amerlanerulernissaat kissaatigineqarmat nuannaarutigaarput. 

Aallaqqaammut eqqaaneqartutut Maniitsoq Tour Boats sapaatip akunneranut marloriarluni Air Greenlandimut angallassisalerpoq. Sapaatip akunneranut Nuup Maniitsullu akornanni timmisartuussinerit saniatigut Targa 37-mik angallassisoqassaaq. Tamatuma saniatigut Greenland Escape isumaqatigiissuteqarfigaa Nuummi mittarfiup sissiukkamilu aallarfissap akornanni bussertitsissalluni.

Sapaammi apriilip 27-ani Maniitsoq Tour Boat siullermeerluni angallassivoq, GL-normu 7741-imik normulimmik Maniitsumiit Nuummut utimullu GL-normu 7741-mik normoqarluni ingerlalluni. Maniitsoq Tour Boat-imut aamma suliassaq pingaaruteqarpoq, piffissallu ingerlanerani qanoq ingerlassanersoq pissanngatigineqarpoq.

Air Greenlandip sillimaniarneq pillugu immikkoortortaqarfiata Maniitsoq Tour Boat suleqatigalugu angallat sillimaniarneq pillugu akuerisimavaa, immakkut silaannakkullu angallassinermi mittarfinni oqartussaasut piumasaqaataat naapertorlugit.

GL7741 

Maniitsumit aallartassaaq sapaatit pingasunngornerillu tamaasa nal. 06.30. Timmisartoqarfimmi pisattanik tunniussisoqassanngilaq, avalannissarli akunnerup affaanik sioqqullugu, tassa nal. 06.00 ilaasussat MTB´p puttasuineereersimassapput.

Angalaneq akunnernik 3-nik minutsinillu 30-nik sila apeqqutaatillugu sivisussuseqarpoq. Aqqutaani te, kaffi kaageeqqallu sassaalliutigineqassapput. Angallat Nuummut sissiukkami Tidevandstrappemut tikittassaaq nal. 10.00.

Nuummi mittarfimmiit ingerlaqqissagaanni, sissiukkamiit mittarfimmut Greenland Escapep bussiinik ingerlaqqinneq akimut ilaareerpoq, taamaalilluni timmisartumiit ingerlaqqinneq angumerineqarsinnaalluni.

GL 7742 

Nuummiit sapaatit pingasunngornerillu tamaasa nal. 12.15 avalattassaaq. Nassatanik tunniussineq mittarfimmi Air Greenlandip tunniussiviani pisassaaq, kingusinnerpaamik nal. 11.15. Aallarnissaq sioqqullugu Nuummut tikissimaguit, nassatatit aassavatit mittarfimmilu Air Greenlandip nassatanik tunniussivianut saaffiginnillutit. 

Nal. 11.45 mittarfimmiit Greenland Escapep bussii aallartussat ilaaffigisinnaasaat sissiukkamut Tidevandstrappemukartut aallassapput, angallallu nal. 12.15 avalassaaq. 

Angalaneq akunnernik 3-nik minutsinillu 30-nik sila apeqqutaatillugu sivisussuseqarpoq. Aqqutaani te, kaffi kaageeqqallu sassaalliutigineqassapput. Angallat Maniitsumut tikittassaaq nal. 15.45.