2133

2022 juulip 7, sisamanngorneq


Air Greenlandip aamma Visit Greenlandip suleqatigiinnertik nukittortippaat

Sapaatit akunneranni siuliani nunatsinni timmisartuutileqatigiiffiup aamma nunatsinni takornariaqarnermut siunnersuisoqatigiiffiup sinaakkutissatut isumaqatigiissut aamma suleqatigiinnissamut isumaqatigiissutit marluk atsiorpaat. Ataaseq nunatta nittarsaannissaanut tunngasuuvoq, alla inuussutissarsiornermi suleqataasumut takornariartitsisarnermut nersornaatissaavoq.

Suleqatigiinnit sinaakkutissatut isumaqatigiissut, nunatsinni takornariaqarnermik annertusititsiniarluni suliassanik ataatsimoorussanik pilersitsinissamik, kiisalu nunatsinni takornariaqarnermik inuussutissarsiuteqartunut attaveqaatinut tapersersuinissamik suliatigullu ineriartortitsinissamik siunertaqarfiusoq sisamassaanneerluni sivitsorneqarpoq. Suleqatigiit isumaqatigiissusiornermikkut, najukkani nunap immikkoortui akimorlugit takornariartitsisartut aammalu nunani allani sullissisunut niuernikkut suleqatigiiffissanik pilersitsisoqarnissaanut tapersersuerusupput.

 

- Maani nunatsinni takornariartitsisarnermik inuussutissarsiuteqartut qanillugit suleqatiginissaat immaqa aatsaat taama pingaaruteqartigaaq, mittarfiillu nutaat ammarneqarnerinut aamma takornariaqarnermi piujuartitsiviusussanik sinaakkusiinissamut akisussaaffik malinnaasussaavoq. Taamaattumik suleqatigiilluarnerup, ukiuni arlalinni Visit Greenlandimut ingerlassimasatta attatiinnarnissaa nukittorsarnissaalu pissusissamisoorluinnarpoq. Nunatsinni takornariaqarnermut tapersersueqataanissaq, tamatumalu peqatigisaanik niuerfinni ataatsimut aallutatsinni takornariarusuttunut pilerisaarinissaq Air Greenlandip suliffeqarfissuani pingaarnertut suliassaraarput, tamatumanilu piviusunngortitsisarneq Visit Greenland suleqatigalugu ingerlatiinnarsinnaalerparput, Air Greenlandimi CEO Jacob Nitter Sørensen oqarpoq.

 

Visit Greenlandimi pisortaaneq Anne Nivíka Grødem itisiliivoq:

 

- Niuerfiit nalunaarsuiffiginerisigut ilisimasagut annertusassavagut, ilisimasallu taakku akunnitsinniinnaq avitseqatigiiffigineqartassanngillat, kisiannili aamma sullissisut ilaatinneqassapput. Takornarianut tunisassiat qinigassat amerlanerusut pigissavagut, aammalu sullissisunut tapersersuinikkut piffissaq takornariartitsiffiusoq sivitsussavarput, aammalu naggataagut minnerunngitsumillu nunatta pilerisaarutigineqarnera nukittorsassavarput, oqarpoq.

 

Siunnerfeqartumik pilerisaarinissaq

Isumaqatigiissutinit ataaseq Kalaallit Nunaata Nunani tamalaani aammalu nunat allat tusagassiorfiisigut pilerisaarutigineqarnissaanut tunngasuuvoq. Kalaallit Nunaata soqutigineqarnera annertusiartorpoq, tamannalu tusagassiortorpassuarnit, Kalaallit Nunaat pillugu allaaserisaqarusuttunit filmiliorusuttunilluunniit malugisimaneqarpoq.

 

- Air Greenlandimut tunngatillugu tusagassiortuniit saaffiginnissutit amerliartortut misigisarparput. Apersuinissamik kissaateqarnermiit timmisartumi filmiliornissamut akuerineqarnissamut, imaluunniit bilitsinik ujarlernermut. Tamanna ajunngilluinnarpoq. Visit Greenland qaninnerusumik suleqatigalugu nunatsinnik nittarsaassinermi siunnerfeqarnerusinnaavugut, Jacob Nitter Sørensen oqarpoq.

 

Pingaartumik Amerikap avannaa niuerfiit, Kalaallit Nunaata annertunerusumik nittarsaanneqarfissat ilaattut tikkuarneqarpoq. Niuerfiit allat pineqartut tassaapput Nunat Avannarliit, Tuluit Nunaat, Tyskland aamma nunat Benelux-imiittut. Visit Greenlandip pisortaanera Anne Nivíka Grødem itisiliivoq:

 

- Niuerfiit nutaat pulaffigigaanni, ornigassamut soqutiginninneq eqqumaffiginninnerlu annertusitinniarlugit isumalluuterpassuit pisariaqartinneqartarput. Taamaattumik taakku pillugit suleqateqarnissaq pingaaruteqarpoq, taamaalilluta ataatsimoorluta isumalluutigut pitsaanerpaamik atorsinnaagatsigit kivitseqatigiissinnaallutalu, Anne Nivíka Grødem oqarpoq nangillunilu:

 

- Amerikami avannarlermi niuerfiit ineriartornissamut periarfissaqarfiupput, mittarfiillu nutaat atulerpata Kalaallit Nunaat tikikkuminarnerulertussaavoq. Taamaattumik maannangaaq angalatitsisartunut qitiusunut attaveqarnissap sulissutiginissaa, aammalu ornigassani ineriartortitsinermut tapertaanissaq pingaaruteqarpoq, takornariaqarnermut siunnersuisoqatigiinni pisortaaneq oqarpoq.

 

Takornariartitsisarnermut nersornaat

Aamma ’Greenland Tourism Award’-ip nunatsinni takornariartitsiartunut, pingaartumik tunisassianik piujuartitsiviusumik ineriartortitsinermikkut malunniuteqartunut tunniunneqartaleqqinnissaa isumaqatigiissummut ilaavoq.

 

- Takornariaqarnermik piujuartitsiviusumik ineriartortitsinermi salliusunik ersarissaanissaq nersuinissarlu ataatsimoorluta soqutigisaraarput. Taamaattumik nersornaat taanna atorlugu takornariaqarnermi suliffeqarfinnut, isumannaassuseq, pitsaassuseq nutaaliornerlu siunnerfigalugit tunisassiaminnik piujuartitsiviusumik ineriartortitsisunut nersornaasiisassaagut, Anne Nivíka Grødem oqarpoq.

 

Nersornaat takornarianut tunisassianik aningaasaqarnikkut, isumaginninnikkut avatangiisitigullu piujuartitsiviusumik ineriartortitsinissamut siunnerfeqarnissamullu kajumissaataassaaq aallussiinnarfiussallunilu. Tassalu nersornaat imminut akilersinnaasoq anguniarusunnartorlu.

 

- Nersornaat akuersaarneqarnermigut, taaneqartarnermigut pissarsiarineqartarnermigullu suliniutinik piujuartitsiviusunik aallussinissamut iluaqutaassaaq, tamannalu aqqutigalugu inuussutissarsiummi tassani piujuartitsiviusunik siunnerfeqarnissamut suli amerlanerusunut kaammattuutaassalluni, Air Greenlandimi CEO Jacob Nitter Sørensen oqarpoq.

 

1. juuni 2022