Isumaqatigiissutissaq nutaaq pillugu piffissami sivisuumi isumaqatigiinniarnerigaluit ajalusoormata Air Greenlandip suliumajunnaarnissamut ilimasaarut siulleq 2022-mi novembarip 16-iani FPU-mit tiguaa. Maanna suliumajunnaarnissamut ilimasaarutip aappaa nalunaarutigineqarsimasoq Air Greenlandimi ilisimatinneqarpugut, tassanilu nutaamik isumaqatigiissusiortoqanngippat timmisartumi sulisut suliumajunnaarnerat 2022-mi decembarip aappaani ulloq nalinginnaasumik suliffiusoq aallartippat aallartissasoq FPU nalunaaruteqarpoq. 

Air Greenlandimi pisortaaneq, Jacob Nitter Sørensen, nalunaarummut ajuusaarlunilu timmisartuussinissat unitsittariaqarnissaannut killittoqassanngitsoq kissaatigaa. Forligsinstitutionimi aaqqiissutissamik nassaartoqarsinnaasoq suli upperaa. 

- Timmisartumi sulisugut iluareqaagut, nalunngilaralu atuisutta aama iluareqigaat. Soorunami tamaanga killinnissaq kissaatiginngikkaluarparput, neqeroorutigisagulli piviusorsiortuusut eqqortumik unneqqarilluta oqartariaqarpugut. Isumaqatigiissut nutaaq naapertorlugu immikkut ittumik aningaasartuutigiligassagut taamaallaat billetsit akii atorlugit matussusersinnaavagut. Aningaasarsianik qaffaaneq neqeroorutigisarput malillugu sulinissamik pilersaarusiornerup eqaannerulernissaa isumaqatigiinniarnermi kissaatiginikuuarput. Siunissami patajaannerusumik inissisimaniarutta pisariaqartipparput – siunissami unammillerneq aqqusaagassarput nammassinnaassagutsigu aningaasaqarnikkut aamma taamaattariaqarpoq, Jacob Nitter Sørensen oqarpoq.

Illuatungeriit isumaqatigiissutaat 2021-p naanerani atorunnaarpoq, upernaamilu isumaqatigiinniartoqaqattaareersoq 2022-mi ulapaarfiup nalaani isumaqatigiinniarnerit unitsikkallarneqassasut isumaqatigiittoqarpoq. Isumaqatigiinniarnerit ukioq manna oktobarimi aallarteqqinneqarput, illuatungeriilli piffissami sivitsortumi isumaqatigiinniareersut isumaqatigiinniarneq ajalusoorpoq. FPU suliumajunnaarnissamut ilimasaarutip siulliup nalunaarutigineqarneranut tunngatillugu timmisartumi sulisut Coronap nalaani sulingaatsiarsimaneralugit tusagassiutinut oqaaseqarpoq. 

FPU oqarluartaaginnartoq Air Greenlandimi isumaqatigiinniarnermut aqutsisoq, Sulisoqarnermut pisortaq Mads B. Christensen isumaqarpoq. 

- Coronap nalaani timmisartuussinikinnerungaatsiarpugut, sulisugullu taamaalillutik timmisartuussinikinnerullutillu sullissinikinnerupput, taamaammat timmisartumi suliaqarneq annikinneruvoq. Sulisut taakkorpiaat sulisunut allanut sanilliullugit Coronap nalaani sulinikinnerunikuupput, oqarpoq.  

Timmisartumi sulisut aningaasarsiaasa qaffannissaat qaffakkiartuaarnerallu 2020-mi apriilimiit 2022-mut januaari ilanngullugu unikaallatsinneqarsimasut FPU-mit aamma erseqqissarneqarpoq, taamaalillutillu coronap ajornartoorfiunerata nalaani akissarsiatigut 5%-imik appaaffigineqarput. Matumani FPU aamma oqarluartaarpoq.  

- Coronap nalaani sulisoq kinaluunniit akissarsiaminik appaaffigineqassanngitsoq Air Greenlandimit kissaatigineqarpoq. 5%-it eqqaaneqartut kingorna utertinneqarnikuusut peqatigiiffiup atorfiit ilaanik pinngitsoorneqarsinnaasunik tigumminniinnarumalluni aaqqiissutissatut nammineq kissaatiginikuuai, Mads B. Christensen naqissusiivoq.  

Ingerlatseqatigiiffik ukiut tamaasa sinneqartooruteqartarmat timmisartumi sulisut kissaataat Air Greenlandimit tunniunneqarsinnaanngitsoq FPU-mit eqqaaneqarpoq. 

Timmisartuutileqatigiiffiit allat ingerlaniapiloortut ingerlatseqatigiiffik siorna sooq sinneqartooruteqarsimanersoq Air Greenlandimi pisortaaneq Jacob Nitter Sørensen erseqqissaavoq.  

- Coronap nalaani Air Greenlandimi suliffiit pigiinnarneqarnerinut peqqutaasoq eqqaamassavarput, Air Greenlandimmi coronap nalaani sinneqartooruteqarnera inuiaqatigiit Nunatta Karsia aqqutigalugu akiliinerisigut Air Greenlandip oqartussanut timmisartuussisinnaallunilu ajornartoornermi sillimaniarnermut ikiuutaasinnaasimavoq. Nunatsinni nunap attaveqaataanut pingaarutilinnut ilaavugut. Tamatumunnga ilanngullugu siorna ukiup naalernerani Corona pissutigalugu killilersuinerit atorunnaarsinneqarmata aqqutitsinni angallattoqangaatsiarmat ingerlalluarpugut, Jacob Nitter Sørensen erseqqissaavoq.   

Teknikerillu isumaqatigiinniarnerit upernaaq ajalusoormata Air Greenland mattussinissamik ilimasaaruteqarpoq. Air Greenland timmisartumi sulisunik isumaqatigiinniarnermi taamaaliorniarnani aalajangerpoq.  

- Ingerlatseqatigiiffimmi aaqqiagiinngissuteqarnissaaq juullillu nalaani angalanernik eqquinissaq kissaatigineqanngitsoq Air Greenlandip mattussinissamik nalunaaruteqannginneranut peqqutaavoq. Isumaqatigiinniarnikkut aaqqiisinnaanissaq kissaatigiuarnikuuarput, sulilu kissaatigaarput. Forliginstitutionimi isumaqatigiissuteqarsinnaalluta taamaalillutalu aaqqiagiinnginnissaraluamik pinngitsoortitsisinnaalluta suli neriuutigaarput, Air Greenlandimi pisortaaneq Jacob Nitter Sørensen oqarpoq. 

- Timmisartumi sulisugut timmisartuussisartunut allanut sanilliullugit sulinerminni pitsaasumik atugassaqartinniarlugit isumaqatigiissusiornikuuvugut, isumaqatigiissulli ilaatigut killeqartitsimmat piffissaq suliffiusoq akilertagarput tamaat atorluarsinnaanngilarput. Ingerlatseqatigiiffik siunissami unammillernerup annertusinissaanut piareersarumallugu tamanna Air Greenlandimit allanngortinniarneqarpoq. Taamaammat akilikkagut pissarsiariumallugit sulisutta piffissaq suliffigisaat eqaannerusumik pilersaarusiorsinnaanissaa kissaatigigatsinut akissarsiat ilaasa qaffanneqarnissaat aamma kissaatigaarput.  

Illuatungeriit marlunngornermi novembarip 29-ani nal. 12 Forligsinstitutionimi ataatsimiinnissaminnut aggersarneqarput, illuatungeriillu tassani isumaqatigiinniassapput.  

SAR aamma Medevac timmisartumi sulisoqannginnamik suliumajunnaartoqassagaluarpat eqqugaassanngillat.