Illuatungeriit isumaqatigiissutigineqartut oqaaseqarfigiumanngilaat, Forligsinstitutionili ikiortigalugu ukiuni sisamani atuuttussamik isumaqatigiissuteqarnertik nuannaarutigalugu oqaatigiumavaat.

Taamaalilluni juullikkunni angallannissaq pilersaarutaasut naapertorlugit ingerlanneqassaaq.

Air Greenlandimi Sulisoqarnermut Ingerlatsisoq Mads B. Christensen naatsumik oqaaseqarpoq:
- Piffissami sivisuumi suliffimmik kajuminnartumik unammillersinnaasumillu pilersitsinissatta maanna ukkatarilersinnaanissaa nuannaarutigaara.

Sulinissaq ilaasortallu sulinerisa akuersaarneqarnissaat qulakkeerneqarmat angusat aammattaaq iluarisimaarneqartut Flyvebranchens Personale Union oqaaseqarpoq.

- Ilaasortatta sulinerat sulinerisalu pitsaassusaat akuersaarlugu pitsaasumik angusaqaratta nuannaarutigaara, Flyvebranchens Personale Unionimi siulittaasup tullia Anders Mark Jensen oqaaseqarpoq.

Timmisartumi sulisut sullisaat arnanit angutinillu immikkut atorneqartartut 2023-mi assigiissaartinneqalissasut illuatungeriit isumaqatigiissummik nutarsaanermi immikkut ittumik isumaqatigiissutigaat.

Piffissami sivisuumi arlaleriarluni isumaqatigiinniartoqartaraluartoq - 2021-mi ukiakkut aallartikkami maanna akunnerit 29-it Forligsinstitutionimeereerluni naammassineqartoq - isumaqatigiinniarnerit kinguneqartussamik torersumillu ingerlanneqarsimasut illuatungeriit tamarmik oqaatigaat.

Isumaqatigiissutip pisinnaatinneqartunik ataatsimiisitsinikkut maanna akuerineqarnissaa pisortatigoortumik piumasaqaataavoq. 

Air Greenlandimi pisortaaneq Jacob Nitter Sørensen naammagisimaarinnillunilu aaqqiagiinnissaraluaq taamaatinneqarmat oqiliallaqqavoq.

- Pilersaarutit malillugit suliassagut ingerlassinnaaleratsigit oqiliallaqaanga. Atuisut, sulisut ingerlatseqatigiiffillu sinnerlugit juullimi angallannerup pilersaarutit naapertorlugit ingerlanneqarsinnaalernera oqiliallaatigeqaara, atuisullu paasinnilluarnerinut qutsavigiumavakka, Jacob Nitter Sørensen oqarpoq.