Danmarkimi angallannikkut oqartussaasut Trafikstyrelsen Greenland Airportsimi misissuinerup kingunerisaanik peqqussuteqarnermigut Nuup mittarfiata qanittuani silaannarmut atatillugu killilersuivoq. killilersuineq septembarip 23-ani nal. 18:00-miit erngerluni atuutilerpoq, timmisartumik angallannerup isumannaannerulernissaa siunertaralugu.



Air Greenlandimi paasilluarparput Trafikstyrelsen oqartussaasutut naliliisimammat maannakkorpiaq pisariaqartumik,  isumannaallisaaneq timmisartuutileqatigiinni pingaarnerpaatikkatsigu. Killilersuinermi annertuumik kinguneqassaaq, Air Greenlandimuinnaanngitsoq aammali sullitatsinnut, Kalaallit Nunaannili attaveqaasersuutit imminnut atanissaannut, taamaattumillu pisariaqarluni paasissallugu killersuinerit Air Greenlandip timmisartuussineranut qanoq sunniuteqassasut.



Air Greenlandip angallavii piorsarneqarsimapput hub-and-spoke-imik taallugu attaveqaatitut, timmisartut amerlanersaat angallannikkut katersuuffiunerpaami (hub) Nuummi aallaaveqarlutik, maani naapeqqillutik kingorna siumut utimullu uterlutik. Taamaaliornikkut ullormi ataaatsimi illoqarfiit nunaqarfiillu kiisalu nunat tamat akornanni attaveqarsinnaalluni.



Nunami Nunatsitut ittumi ornigassarpassuaqartumi ikittunillu angalasoqarfiusuni taamatut aaqqissuussineq attaveqaasersuutitigut imminut atanermut pingaarluinnartuuvoq.



Tamanna tunngavigalugu Air Greenland timmisartuliisarpoq, inuttalersuilluni mittarfinnilu sulisoqarluni kiisalu Nuup mittarfiani qaqugukkut mittoqarlunilu tingisoqarnissaanut piffissalerneqarluni. Air Greenlandimut pingaartuusimavoq angalasup sapinngisamik sivikinnerpaamik angalanissaa, piffissaq timmiffiusoq angalasumut aaalajangiisuusarmat.



Killilersuinerit taakku eqqunneqarnissaasa tungaanut aaqqissuussinermi Nuup mittarfiani ataatsikkut aallartut mittullu amerlasarsimapput, maannakkullu taamaaliortoqarsinnaajunnaarpoq.

Maanna Nuup mittarfiani ingerlatsinermut nutaamik periusiliortoqarpoq, ”2-4-4”-mik taasamik, tassalu minutsit 60 iluanni timminerit qassit ingerlanneqarnissaat, tassalu akunnerup ataatsip ingerlanerani amerlanerpaamik imaatut pilersaarusiorneqassallutik:


•    tikinnerit 2
•    aallarnerit 4
•    katillugit annerpaamik ingerlatat 4



Periutsimi Nuup mittarfiani ingerlatat qassit ingerlanneqassanersut amerlanerpaaffilerneqarput. Aajuna 60 minutsit iluani qanoq isikkoqarsinnaaneranut assersuut:



•    tikinnerit 2 + aallarnerit 2 = ingerlatat tamakkiisut 4
•    tikinneq 1 + aallarnerit 3 = ingerlatat tamakkiisut 4
•    tikinnerit 0 + aallarnerit 4 = ingerlata tamakkiisut 4



Tamatuma saniatigut ingerlatat akornisigut sivikinnerpaamik minutsit 5-iiusariaqarput tikinnerillu marluk akornisigut minnerpaamik minutsit 20-iussalllutik.



Qulimiguulimmik ingerlatsinermi aamma killilersuisoqarpoq, taamaalilluni Nuup Mittarfiata silaannartaani (20 nautiske mil) taamaallaat qulimiguulik ataaseq ingerlanneqartassalluni. 



Ujaasinernut annaassiniarnernullu kiisalu ambulancetut timminernut maleruagassat atuutinngillat.

Killilersuinerit nutaat ingammik Nunatta iluani angalanermik eqquissapput. Peqqussut sioqqullugu timmisartuvut Dash-8 ullaaralaakkut inissisimaffimminniit aallarsinnaapput, ataatsikkut Nuummut tikillutik, tassanngalu ataqatigiissaakkamik Atlantikoq qulaallugu nunallu immikkoortuinut timminissamut anngullutik. Killersuinerit nutaat angallannikkut taamatut aaqqissuussinermik annertuumik killiliissapput. Saniatigut ingammik ornigassat Nuummut ungasissut killilersuinernit eqqugaassapput.



Katitertakkatut ittumik aaqqissuussineq suli ilungersunarnerulissaaq silamik allamilluunniit siumut takorloorsimanngisamik pisoqartillugu kinguaattoortoqartillugu. Ulluni kingullerni marlunni Nuummi silarlunnera minngittoortoqartarneralu takutitsipput angalasut taamaatitsisoqarneratigut katersuussimasut timmisartussarsiuunnerat qanoq imaannaanngitsigisoq. Maannakkorpiaq ilarpassui ulluni 4-6-ni angalanissaminni allannguiffigineqarput, Nuummi ingerlanneqarsinnaasut ikinnerulernerisa kingunerisaanik.



Air Greenlandimit nunatta timmisartuutileqatigiviisut Greenland Airportsimilu atuisut annersaattut killilersuinerit angallannermut pilersaarutini tunngaviusut pingaarutillit allanngortinneqarput, angalasunut ajorseriaataassallutik Air Greenlandillu ingerlatsineranut akisulerulersitsillutik.



Air Greenlandimi ingerlatsinermut pisortaq, COO, Line Frederiksen Greenland Airportsimik qanimut oqaloqateqarpoq, periuseq nutaaq pillugu Air Greenland ilisimatinneqarmalli.



- Paasissallugu pingaartupilussuusimavoq ingerlatat ikilisinnerat Air Greenlandip angalanissamut pilersarutaasa naammassinissaannut taamaalillunilu sullitanik kiffartuussinitsinnut qanoq kinguneqassanersut. Maanna takusinnaavarput suliaq annertuupilussuussasoq angalanissamut pilersaarutit nutaamik katiteqqinniarnerat pilersaarutaaqqaartunut assingutinniarlugit, Line Frederiksen oqarpoq. 



- Allannguinerit sioqqullugit Air Greenlandimi akunnermut timminerit arfineq pingasut tungaannut ingerlanneqartarput,  timmisartorsuup Danmarkimut Danmarkimiillu angalaneranut atatillugu. Maanna taamaallaat sisamaasinnaapput. Kingunerissavaa sinerissap Nuullu timmisartorsuup tikiffigisartagaata akornanni ullormi ataatsimi aqqutit pilersaarutit 40 procentii missaaniittut ingerlanneqarsinnaajunnaassammata. Tamatuma saniatigut timmisartoqartarpoq avataaneersumik, taamaalilluni ingerlanneqarsinnaasut amerlassusaat suli killilerneqarnerulluni. 

Siunissami angalasorpassuit unnuisariaqartassapput – Nuummi imaluunniit angalanerminni aqqusaakkaminni allami Nunatsinnut Nunatsinniillu angalanerminni.



- Oqaatigisinnaalereerparput tamanna kiffartuussinermi ajorseriaataassasoq ingammik nunatta iluani aqqutini, sullitallu ilimagisariaqartassallugu unnuisariaqarnissartik apeqqutaalluni angalanerat sumi aallartillunilu naammassinersoq. Air Greenland maanna angalanissamut pilersaarutit allanngornerannik nassiussuivoq, aallarnissarlu sioqqullugu ullut 14 iluanni allanngortoqarnerani unnuinermut aningaasartutit Air Greenlandimit akilerneqassapput, tamatuma kingornagut tamanna sullitap nammineq akisussaaffigalugu, oqarpoq.



- Aallanngittoortoqartillugu sila teknikkiluunnit peqqutigalugit nunatta iluani angalanerit taamaatinnerisigut killilersuinerit kingunerissavaattaaq Air Greenlandip aallarfissanik nutaanik ikkussisinnaanera annikillissammat timminissat pilersaarutaareersut Nuup mittarfiani naammassisinnaasat ulikkareermata. Tamanna peqqutigalugu aallanngitsoortut ajoraluartumik sulisivisunerusumik kinguaattuussapput, Air Greenlandili aamma aallanngitsoornermut aningaasartuuteqarnerulissaaq ingerlatseqatigiiffiup arlaatigut aaqqinniartariaqagaanik, Line Frederiksen oqarpoq.



Killilersuisoqalerneratigullu angalanissamut pilersaarutit malinniarnissaat suli ajornakusoornerulissaaq, ajoraluartumillu nalunaarutigissavarput qaammatini tulliuttuni angalanissamut pilersaarutit ataavartumik allanngorartassasut, qulakkeerniarlugu Kalaallit Nunaanni attaveqaasersuutit sapinngisamik pisariaqanngitsumik ajorseriaqqunagit.

Timminissamut isumannaatsunik allanik nassaarniarluni Air Greenland Greenland Airportsimik suleqateqarpoq, qulakkeerniarlugu Kalaallit Nunaanni attaveqaasersuutit sapinngisamik pisariaqanngitsumik ajorseriaqqunagit. 



Neriuppugut Air Greenland peqatigalugu timmisartornikkut isumannaallisaanermi allanik iluarsiissutinik pilersitsisinnaalluta, angalasunut kingunipilui sapaatit akunnerit sisamat tallimat tulliuttut annikillisarlugit, Jens Lauridsen, CEO Greenland Airports, taama oqarpoq