Ullumikkut ingerlatseqatigiiffimmi Airbus A320neo takkuttussap taaguutissaa Air Greenlandimi saqqummiunneqarpoq – taaguut innuttaasunit toqqarneqartoq oqaluttuassartaqartorlu, Nunatsinnik nunarsuarmut attaviliisoq.

Air Greenland siusinnerusukkut novembarimi nunatsinnik tamarmiusumik ikiortissarsiorpoq taaguutissamik tulluartumik kissaateqarluni, kulturitsinnut, pinngortitamut Nunatsinnilu angalariaatsimut ilisarnaataasumik. Qisuariartullu tupinnaannartumik amerlapput. Novembarip 30-ata tungaanut siunnersuuteqartoqarsinnaavoq, nunatsinniillu tamarmiusumit Air Greenland siunnersuutinik 2.013-nik nassinneqarpoq.

- Taama annertugisumik tapersersorneqarnitsinnut siunnersuutinullu tunngavilersorluakkanut  qujamasoqaagut. Matumani erseqqisssarneqarpoq Air Greenland Nunatsinnut tamarmut qanoq pingaaruteqartigisoq – taaguutissaalu qanoq pingaartinneqartiginersoq, Air Greenlandip ingerlatseqatigiiffissuani pisortaaneq siunnersuutinik naliliisartunut ingerlatitseqqiisoq Jacob Nitter Sørensen oqarpoq.

Siunnersuuterpassuarnit siullermik 20 naliliisartunut ingerlateqqinneqarput, tassani qulinut ikilisinneqarlutik naggataagullu kimittuunut pingasunut.

Nalillisartuni ilaasortaq Air Greenlandillu ingerlatseqatigiiffissuani siulersuisuni siulittaasoq Malik Hegelund Olsen oqaluttuarpoq siunnersuutit arlaqartut uteqattaartut:

- Taaguutaavoq allaniit nuannarineqarnerusoq, pingasuinnanngormatali taaguut taanna kingulliit akornanniikkunnaarsimavoq. Oqaloqatigiinnerit aallartipput, paasinarsipallapporlu A320neo-mut taaguutissatut ajugaasoq inunnit 78-init nassiunneqarsimasoq – paasinarluni taaguut tulluartinneqarlunilu pingaaruteqartoq, Malik Hegelund Olsen massuiaavoq nangillunilu:

-Taaguut Air Greenlandip timmisartuinut allanut timmisartullu atuuffissaanut tulluarpoq taaguut atituumik paasillugu. Tamanna video taaguummik saqqummiussisoq takugaanni paasinarsissaaq.

Nalillisartut taaguut Air Greenlandip pisortaaneranut tunniuppaat, taassumalu sapaatit akunnerani qaaniuttumi ingerlatseqatigiiffissup siulersuisuinut ilisimatitsissutigalugu, taamaattumik timmisartup taaguutaa ullumikkumut isertuunneqarsinnaasimavoq.

-Taamatut taaguuserlugu siunissamut alloriaqqippugut. A320neo Kalaallit Nunaanni Nunatsinnullu attaveqarnermik nukittorsaanitta ilagilissavaat pingaarutilik – taaguutaanilu sorlavut anguniakkavullu ersaripput, Jacob Nitter Sørensen oqarpoq.

Air Greenlandip Airbus A320neo timmisartorsua 2027 ingerlanerani atuutilertussatut naatsorsuutigineqarpoq, nalunaarsorneralu atuutilerfissaa qanillilerpat saqqummiunneqarumaarpoq.

Naliliisartut Air Greenlandip timmisatussaata A320neo taaguutissaanik  decembarip 9-ani 2025-imi toqqarneqartussamik pissanganartumik annertuuumillu suliassinneqarput.

Naliliisartut tassaapput Air Greenlandip ingerlatseqatigiiffissuani siulersuisuni siulittaasoq, Malik Hegelund Olsen, Avannaata Kommuniani borgmesteri Lars Erik Gabrielsen, Kalaallit Atuakkiortut siulittaasua Juaaka Lyberth, Visit Greenlandimi Destination Development Manager Linda Kleist, Greenland Airportsimi sulisoqarnermut pisortaq Stina Damgaard kiisalu Air Greenlandimi sulisut marluk – Flight Operation Assistant Ciga H. Rydberg aamma auditør Aviâja Møller.