Kalaallit Nunaanni qajartorneq

Takornarianut misigisaqarusittunut qajartoriaaseq taanna tulluartuuvoq. Avatangiisit immikkorluinnaq ittut, immami nipaalluinnartumi pinngortitamut akuuneq timikkut misigalugu. Iluliarsuit seqernup qinngorneranit takorannersumik qalipaatillit akornanni nuannisarit.

Qajaq qajartornerlu Kalaallit Nunaat tamakkerlugu atugaammat sumiikkaluaruilluunniit misilissinnaavat. Avannaani, Kujataani, Kangiani imaluunniit Kitaani qajartortitsisartut amerlapput.

Qajartornermi ilulissat kusanartorsuit akornatigoorneq aammalu kangerlunnut isikkivik naassaanngiusattoq misigissavat.

Qajartornermi immakkut eqqisiivilluni isikkiviginnerpaamilu ingerlaarneq nuanneqaaq.

Qajartorneq kangerlunni aammali illoqarfiit saavini pisarpoq, qajarlu Kalaallit Nunaanni nunaqarfippassuit akornanni assartuutitut atorneqartarpoq.

Avannaani piniartut qajaq puisinniutitut atortarpaat. Qajarlu pertujaatsuugami naalinnermi aalariarpiarneq ajorpoq. Kalaallillu ukiuni tuusintilikkaani qaannamik assartuutitut atoruminartumik atuinermik sungiussilluarsimaqaat.

Nunatta avannaarpiarsuani Thulep eqqaani qilalugarniarneq suli qaannamiit pisarpoq. Sungiussisimasunut Kalaallit Nunaata sineriaani qeqertarpassuit akornanni qajartuarnissaq piukkunnartuuvoq. Illoqarfiit ilaanni nunap assinginik qajartornermi aqqutinik sukumiisunik aammalu tuperfissanik innersuussisunik nalunaarsukkanik pisiassaqartarpoq.

Piffinni takornariartitsisartut qaannamik piffissami sivikitsumi sivisuumiluunniit attartornissamut ikiuuttarput. Angalatitsiviit arlalissuit sap.ak. arlalinnik sivisussuseqarsinnaasunik qajartoriarluni angalatitsinermik neqerooruteqartarput. Aasaaneranilu seqernup kaaviinnarfiani qajartortillutit arferit puisillu qanillinerusinnaanngilatit.

Immami qajartorneq

Qajaq nutaaliaq tassaavoq qajaq angalaarutitut atugassatut sanaaq, nassatanut imermit pitarneqarsinnaanngitsunik inissaligaq. Qajaq amitsuulluni kusanartoq, paatillu avillugillusooq ilusilinnik iputeqartarpoq.

Kalaallit Nunaata imartaani pinngortitami nipaalluinnartumi ingerlaarujoorit. Imaassinnaavorlu nipaassutsip arferup anersaarneranit taarsigaanera iluatsitsillutit misigeriataarit.

Qajartorneq tassaavoq Kalaallit Nunaanni immamiit pinngortitarsuarmik qimerluuinermi atussallugu pitsaanerpaaq.

Qajaq

Ukiut 4000-t matuma siornali Kalaallit Nunaanni nunasisut siulliit qaannamik eqqussisuupput. Taamanerniillu qajaq kalaallit piniarnermik kulturianni ulluinnarni pinngitsoorneqarsinnaanani qitiusumik atuuffeqarpoq.

Qajaq ullumikkut assartuinermi piniarnermilu atorneqarnerusarpoq. Kalaallit qajaat nalinginnaasoq avannaani atugaanerusartoq, qajaq nutaaliaasoq Kalaallit Nunaata sineriaani tamarmi naatsumik takisuumilluunniit qajartuutigineqartarpoq.

Mianersorit qajartortillutit

Qajartorneq misilereersimanngikkukku kalaallit nunaat misileeqqaarfigissallugu tulluanngilaq. Pinngortitarsuaq mersernarsinnaagami sakkortullunilu qajarnermi misilittagaqarnisssaq pingaaruteqarpoq. Misilittagakikkuit qajartornissamut kalaallit nunaata imarsuaani suli misigisaqarsinnaavutit.

Misilittagaqarluaruit qajartorsinnaavutit kalaallit nunaata pinngortitaani kusanaqisumi. Nipeqanngittumik imakkut ingerlaarujoortiluutit, allaanerusoq pinngortitaq qanillivillugu misigisaqarfigissavat. Aamma qanga kalaallit nunaani ileqqutoqaq qajartortarneq malissavat.

Qajartornermi misilittagaqarluaraluarlutit mianersuutit malinnissaaat pingaaruteqarpoq, kalaalit nunaani qajartorniaruit. Pinngortitaq mersernarsinnaammat, allaanerungaatsiarlunilu sungiusimasarniik.

ILISIMAVIUK?

Oqaaseq kajak oqaatsimiit qajamiit pinngortoq
Kalaallit Nunaanni qajartorneq qajartulerlaanit atugassaanngilaq
Aasiaat eqqaanni qeqertarpassuit akorni qajartuarfigissallugit piukkunnartuupput. Aamma kujataani qajamik nutaaliamik atuinissat piumasaqaatitigut assigiinngitsunik nalunassusillit neqeroorutaapput.
Qaannat siulliit qissianit pituttukkanit, amernillu erisaanik orsoqarluartunik qalligaallutitk. Ullumikkut qaannat plastikkimit glasfiberimilluunniit sanaajupput.