Club Timmisamut ilaasortanngorit

Taamaatiguk

6009

2026 juunip 30, marlunngorneq

Air Greenland aamma KAK suleqatigiinnissamik isumaqatigiissuteqarput

Air Greenland aamma Kalaallit Arsaattartut Kattuffiat (KAK) ukiunut pingasunut suleqatigiinnissamik isumaqatigiissuteqarput, kalaallit isikkamik arsaannermi futsalimilu atugaat nukittorsarniarlugit. 

 

Isumaqatigiissutaavoq angalanerni akikillisaaneq taamaalillunni nunanut allanut unammisartut katersuunnissaat nunanilu tamalaani unammiuaarnernut peqataanissaat ajornannginnerulerluni. Saniatigut aningaasat nunanut allanut unammisartut sulinerannut tunngatinneqarput, taamaalilluni KAK-p nunatsinni tamarmi klubbini sulinerup piorsaanerullu aalluttuarnissaa qulakkeerneqarluni.  

 

Suleqatigiinnissamik isumaqatigiissut juulip aallaqqaataani 2026-mi atuutilissaaq 2029 naanissaanut atuulluni. Matumani arnat angutillu juniorit seniorillu 11-11 futsalimi unammisartut pineqarput. 

Isumaqatigiissut KAK-mit oqaluttuarisaanermi pingaarutilittut isigineqarpoq: 

 

- Air Greenlandimik suleqatigiinnissamik isumaqatigiissuteqarneq timersorneq aqqutigalugu Kalaallit Nunaanni katersuuffiunissaanik KAK-p periusissiaanut nutaamut tulluarpoq. Isumaqatigiissuteqarnikkut nunanut allanut unammisartuvut katrsuunnissaminnut, unammiuaarnissaminnut Nunarpullu sinnerlugu unamminissaminnut periarfissaqarnerulerput. Tamatuma saniatigut nunanut allanut unammisartunut periarfissanik nutaanik ammaassivoq.Taamaalilluta aningaasat allanut atorneqartussaagaluit isikkamik arsaannerup futsalillu piorsarnissaanut periarfissaqalerpugut nunatsinni tamarmi klubbit sulinerisigut. Taamaalilluta Kalaallit Nunaanni nunanut allanut unammisinnaalernissaq aamma qaninnerulerpoq, nunatsinnilu tamarmi timersuut soqutigineqarnerulerluni, KAK-mi siulittaasoq Kenneth Kleist oqarpoq.

Air Greenlandimut suleqatigiinnissamik isumaqatigiissut ingerlatseqatigiiffiup assartuisutut inissisimaneranut tunngavoq: 

 

- Kalaallit Nunaata timmisartuutileqatigiivisut suliassaraarput assartuussinikkut nunatta imminut atassusernissaa. Suleqatigiinnissamik isumaqatigiissuteqarnitsigut nunanut allanut unammisartut katersuunnissaat ajornannginnerulersipparput, timersornikkut piorsaaneq KAK-mi klubbinilu ingerlanneqarluni, Air Greenlandimi pisortaaneq Jacob Nitter Sørensen oqarpoq. 

 

Isumaqatigiissut 3 milion koruuninik naleqarpoq, taakkunannga 2 million koruunit siulliit 2026-2628-mut tunngatinneqarlutik, 2029-mut sivitsorneqarnera 1 million koruunit nalingannoortoq Kalaallit Nunaanni unammiuaarnernut tunngatinneqarluni.