2255

2022 juulip 5, marlunngorneq


Air Greenland qulimiguulinnut H125-nut qulingiluanut aningaasaliivoq

Air Greenlandimi silaannakkut angallatinik nutarterinermut atatillugu qulimiguullit H125-t qulingiluat pisiarineqarnissaat pillugu Airbus Helicopters-imut isumaqatigiissut atsiorneqarpoq. Siulleq 2023-mi aasakkut tunniunneqassaaq, taamaalillunilu qulimiguulinnik AS350-inik atorunnaarsitsiortornerit aallartissapput

Air Greenlandip siulersuisui qanittukkut qulimiguulinnik qulingiluanik, katillugit 200 mio. koruuninik nalilinnik pisinissamut isumaqatigiissusiortoqassasoq aalajangiipput. Aningaasaliinissami ingerlatseqatigiiffiup timmisartuutinik nutarterinissamut periusissiaa malinneqarpoq, Air Greenlandip siulersuisuini siulittaasoq Bodil Marie Damgaard oqaluttuarpoq.

Bodil Marie DSC8036

- Suliat Covid-19-imut tunngangaatsiaraluartut, Air Greenlandimi ukiuni kingullerni ingerlatseqatigiiffiup timmisartuutinik nutarterinissamut periusissiai aalluppagut. Naatsumik isigalugu Air Greenlandip suliassanut, ingerlatseqatigiiffiup inuiaqatigiinni isumagisaanut atortut piffissamut naleqqussarneqarneri siunissamullu qulakkeerneqarneri pineqarput. Tamatuma peqatigisaanik piujuartitsinissap avatangiisillu aallutarilluarnissaat anguniagaavoq, tassanilu timmisartuutinik nutarterinissamut periusissiaq isumaqartorujussuuvoq. Timmisartunut nutaanut, napparsimasunik angallassissutissamut aamma Imarpik qulaallugu angallavimmi timmisartuussisussamut aningaasaliisoqarpoq, tamatumalu saniatigut qulimiguulinnut nutaanut, annaassiniarnermut kiffartuussinermullu isumaqatigiissusiorfiusuni timmisartuussinissamut atugassanut aningaasaliisoqarluni, Bodil Marie Damgaard oqarpoq.

H125-t qulimiguulinnut AS350-inut taartaassapput, pingaartumillu nuna tamakkerlugu saffiugassanik ujarlernermut takornariaqarnermullu atorneqassallutik.

 

- Attartortitsisarneq Air Greenlandip niuerfiata ilagaa pingaarutilik, aammalu siunissami takornariaqarnermi aatsitassarsiornermilu pilerinartutut inissisimanera ingerlatiinnarneqartussaavoq. Taamaattumik siunissami tunisassianik ataatsimoortunik pitsaanerpaanik pilersuisinnaanermi unammillersinnaaginnarnissarput pingaaruteqarpoq, tassanilu qulimiguullit H125-t nutaat pingaaruteqarput, siulittaasoq oqarpoq.

 

Qulimiguullit H125-t annertunerpaamik qulimiguulinnut AS350-inut, ullumikkut Air Greenlandimit atorneqartunut assingusuupput. Taamaattumik qulimiguullit nutaat suliassat pisiniarineqarfigisaat eqqarsaatigalugit qinigassatut pitsaanerpaatut toqqarneqarnermik saniatigut, aamma qulimiguuliupput, Air Greenlandip aaqqissuussaneranut naleqqulluartut. Taamatut teknikkimut pisortaaneq Jørn E. Rasmussen nassuiaavoq.

 

Air Greenlandip qulimiguullit AS350-it pingasut attartorpai aammalu pingasut pigisaralugit, taakkulu ima pisoqaatigilersimapput, siunissami iluarsaassinerit amerlanerulernissaat naatsorsuutigineqarsinnaalluni, taamaattumillu taakku H125-nik nutaarluinnarnik taarsersorneqarput.

Microsoftteams Image (30)

- Qulimiguullit nutaarluinnaat, Frankrigimi Airbus Helicopters-imit, nalinginnaasumik tunisassiarisaminnik pilersuisuusumit tunisassiarineqartut matumani pineqarput. Tassanngaanniit Norgemi Østnes Helicopters-imut assartorneqartassapput, tassanilu pisariaqartitsinerit malilugit naleqqussarneqassapput, soorlu amoorutilerinermut aamma heliskiing-imut atortulersorneqassallutik. Aamma uatsinnut tunniunneqannginnerini tassani Air Greenlandip qalipaataanik aappaluttumik qalipanneqassapput, Jørn E. Rasmussen nassuiaavoq.

H125 siulleq 2023-mi aggustimi/septembarimi tunniunneqassaaq, tamatumalu kingorna qulimiguulimmik nutaamik qaammatit tamaasa tigusisoqartassaaq.

 

Østnes Helicopters-imut Norgemiittumut pisiniarnermi suliassat naammassipput, aammalu qulimiguullit qulingiluat taakku katillugit 200 mio. koruuninik akeqarput. Air Greenlandimi CFO Mogens E Jensen oqaluttuarpoq aningaasalersuinermut aningaasaliissutit USPP-usimasup pappiaqqanik nalilinnik atugassiineratigut pissarsiarineqartut, AS350-it H125-nik taarsersorneqarnissaat sivisuumik pilersaarutaasimammat.

 

Qulimiguullit qulingiluat pisiarineqarnerini timmisartuutinik nutarterineq naammassingajattussaavoq. Timmisartunik nutarterinermi Air Greenlandip atortuisa avatangiisinut mingutsinnginnerunissaat, naammassinnissinnaanerunissaat, sukkanerunissaat, ilorrisimaarnartuunissaat kiisalu ingerlatsinermut qulakkeeriinninnissaat anguniagaavoq.

*assit Airbus-ip H125 pillugu tuniniaanermi naqittakkamit tigusaapput