Air Greenland – suliffeqarfissuaq 2026-mi ukiup affaani siullermi akileraarutit sioqqullugit 9,8 mio. DKK-nik angusaqarpoq, ukiup siuliani piffissami tassani 87,4 mio. DKK-nik amigartooruteqarluni. Tamanna tunngavigalugu maannakkut Air Greenlandimit ilimagineqarpoq 2026 tamakkerlugu akileraarutit sioqqullugit 100 mio. DKK-it missaannik angusaqarnissaq.

Air Greenland – suliffeqarfissuarmi siulersuisut ukiut affaanut nalunaarusiaat piffissamut januaarip aallaqqaataaniit juunip 30-ata 2026 akuersissutigaat. Ilanngaaseereerluni kaaviiaartinneqartut 7,5 %-imik amerlipput 928,3 mio. DKK-nut, kiisalu naatsorsuutitigut angusarineqartut akileraarutit sioqqullugit tassaapput 1,1 %. Pitsanngoriaammut ingammik takussutissaapput 2026-mi ukiup affaani siullermi angallassinerup ingerlanerani immikkut ittumik akornusersuutit ikilisimanerat, tamanna 2025-mut sanilliullugu pitsaanerujussuarmik ingerlanneqarpoq, ilaasut amerlanerupput aammattaaq angallassinermi akornusersuutinut pissusissamisuunngitsunut aningaasartuutit ikinnerullutik.

Pissutsit ingerlatsinermut tunngasut nalinginnaasuunerupput ukiup siuliani piffissamut tassunga sanilliullugu. Angallassinernik ingerlatsinerit silamit annikinnerusumik sunniuteqarfigineqarput, aamma Nuummi Mittarfimmi pissutsit aalaakkaanerupput, naak tamatumani suli unamminartoqaraluartoq, ilaatigut isumannaallisaanermi misissuisarnermut tunngatillugu.

Piffissamik eqquisarneq 13,9 procentpoint 85,7 %-imut, timmisartut suluusallit piffissamik eqquisarnerat 20 procentpoint 73 %-imut. Ingerlatsinermi akornusersuutit malitsigisaannik aningaasartuutit 26,3 mio. DKK-nik apparput assigaa 37 %, tassa aningaasanngoræugit 44,6 mio. DKK.

Air Greenlandip pisortaanerata, Jacob Nitter Sørensenip, ukiup affaani angusat ingerlatsiviup siumut ingerlaneratut isigaa 2025-mi unamminartoqartitsinerup kingornatigut. Tamatumunnga ilutigitillugu tikkuarpaa Air Greenlandip angallassinermut pilersaarutini piumasaqarneq tunngavigalugu naleqqussarsimagaa aamma kinguaatoornerit kiisalu teknikimik tunngaveqartumik pisartunik isumaginnittarneq pitsanngortinneqarsimasoq.

Nunap immikkoortuani mittarfiup nutaap 1.499 meterinik takissusillip Qaqortumi ammarnera Kujataanut angallassisarneq allanngortippaa. Maannakkut angallassineq annertunerusumik Qaqortup eqqaani katersuuppoq, naatsorsuutigisatut tamatuma kinguneraa ilaatigut Nuummut aqqutit annertunerusumik pilerigineqalerput, siornatigut Narsarsuup aqqusaartarneranut sanilliullugu. Tamannalu taamatuttaaq ilimageriikkatut sunniuteqarpoq nunap immikkoortuani ingerlatsineq sullissinermut isumaqatigiissut tunngavigalugu annikillimmat.

Air Greenlandip angallavigisartagaani akimorlugit angallassinermut pilersaarut naleqqussarpaa angalasussanut tunngavissat atuuttut tunngavigalugu aamma pilersaarusiornermi sillimmatit ilanngullugit pissusissamisuunngitsut pitsaanerusumik aaqqiiffiginiarlugit.

Nunani tamalaanut attaveqarneq pitsanngorsarniarlugu Air Greenlandip marsimi IOSA – akuersissut anguaa kiisalu juuni 2026-mi IATA-mut ilaasortanngorluni. Piffissap ingerlanerani nunani tamalaani  timmisartuutileqatigiinnik allanik suleqateqarnissamut periarfissanut tapertaassaaq aamma Kalaallit Nunaannut tamaanngaanniillu periarfissat pitsanngorsarniarlugit.  

Ingerlatsinermi aningaasat kaaviiaarnerat tassaavoq 298,8 mio. DKK, tamanna ukiup siuliani tassaalluni 169,7 mio. DKK. Juunip naanerani suliffeqarfissuup aningaasaatai tigoriaannaat 783,7 mio. DKK, kiisalu nammineq aningaassaatit 814,0 mio. DKK. Aningaasanut tigoriaannarnut obligationinik tunisinermut, taakkunannga sanaartornermi suliniutit ingerlasut aamma siunissami aningaasaliissuteqarnissat aningaasalersussavai. Nammineq aningaasaatit ukiup affaata naanerani 814,0 mio. DKK-nik amerlassuseqarput. Tamanna tunngavigalugu aqutsisut nalilerpaat, suliffeqarfissuaq patajaatsumik aningaasassaqarnermut upalungaarsimasoq ineriartornissaq pilersaarutaasoq aamma aningaasaliissuteqarnernut ingerlareersunut iluaqutaasussamik.

Air Greenlandimit naatsorsuutigineqarpoq akileraaruteqannginnermi naatsorsuutitigut angusassat  2026-mi 100 mio. DKK-nik annertussuseqarnissaat. Taamatut annertusititsinerup pitsaanerusumik angallassinerup ingerlanera takutippaa, ilaasussatut tunngaviusut aamma ukiup sinnerani ineriartorneq, piffissami tassani ingerlatsineq nalinginnaasumik pitsaanerusarmat. Missingiinermi piumasaqaataavoq, assigiimik pissuseqarneq, naammassinnissinnaaneq aamma killiussatut atugassarititaasut avataaneersut ilimagisatut ineriartornissaat. Allannguutit malunnaateqartut pitsaanngitsut soorlu ilaatigut sila, mittarfinnik ingerlatsineq, orsussap akia imaluunniit pissutsit allat avataaniittut angusanut sunniuteqarsinnaapput.

Ukiup affaata naanerata kingornatigut Air Greenland alloriaqqippoq, tamatuma upalungaarsimaneq , pisinnaassuseqarneq aamma piffissaq ungasinnerusoq eqqarsaatigalugu ingerlatsiviup ingerlatsinerata ineriartornissaanut iluaqutaasussat.

Nutaamik isumaqatigiissuteqartoqarpoq danskit illersornissamut Materiel Indkøb-ianut (FMI), timmisartunut  Dash 8-nut marlunnut allanngortitsinissaq, taakkua 2028-mit ukiuni qulini Kalaallit Nunaanni alapernaarsuinermut ilaalissapput. Annertunerusumik  uani atuarit.

Taamatuttaaq juulimi isumaqatigiissutigineqarpoq ingerlatsivimmik Hotel Hans Egede A/S-mik pisinissaq. Isumaqatigiissutip piviusunngornissaanut piumasaqaataavoq unammilleqatigiinnermut oqartussaasut akuersissuteqarnerat. Annertunerusumik  uani  atuarit