Allattoq: Poul Krarup

Lars Munch Bell-212-imi timmisartortartuunerusoq, qulimiguulik qajannaatsuullunilu sulerulussinnaasutut eqqaamavaa, traktorimullu suliassani ajornarsinnaasunik isumaginnissinnaasumut assersuuppaa

- Assakaasoqarnani sisoraataasaqarami nunami, sikumi apummilu pertujaattaqaaq, Lars Munch oqarpoq.

- Ilisimavara qangaanerusoq aamma nunarsuup sinnerani taanna suliassanut assigiinngitsorpassuarnut atorneqartartoq

- Tamakkuli uanga sulilernera sioqqullugu pisimapput. Bell-212-ilu atorlugu timmisartuussisarninni nunap immikkoortuini arfinilinni sullissatsinni, Qaanaami Upernavimmil Uummannami, Qeqertarsuup Tunuani, Kujataani aammalu Tasiilami ilaasunik nassiussanillu timmisartuussinerit isumagisaraavut.

- Aamma nunap immikkoortuini taakkunani napparsimasunik angallassinernut, ujaasinernut annaassiniarnernullu atorneqartarpoq, aammalu timmisartumik kivillugit assartugassanik isumaginnittarluni, Lars Munch oqarpoq.

Lars Munch tassunga taartaasumi H155-mi timmisartortartutut ingerlaqqissaaq.

Timmisartunik iluarsaasartoq B212 pillugu qanoq oqasissaqarpa? Toortagaq aappaluttoq tooruk. 

Qulimiguullit taakku assigiinngissutaat ima eqqaavai:

- H155 timmisartuuvoq allaaneq. Sisoraataasaqarnani assakaasoqarnera pingaaruteqarpoq, mittarfinni manissakkani, nunaannarmiunngitsorli, millaqqinnerugami, Bell-212-ili nunaannarmi minnissamut pitsaaneruvoq.

- H155 timmisartuuvoq atoruminartoq, sukkanerullunilu sumiissusersiutai ullutsinnut naleqquttuugamik aammalu autopiloteqarluni. Timmisartormi taanna allarluinnaavoq, Lars Munch oqarpoq.

Air Greenlandip pisortaanera Jacob Nitter Sørensen B212 pillugu qanoq oqarpa? Toortagaq aappaluttoq tooruk. 

- Tassa maannakkut takussutissiaq millilux tabel, LUX-illu nalinga malittussaavarput, tassa silap qaamarngata minnerpaaffissaanut takussutissaq, taassumalu appasissuseq aalajangersimasoq ataappagu, timmisartoq qangattassanngilaq.

- Silap qanoq innissaata minnerpaaffissaa qaffanneqarpoq. Tassa nuissat appasippallaassanngillat, isikkivigissaarlu. Silaannarlu sermernarpat timmisartoq qangattassanngilaq.

Malittarisassat nutaat timmisartuussinissamik aalajangiinissaq timmisartortartunut ajornannginnerulersippaat – tassa silassaq aammalu LUX-skema DMI-mit ullut tamaasa tigusartagakkagut malittussaagatsigit. Tassanilu silap nuiaqannginnerani aammalu nuiaqarnerani LUX-ip nalingi allaqqapput. 

Qangaanerusoq, NAT VFR atulinngikkallarmata, Bell 212-mik ilaatigut taartumi aallartarpugut sunaaffa sila takusinnaanngisatsinnik pitsaavallaanngitsoq, minnissamullu qulliit ikikkaluarlugit qameqqittariaqartarpavut, aputip pukaalluunnit silaannarmiittup inngiasutsitsilernerat pissutigalugu.

Naatsumik oqaatigalugu: Ullutsinni ilaasunik angallassineq isumannaanneruvoq, timmisartortartullu qangattarnissamik aalajangiinissaminnut maannakkut najoqqutassanik peqalerput.

Annertuumik iluaqutaasartut ilagaat qaammatigissumi qaqqallu apisimatillugit qaamanerusarnera, kangerlunnilu immap sikunnginnerani taartumi imaq ersitsillugu, immap qaqqallu assigiinngissutaasa takusinnaaneri iluaqutaasarmata.

Paasisaqarfik: Lars Munch

Naggammik inuulluaqqusinera pillugu uani atuarsinnaavat. Toortagaq aappaluttoq tooruk.