Local Greenland takornariaqarnikkut piujuartitsinermik, inuiaqatigiinnik akisussaassuseqartumik sullissinermik kiisalu Kujataani misigisassanik ineriartortitsinermik immikkut ittumik suliaqarsimanera pillugu Greenland Tourism Award 2026-mik nersornaaserneqarpoq.

Local Greenland Freddy Goske Christensen aamma Salik Parbist Frederiksenimit pigineqartoq ukiuni kingullerni Kujataani takornarialerisut akornanni pingaarutilittut inissisimavoq. Suliffeqarfik tammaarsimaarnernik, angalanernik misissueqqissaarfiusunik, immikkut aaqqissuussanik takornariartitsinernik kiisalu Qaqortumi Nanortalimmilu sammisassanik assigiinngitsunik neqerooruteqarpoq. Tamatuma saniatigut Qassiarsummi Tasermiunilu campinik ingerlatsivoq, tassani tikeraat ulluni arlalinni pinngortitamut qanillutik assigiinngitsunik misigisaqarsinnaallutik.

Greenland Tourism Award-imut piukkunnaatillit nalilersorneranni pingaarnertut isiginiarneqartarput piujuartitsisumik tunisassiornissaq kiisalu isumannaallisaaneq, pitsaassuseq, avatangiisit, nutaaliorneq inuiaqatigiinnilu akisussaassuseqarneq.

Piujuartitsinermik pingaartitsisoq

Local Greenland immikkut maluginiarneqarpoq piujuartitsinermut aalajangersimasumik siunissarlu ungasinnerusoq isigalugu suleriaaseqarnera pillugu. Suliffeqarfik nunani tamalaani piujuartitsinermut uppernarsaatinik pingaarutilimmik GSTC-mik peqarpoq, tamannalu takutitsivoq takornariaqarnermi akisussaaffeqartumik ingerlatsinermut, pitsaassutsimut aqutsinermullu nunani tamalaani piumasaqaatit qaangerlugit naammassiniarlugit immikkut iliuuseqarsimaneranik.

Piujuartitsinermut sulineq najukkami suliniutitigut aamma ersersinneqartarpoq. Assersuutigalugu suliniut “We Clean - We Care” qulequtaralugu Qaqortumi illoqarfimmi  saliinernik aaqqissuussisarpoq. Taamatuttaaq suliffeqarfik inuiaqatigiinni peqataalluarnikkut utoqqaat peqatigiiffiannut angalanernik aammalu suliniutinik allanut ikiuuttarluni. Taakkua ataatsimoornermik najukkamilu naleqartitanik pilersitsisunut iluaqutaallutik.

Siusinnerusukkut nersorniaatisisimasoq

Suliffeqarfiup sulinera nunani tamalaani aamma nersorniarneqarsimavoq, tassami Tripadvisor Travelers’ Choice Award 2026 pissarsiarisimavaa. Nersornaat taanna suliffeqarfinnut qaffasissumik sullissisartunut aammalu pulaartunit pitsaasunik naliliivigineqartartunut tunniunneqartarpoq.

Local Greenlandip ulluni arlalinni ingerlanneqartartunik takornariartitsinernik ineriartortitsisimavoq. Campit angalanerillu ulluni arlalinni ingerlanneqartartut pulaartumut ataatsimut naleqarnerulersitsisarput, takornariallu sumiiffinnut assigiinngitsunut agguaanneqarnerusinnaalersillugit. Taamaalilluni pinngortitamut inuiaqatigiinnullu sunniutit annikinnerulersarput, pulaartullu kulturimik, inuiaqatigiinnik Kalaallit Nunaannillu itinerusumik paasisaqarnissamut periarfissaqarluarnerulersarlutik.

Local Greenland umiarsuarnik takornariartaatinik suleqateqarnermi najukkami kulturi tunngavigalugu misigisassanik neqerooruteqartarpoq. Pulaartut najukkami angallassisartut aqqutigalugit qilaatersorneq, kalattuut, kaaffillerneq kiisalu qajartorneq misigisinnaavaat. Taamaattumik suliffeqarfik tikeraat inuiaqatigiinnut iluaqutaasumik atorluarsinnaavai, najukkamilu suleqatit sammisanik ineriartortitsinermi peqataatillugit.

Greenland Tourism Award Visit Greenlandimit Air Greenlandimiillu tunniunneqartarpoq suliffeqarfinnik akisussaassuseqartumik piviusumillu takornariaqarnermik ineriartortitsisunik aammalu Kalaallit Nunaanni takornariaqarnermi nutaanik maligassanik pilersitsisunik nersuiniarluni.

Piukkunnaateqartut allat

Two Ravens, Local Greenland aamma Disko Adventures piukkunnaatilittut aamma innersuunneqarput. Disko Adventures 2024-mi nersornaatisivoq, Raw Arctic-ilu 2025-mi nersornaatisilluni.