Air Greenland aamma Inuit Circumpolar Council - Kalaallit Nunaat (ICC) ulluni juulip 22-anniit 25-annut 2026 Nunavummi Iqalunni ICC-p ataatsimeersuarnerani kalaallit aallartitat peqatanerat tapersersorniarlugu suleqatigiinnissamik isumaqatigiissuteqarput.

Ataatsimeersuarneq ukiut sisamakkaarlugit ingerlanneqartarpoq, Kalaallit Nunaanni, Canadami, Alaskami (USA) Chukotkamilu (Rusland) naggueqatigiinnit Inunnit aallartitat katersuuttarlutik. Ataatsimeersuarnermi ilungersunarsinnaasut oqaluuserineqartarput Issittumilu silap pissusaa, ineriartorneq, kulturi kiisalu pisinnaatitaaffiit pillugit suleqatigiittoqartarluni. Katersuunnermi ukiuni aggersuni ICC-mi suleqatigiinneq sammivissinneqartarpoq.

Air Greenland suleqataanermigut periarfissiivoq Kalaallit Nunaannit peqataasoqarluarnissaa ilaatigut Iqalunni katersuunnissami kalaallit aallartitat angalanerisa ajornaannerunissaanut.

Air Greenland Nuup Iqaluillu akornanni immikkut timmisartuusissaaq ingerlatseqatigiiffissuarlu Greenland Travel angalanerup pilersaarusiorneranik isumaginnilluni. Peqataasunut akit aalajangersimasuupput, taamaalilluni Kalaallit Nunaannit peqataasut amerlasuunissaat qulakkeerneqarluni.

– Suleqatigiinnissamik isumaqatigiissut assartuussinerinnaanngilaq, aammali Issittumi inuit naapillutik suleqatigiissinnaanerat  piviusunngortinneqarpoq. Nunarsuup immikkoortua nunarsuarmioqatigiinnit alaatsinaanneqarnerujartortillugu Inuit katersuullutik ataatsimoorlutik avammut saqqummersinnaanissaat aatsaat taama pingaartigaaq. Taama periarfissiisinnaagatta tulluussimaarutigaarput, Air Greenlandimi pisortaaneq Jacob Nitter Sørensen oqarpoq.

Aamma tikilluni naapeqatigiissinnaanerup pingaassusaa ICC-mit qitiutinneqarpoq:

– Ataatsimeersuarneq naggueqatigiit Inuit suleqatigiinnerannut pingaarluinnarpoq. Naapeqatigiinnitsigut attaveqatigiinnerput ataatsimullu siunniussaqarnermut nukittorsarneqartarpoq. Matumani kiinarsilluni ataatsimoornissaq pisariaqartarpoq – tamannarpiarlu suleqatigiinnermi periarfissinneqarpoq, ICC-p siulittaasua Sara Olsvig oqarpoq.

Angalanissaq pilersaarusiorneqalereerpoq. Aamma ulluni taakkunani Iqaluit Nuullu akornanni timmisinnaavutit, inissaqarnersorlu uani takusinnaavat.