Air Greenlandip Ilulissat Københavnillu akornanni toqqaannartumik timmisartuussineq oktobarip 29-anni 2026-mi ammassavaa, ullorlu taanna Greenland Airportsip Ilulissani nunanut allanut mittarfittaava nutaaq aamma ammassalluni. Taamaalilluni Kalaallit Nunaanni mittarfiit nutaat pingasut kingullersaat atorneqalissaaq, nunattalu attaveqaasersugaanerani oqaluttuarisaanermut pingaarutilimmik allannguineq naammassineqassalluni.

Ammaanerup kingunerisaanik Kalaallit Nunaanni nunanut tamalaanut attaveqaateqarfiit pingaarnerit marluk pilersinneqassapput.

Nuuk Air Greenlandip qitiusumik mittarfigaa pingaarneq, nunattalu immikkoortuisa akornanni nunanullu allanut attaveqartitsilluni. Ilulissat nunanut tamalaanut attaveqaateqarfittut aappaatut inissisimalissaaq, Københavnimut toqqaannartumik attaveqarluni kiisalu Diskobugtimut Avannaanilu nunatsinni angalanernut isaariaqarfiussalluni.

Aammattaaq Qaqortumi mittarfik nutaaq angallannermi nutaamik aaqqissuussinermik pilersitsissaaq, tamannalu nunamut tamarmut iluaqutaassaaq. Angalasut amerlanerusut angalanerminni aqqut naleqqunnerpaaq atorlugu ornigassaminnut qaninnerusumut apuussinnaalissapput, Air Greenlandillu timmisartui qulimiguuliilu ingerlaavartumik nunatsinni angallannermi aqqutinik ataatsimoortitsissallutik.

Københavnip Ilulissallu akornanni toqqaannartumik

Oktobarip 29-anni ammaanersiornermi Air Greenlandip Københavnimiit Ilulissanut toqqaannartumik timmisartuussinermik malunnartissavaa. Siullermeerluni timmisartuussineq Air Greenlandip timmisartorsuaniit Airbus A330neo, Tuukkamik ingerlanneqassaaq.

Mittarfiup ammarneqarnerata kingorna novembarimi ukiuunerani nalinginnaasumik timmisartuussinissamut pilersaarut atuutilissaaq. Piffissap aallartinnerani Københavnimiit Ilulissanut aqqut Jettimep Boeing 737-800 atorlugu timmisartuussissoqassaaq. Pingaarnerpaamik pingasunngornerit tamaasa timmisartuussisoqartassalluni, juullip ukiutoqqallu nalaanni kiisalu marsimi ataasinngornerni immikkut timmisartuussinerit ingerlanneqassallutik.

GL707 Københavnimit nal. 09.45 aallassaaq Ilulissanullu nal. 11.45 tikissalluni. Uterluni GL708 Ilulissanit nal. 13.15 aallassaaq Københavnimullu nal. 21.00 tikissalluni. Piffissat tamarmik sumiiffinni piffissaapput, timmisartuussinissallu pilersaarutaat allanngortinneqarsinnaallutik.

Apriili 2027-mi aallartittumik Air Greenlandip timmisartuutaa nutaaq Airbus A320neo, Unaaq, aqqummi tassani timmisartuussisalissaaq. Tamatuma kingorna timmisartuussinissat amerlineqassapput, aasallu angallaffiunerpaaffiani Københavnip Ilulissallu akornanni sapaatip akunneranut toqqaannartumik timmisartuussinerit arfinillit tikillugit ingerlanneqartarsinnaassallutik.

Angalanissamut gavekortimik eqquigit

Air Greenlandip Ilulissat Københavnillu akornanni aqqummik nutaammik ammaaneranut atatillugu unaamisitsissaagut, unammisitsinermi makitsisoqassaaq makitaasorlu angalanissamut gavekortimik 10.000 DKK-nik nalilimmik eqquissaaq. Makitsineq 13. oktober 2026 nal. 12.00 pissaaq.

Peqataaniarlutit immersugassaq ataaniittoq immersoruk.

1. Eqqugassaq tassaavoq Air Greenlandip timmisartuussiviinut 10.000 kr.-inik nalilimmik angalanissamut gavekorti. Gavekorti tamakkiisumik ilaannakortumilluunniit aningaasanngorlugu taarserneqarsinnaanngilaq.
   

2. Peqataanissamut immersugassaq quppernermi matumaniittoq immersorneqarlunilu nassiunneqassaaq. Siunnersuut tiguneqareerpat qupperneq uppernarsaatitalik ima allaqqasoq takkutuissaaq: “Siunnersuuteqarnernut qujanaq!”.

3. Peqataaniarluni immersukkamik nassiussinissamut ulloq killigititaq tassaavoq oktobarip 13-anni 2026.

4. Air Greenlandip imaluunniit Air Greenland sinnerlugu sinniisut, ajugaasoq pingajuusoq imaluunniit suliffeqarfiit allat aqqutigalugit attaveqarfiginavianngilaat.

5. Unammisitsinermi peqataasup atini, telefonnummuni, najukkani e-mailinilu paasissutissiissutigissavai.

6. Peqataasoq 18-inik ukioqalereersimassaaq.

7. Inummut paasissutissat isertuussamik suliarineqassapput unammisitsinermullu taamaallaat atorneqassallutik, Air Greenlandip paasissutissanik inunnut tunngasunik suliarinnittarnermut politikkiatut aalajangersakkat naapertorlugit.

8. Unammisitsinermut peqataanikkut unammisitsinermi piumasaqaatit tamakkerlugit akuerineqassapput.