2978

Norsaq angalaqqilerpoq

Kangerlussuarmi ulluni arfineq pingasuni atoqqusaanani uninngareerluni Atlantikoq qulaallugu timmisartorsuarput, Norsaq, ippassaq pingasunngornermi novembarip aappaanni nalunaaqutaq pingasut missaani tingivoq

 - Suliamut akuusut tamarmik pitsaalluinnartumik sullissilluarnerisa kinguneranik, timmisartorsuaq ippassaq Københavnip tungaanut aallarsinnaalerpoq, Air Greenlandimi timmisartorsuarmut teknikkimut pisortaq Henrik Keil oqarpoq.

Tirsdag den 25. oktober fik Norsaq en større skade på dets ene vinge mens den var parkeret på forpladsen i Kangerlussuaq. En jagt efter reservedele blev igangsat med det samme.  

Marlunngornermi oktobarip 25-ni Norsaq Kangerlussuarmi mittarfimmi uninngatillugu suluusaatigut ajoquserneqarpoq. Kingoraartissarsiornerlu ingerlaannavik aallartippoq.

 

- Maani suliffinni Danmarkimi unnulerluni nal. arfininngulersoq oqarasuaatikkut nalunaarfigineqarpunga Norsaq, aallarnissamut minutsit 20-t sioqqullugu, annertuumik ajoquserneqartoq. Ingerlaannarllu kingoraartissarsiorneq aallartippoq, Norsap atorneqaqqilernissaanut suliassamik tigusisoq Henrik Keil aallartippoq.

 

Coronap kingorna kingoraartissanik sanaartorneq suli pissusissamisut ingerlanngimmat, Air Greenlandimi teknikkimut immikkoortortaq kingoraartissanik pissarsiniarnini iluatsikkuminaatsippaa. Iluatsipporli – aqqutit assigiinngitut atorlugit – aquutillu Norsap pisariaqartitai pissarsiarineqarput.

 

- Marlunngornermi Europami kingoraartissanik nioqquteqarfinni ujaasinermut iluatsinngimmat, aqaguani attavigisartakkatsinnut ikiortissarsiorpugut. Taamaasilluta USA-mi Floridami Miamimi, siusinnerusukkut niueqatigisimanngisatsinnut, attaveqalerpugut. Suliassalli ingerlaqqinnginnerini taakku pappiaqqatigut uppernarsaataat eqqortuunersut qulakkeeqqaartussaavarput. Uppernarsineqarmatalu pisiassatsinnik inniminniineq aammalu aningaasat nuunneqarnissaasa piareersarnerat aatsaat inissippat, suliassaq ingerlaqqissinnaavoq, Henrik Keil oqaluttuarpoq.

Timmisartoq nassiussanik assartortartoq

Suliassamilu tullinnguuppoq kingoraartitssat karsini marlunni 4,5 meterinik takissulilinniittut Kangerlussuarmut apuunnissaat.

 

- Karsit timmisartunut nassiussanik assartuutinut USAmiit Europaliartartunut ilaatissinnaaneri misissorparput, aqqutissalli tamarmik ulikkaareersimaput. Karsit akitsuuserisut aqqusaaqqaartussaavaat, lastbilimillu Amsterdamimiit Københavniliaanneqareerunik Kangerlussuarmut Wamos-imut ilaasussaassallutik, tamannalu pisariuallaarlunilu akisussaaq. Taamaattumik timmisartumik attartornissaq aalajangiupparput, Henrik Keil oqarpoq.

 

Kingoraartissallu Miamimiit Kangerlussuarmut assartornissaannut Canadameersoq CargoJet Boeing 767 atorlugu suliassamut toqqarparput. Nassiussassanik piareersaanermut immikkoortortap Blue Water suleqatigalugu kingoraartissat mittarfiliaannissaat isumagaa, arfininngormallu oktobarip 29-ni kingoraartissat Miamimiit nal. 06.30 aallarunneqarput, Kangerlussuarmullu apuunneqarlutik nal. 14.09 ulloq taanna.

 

- Tamatumalu kingorna suleqatitta Kangerlussuarmiittut suliassaq sukkasuumik isumagilerpaat. Nunami atortunut aqutsisup Per Mikkelsenip US Airforcemiit kivitsissut ”high loader” pissarsiaraa, taannalu kingoraartissat timmisartumit assartuummiit aqqariarlugit timmisartup suluusaata suliarineqarnerani atorneqarpoq.

Iluarsaassineq ingerlalluarpoq

Suliassamut atugassat immikkut ittut sapaatiummat timmisartumut Wamos-imut, Norsap atorsinnaannginnerani taartaasumut ilaatillugit tikisinneqarput.

 

- Teknikerittalu Kasper Zeeb-ip sulinngiffeqaraluarluni atortut tikittut atorlugit timmisartup atortui ajoqusersimasut piiarlugit aallartippai. Taassuma aamma Norsap Air Greenlandip hangariata silataaniinnermini kissassimaartinnera isumagaa. 

 

- Ataasinngormallu teknikerit SAS-imeersut tikipput, timmisartullu suluusaanut aquutit ikkussornerinik suliarqarnitsinni ikiuullutik. Suliaq pissanganarsimavoq, ulapissimaqaallu, unnuakkulli sininnissamut periarfissaqarsimapput. Suliassap ingerlalluarneranut peqataasut tamavimmik sulilluarsimapput, Henrik Keil tulluussimaarluni oqarpoq.

Norsaq ukiuni 20-ni

Henrik Keil aappaagu Air Greenlandimi suliffeqarnermini ukiunik 20-inngortorsiussaaq, Norsallu Air Greenlandimit pigineqalerneranit pisimasut tamaasa ilisimasaqarfigalugit.

 

- Norsaq aatsaavissuaq taamatut aqqusaagaqarpoq, nassuerutigissavarpullu Norsap aammalu Dash-8-t arlallit mittarfimmi uninnganerini inissakilliornartarmat. Norsaq tassa piareerpoq, ullumilu sisamanngornermi novembarip pingajuani timmisartuusseqqilissaaq, Henrik Keil oqarpoq, qungujulallunilu nangilluni:

 

- Novembarip 11-ni, Norsaq 2002-mi ilaasunik angallasseqqaarnermini ukiunik 20-nngortorsiussaaq.

 

Henrik sap.ak. una Frankrigimi Toulousemukassaaq, Norsap taartissaata Airbus A330 neop, Tuukkap, qaammatillu tulliani nunatsinnut pisussap, piareersarneranut peqataajartorluni. Piffissaq nallilerpat tamanna oqaluttuariumaarparput.