3221

2023 apriilip 4, marlunngorneq

SAR-gruppemi nakorsaatilerisut Medics-it

SAR-gruppemi – tassa qulimiguulinni ujaasinerni annaassiniarnernilu atorneqartartuni kivitsissutilerisut arfineq marluk, sap.ak. 5-mi aamma 8-mi, ulluni pingasuni sukumiisumik annertusisamillu ajoqusersimasunik nakorsaasarnermut pikkorissartinneqarput, imminnullu maannakkut Medics-inik taasinnaalerlutik.

Pikkorissarneq Kangerlussuarmi, SAR-ilerisut ulluinnarni aallaavigisaanni, piffissat marluk atorlugit  ingerlanneqarpoq. Kivitsissutilerisut inunnik nakorsartarialinnik aammalu ajoqusersimasunik qanoq passussinissamut isumaginninnissamullu paasissaqarluarlutillu ilikkagaqarluarput kivitsissutilerisoq ilitsersuisorlu Lasse Nymand Petersen oqaluttuarpoq. 

Lasse Nymand Petersen

- Michael Lund Byskov nakorsatut immikkut ilisimasalittut ilitsersuisuusup qanoq ajoqusersimasunik passussinissamut ilinniartippaatigut. Soorlu nissumik, seeqqumik, singernermik, siffissamik assigisaanilluunniit napisisimasumik aallersimagutta iliuusissatsinnik, Lasse Nymand Petersen oqarpoq. 

SAR-gruppi suliassanik assigiinngitsorpassuarnik isumaginnittarpoq, soorlu inuk nillertippallaalersoq, timikkut ajoqusersimasut aanaarnerisa unitsinnissaat ilaatigullu inuk uummamminik unittoorsimasoq. 

- Ummammut unissimasumut aallartitsissummik timmisartumi peqalerpugut, taassumalu atornissaa aammalu uummat aallarteqqinniarlugu tagiartuinissamik ilitsersorneqarpugut, Lasse Nymand Petersen oqarpoq, eqqaavaalu kivitsissutilerisut uummamminik unittoorsimasumik siusinnerusukkut ikiuereersimasut.  



- Pikkorissarnermi sulinitsinni siumorsinnaasatsinnut assigiinngitsunut sungiusarnissamut periarfissinneqarpugut, suliassatsinnullu sillimanissamut piareersimanerulerpugut. Aamma nakorsaasiinissaq annikikkaluamik iserfigillatsiarparput, tamannalu kingusinnerusukkut iserfigeqqissallugu. 

Nakorsaatinik, iltimik antihistamininik assigisaannillu nakorsartarialinnut ikiorsiisinnaanissamut akuerineqarnissaq peqqinnissaqarfimmut qinnutigaarput, akuersissappatalu tamakkununnga tunngassutilinnut annertunerusumik ilitsersorneqassaagut, Lasse Nymand Petersen naggasiivoq. 

Timmisartuni kivitsissutilerisut sukumiisumik annertusisamillu pikkorissarnermi angusisut arfineq marluk ukuupput:

Lasse Nymand Petersen

Paw Hjortstrøm

Mads Lynge Christiansen

Angutitsiaq Jensen

Aima Jensen

Malik Zeeb Olsen

Patrick Abrahamsen

 

Kivitsissutilerisut arfineq pingajuat periarfissaq siulleq atorlugu pikkorissarnermik naammassinnissaaq, kivitsissutilerisullu tamarmik taava CV-minnut, ilinniakkanik suliffigisimasanullu takussutissiamut, Medics ilanngussinnaalissavaat.