Ipassaq unnukkut Air Greenlandip timmisartua Dash 8 ataasiaannarnani, kisianni arlaleriarluni iluatsilluartumik Qaqortup Mittarfiani misilittaalluni timmisartoqattaarpoq. 
Misilittaaneq ingerlanneqarpoq Greenland Airportsip mittarfiata nutaap Qaqortumi ulloq 16. apriilimi ammarnissaanut qitiusumik piareersaarnerata ilaatut. Tassani upalungaarsimaneq, tuniussisarfik, isumannaallisaaneq, ikisitsisarneq  aamma ingerlatsinerit allat piviusumik misilittarneqarput.

Misilittaalluni timmisartornissaq sioqqullugu timmisartoq – taaguutilik Qooqa – Nuummiit Narsarsuarmut timmisartuusivoq timmisartup naalagaa René aamma aquttua Isak aquttarfimmiittoralugit, saqisoq Najaaraq saqisoralugu. Inuttanut aamma ilaasunut timmisartorneq immikkut inuulluaqqusineruvoq: Taakkununnga tassa naggataamik Narsarsuarmut minneq.

Ulloq ingammik Najaaqqamut tussunnarpoq, tassami timmisartumik saqisutut Narsarsuarmi aallartikkami, taamani qulimiguulimmi S-61-imi. Tussunngunini malugilluarpaa ilaasut Narsarsuarmut tikilluaqqugamigit – kingullerpaamik.    

Nunamiipput timmisartoqarfiup pisortaa Suulut aamma suleqatai ulapillutik. Angalasunik sullissinermik saniatigut mittarfeqarfimmi suliffimmik matunissaanut poortuipput. Atortuisa ilaat Qaqortumut misilittaalluni timmisartornissamut ujaqqiutitut ikineqarput. 

Naak ulluinnarni ulappukkaluarlutik timmisartoqarfiup pisortaata inuttaasut tikilluaqqunissaanut piffissaqarpoq aamma pakkullutik naapipput. Tamarmik nalunngilaat timmisartoqarfimmik nuussineq, kinguaariit ingerlaneranni angallassinermut pilersaarummi ilaasimasoq, tamanna tussunngunartoq. Kisialli aalajangiisoqareerpoq aamma piffissami tassani misilittaalluni timmisartornissat qitiutinneqarput.

Greenland Airportsip sullisuisa usilersuisartut timmisartoq piareermassuk, inuttanit ingerlaneqalerpoq. Misilittaalluni timmisartornermi timmisartunik turboprop-inut Chief Fleet Pilot naalagaq, Ove, tassaavoq timmisartup naalagaa René aquttoralugu. Aquttarfimmi timmisartortartut issiaviisa qeqqani Trafikstyrelsenimi sulisoq issiavoq, Saqisoq Najaaraq, aquttoq Isak aamma Greenland Airportsimi sulisut marluk ilaasuupput. 

Nalunaaqutaq 19.21 Qooqa Narsarsuarmit qangattarpoq Qaqortup tungaanut aallarluni. Inuttaasut amerlasuut tamaani katersuussimapput timmisartup minnissaa qilanaaralugu – takkussimasut amerlaqaat, minnerunngitsumik timmisartorluni misilittaanissaq illoqarfimmi saqqummiunneqarsimanngimmat.

Qangattarnerup kingornatigut minutsit 20 missaat qaangiuttut timmisartoq ungasianit takuneqarsinnaalerpoq. Sila pinnerluinnarpoq qilak tungutsarilluni anoreqanngingajallunilu. Pissanganarsivoq, timmisartup miffissaminut qanilliartuinnarnerani assakaasullu nunamut tummata, nuannannersuaq tusaaneqarsinnaavoq. Pingasoriarluni pilersaarutaanngitsumik hurraartortoqarpoq, timmisartup timmisartoqarfiup illutaata tungaanut ingerlaarnerani, tassani Air Greenlandimi aamma Greenland Airportsimi sulisut piareersimapput timmisartoq inuttaanillu tikilluaqqusinissaminnut. 

Qaammatini arlalinni sukumiisumik piareersarsimaneq naggaserneqarpoq nuannaarnerlu kikkuni tamani takuneqarsinnaavoq. Kisianni suliaq tamaanga killeqanngilaq. Misilittaalluni minnerit aamma aallarnerit ingerlanneqartussaapput timmisartumi inuttat aamma Qaqortumi mittarfimmi sulisut peqataaffigisassaat, kiisalu aatsaat unnuarornerani nalunaaqutaq ataatsimut Qooqa qangattaqqippoq Nuummut uninngasarfimminut ingerlaarluni misilittaalluni timmisartornerit iluatsilluartut arlallit naammassereerlugit.

Timmisartoq ullumikkut uteqqeriissaaq ullumikkut apriilip ulluisa 15-ianni, Narsarsuarmut uterluni, tassani inuttat allaasapput, Nuummiit Narsarsuarmut naggataavimmik timmisartortussat. Pisoq timmisartoqarfiup illutaani tamanut ammasumik malunnartinneqassaaq, tassani ukiuni 67-ini timmisartut sulullit atorlugit timmisartuussisarneq inuulluaqquneqassalluni

Tamatuma kingornatigut mittarfik heliportinngussaaq, tassanngaanniit Air Greenlandimi sulisut nuussapput Qaqortumik heliportimut qulimiguulik H125 atorlugu missallutik  - heliportilu matussaaq. Ullumikkut taakkua marluk eqqumaffigilluinnarpavut, aamma tamanut qujanarsuaq, ukiuni qulikkaani arfinilinni uagutsinni angalasimasunut – ilaasut taamatuttaarlu sulisut – Mittarfik Narsarsuaq aamma Qaqortumi heliporti aqqutigalugit.