Nuuk

Kalaallit Nunaata innuttaasa amerlanersaat Nuummiipput. Illoqarfiit pingaarnersaanni, ilulissanik, arfernik, pinngortitamik kusanartorsuarmik, ileqqutoqqanik oqaluasaanillu siumuiffissami, nunap innuttaasa sisamararterutaat najugaqarput. Amerlanerpaallu takorloortagaat tassani nunap uummataaniipput. Illoqarfiit pingaarnersaat tamanut inissaqartitsivoq, nutaaliornissamulli aammalu nutaamik eqqarsariarnissamut periarfissaqarluni, taamaattumillu Nuuk illoqarfissuanngoriaannaavoq.

 

Nuummut ilisarnaatit ilagaat illut qalipaatigissaaqisut qisummit sanaat. Ingammik Nuup ilaani Nuussuarmi illut assigiinngiiaaqisut, qalipaasup qalipaatissamaataasullusooq qalipaatigissut kusanaqaat.

 

Nuummi nutaanik inissialiorfiunerpaavoq Qinngorput, tassani ilaqutariit inuusuttut najugaqartiterput Nuummilu atuarfik nutaanerpaaq aamma tassaniippoq.

Nuummi misigisassat

Nuuk illoqarfiuvoq allanngorartuartoq Kalaallit Nunaannili illoqarfiit pingaarnersaattut ineriartorfiulluni ullutsinnut malinnaajuartuusoq, illoqarfiulli sumiiffinni assigiinngitsuni suli qangatut isikkuni pigaa. Takornariatut Nuup tikinnissaanut peqqutissat arlaqaqaat, soorlu ullut ilaanni kaffillertunukarneq, ullorlu alla Godthåb Bryghus-imi immiorfeeqqamut takornariarneq.

 

Nuup qeqqanut ungasinngitsumi nerisassanik nutaarluinnarnik pisisoqarsinnaavoq.

Katuaq, kulturip illorsua, saqqaa arsarnerit ingerlaarnerattut ilusiligaq, saneqqullugu ingerlaguit café-t arlaannut iserlutit nillertumik najooqqaagit imaluunniit café latte-torit. Kalaallit nunaanni Universiteti Ilisimatusarfik aamma Pinngortitaleriffik alakkakkit, taakkumi nunap ilusaa malillugu illulioriaatsimik kusanarluinnartumik sanaajupput.

 

Nuup illoqarfittut ineriuartupiloortup saniatigut Nuummi ileqqutoqqat kulturikkullu kingornussat misigineqarsinnaapput. Illulioriaatsit alulortartut ilaannut takussutissanut ilaavoq Nuummi domkirke Annaassisitta Oqaluffia. Oqaluffik anginngitsoq, qisummik sanaaq aappaluttumillu qalipaatilik, kusanaqaluni Nuup nutaanngitsortaani Hans Egedep eqqaassutissaata ungasinngitsuaniippoq.

 

Nuummingaanniit Kalaallit Nunaanni illoqarfinnut allanut timmisartumik ingerlagit

Ullut tamaasa nunat tamalaat mittarfissuanniit  Kangerlussuaq -miittimiit Nuummut timmisartuussisarpugut.

 

Kalaallit Nunaanni illoqarfinni annerpaatut Nuummiit nunap sinneranut attaveqarluarpoq. Nuummut akunnikkuit ornikkumaneqarnerpaat ilaannut, soorlu Ilulissat, Maniitsoq aamma Narsarsuaq ingerlaqqeriaannaavutit. Nunatsinnullu tikeraarlaanut Nuummi misigisassarpassuaqaraluartoq, inoqarfinnut minnernut, nunap kulturianut immikkut misigisaqarfiusartumut, aamma tikeraarnissaq innersuunnarpoq.

 

Nuummi illoqarfiup qeqqani pisuinnaq takusassarsiorluni angalaarneq pisinnaalluarpoq. Illoqarfimmi aqqusernit katillugit 100 km-nik takissuseqarput, aammali busernissaq taxarnissarluunniit periarfissaapput. Illoqarfeeqqat qaninnerit angallammik orninneqartarput. Ukiukkullu sisoraatinik ujakkaarfiit qullilersukkat aamma periarfissaapput.

Eqqissisimaarfissaqqissoq

Timimut tarnimullu eqqissinarluinnartumik sineriak malillugu angallammik angalaarit. Nuup ilaanut Qaqortumut illut qalipaatigissut inissisimalluarut isiginnaarujuukkit. Aamma Nuummi kangerlummi nunaqarfikunut angalaarnissaq innersuunnaqaaq.

 

Nuup kangerluani angalaarnermi arferujussuit qipoqqaat tikaagulliillu qanimut siumugassaasarput, Nuummiit angallammik arfernik takornariarneq misigisassaavoq nuannersoq. Nuummi kangerluup ilorpiaanut sermimut iigartartumut ulloq naallugu takornariarnissaq innersuunnaqaaq. Tassanimi sikut akornisigut sermip iigartartup tungaanut aqqutissarsiorluni ingerlaarnermi pinngortitarsuup qanoq nuannertigalunilu angissusia misiginartarpoq.

 

Nuummi sisorarneq, snowboarderneq aammalu golferneq

Ukiukkut upernaamilu sisoraatinut aqqutitigut suliarilluakkatigut ujakkaarneq aamma sangusaarneq kiisalu snowboarderneq snescooterernerluunniit periarfissaapput. Kalaallit Nunaanni illoqarfiit pingaarnersaanni qaqqat portunersaannit kangerlunnut tungujuaartunut isikkivissua naliitsuuvoq. Nuummi sisoraatinik ujakkaarnissamut periarfissaqarluarpoq, aamma Kalaallit Nunaanni sangusaartartunut majuartaat takinerpaaq 1000 meterinik takissusilik tassaniippoq.

 

Golfernissaq takorloortarpiuk, immaqalu golfertarfik allani siumugassaanngitsoq misilikkusuppiuk? Taava aasaanerani Nuuk Golfklubimi golfertarfik, isikkivimmigut allanut nallersuussinnaanngitsoq, 9-nik putulik golferfigissagaluarpat.

 

Nuummi misigisassat

ILISIMAVIUK?


Nuummi biilinut 4000-nut aqqusernit asfaltikkat katillugit 100 km-upput.

2012-mi juulimi Kalaallit Nunaat illoqarfiup qeqqani niuertarfeqarfissuartaarpoq. Taanna Nuummiittoq qulinik qulereeqarpoq, quleriit marluk niuertafeqarfiusut, sinneri allaffeqarfiupput naqqanilu biilinut inissiisarfeqartoq Kalaallit Nunaanni sanaartukkanit annerpaavoq.

Arferup mattaa c-vitaminik aammalu orsup akuinik omega n-3-nik ulikkaartoq peqqinnartuusoq. Mattak nunatsinni nerisassiornermut akuulluinnartoq Nuummi nerisassianik nioqquteqarfinni arlalinni misilinneqarsinnaavoq

Kalaallit Nunaanni sisorarnermi majuartaat 1000 meterit miss. takissusilik Nuummiippoq. Sisorarnermik nuannarisaqaruit Nuummi sangusaarutinik sisorarnissaq periarfissaalluarpoq.

Isersimavugut silamiippugulluunniit? Naluttarfimmi Malimmi igalaarujussualimmi kangerlummut qaqqanullu isikkivilerlutit nalorujoorit. Naluttarfik ukioq kaajallallugu ammasarpoq.

Kalaallit Nunaanni ernup nukinganik innaallagissiorfiit annersaat Nuummiippoq. Nuna tamakkerlugu nukissiorfiit taamaattut tallimaapput, Ilulissani, Nuummi, Tasiilami, Qaqortumi, Narsami aammalu Sisimiuni. Tassa Kalaallit Nunaanni innaallagiaqarnerup 70%-ia nukissiorfinniit CO2-mik mingutsitsiviunngitsunit pivoq.

PAASISSUTISSAT NUUMMUT TUNNGASUT


Nuuk Kalaallit Nunaanni illoqarfinni pingaarnersaavoq

Nuuk qanga Godthåb-imik ateqarpoq

Nuuk 19.000-t missaannik innuttaqarpoq

Nuuk marlunnik nunaqarfeqarpoq

Nuuk 1728-mi ajoqersuiartortitamit Hans Egede-mit qallunaanit norskinillu kingoqqisumit tunngaviligaavoq

Nuuk kangerloqarferujussuup paavani noorujussuarmi inissisimavoq

The Four Enjoying The Nightsky From The Top Of The Thoughsand Stairs. Photo By Aningaaq Rosing Carlsen

Tikiffissat allat

Nunarput tupinnartunik, kusanartunik alutornartunillu ulikkaarpoq. Tikiffissat tullia uani nassaariguk.

Angalaninni SULUK atuagassiallu assigiinngitsut akeqanngitsumik atuakkit

Ikissutissaq app-ikkut pissarsiariuk

Makitassanik katersigit eqquillutillu